تجربتي الخاصة لبعض منتجات الوجه

Tuesday, March 10, 2015


صباح / مساء الخير 


كيفكم ؟ .. اليوم حتكلم عن تجربتي لمنتجات الوجه و بالتحديد حب الشباب 
-

أول ما بدأ فيني حب الشباب يمكن ثاني متوسط و كان شوية يعني زي كل البنات لمى يبلغوا يكون حبتين تلاتة ، بس أنا الله يهديني  كنت ألعب بالحبوب و أفقشها و سار وجهي مليان آثار الحبوب و بدأت أخبص في وجهي و اشتري اي شي قدامي وادور في القوقل اشوف تجارب البنات و أجرب ما خليت شي ما جربته خطات طبيعية و كريمات و كل شي في الحياة جربته و ما استسلمت و رحت عند دكتورة إلا السنة إلي فاتت ... يلا بسم الله 
(الصور مو تصويري)


1) السدر 

اسويه زي الحناء شوية سدر مع موية ما في كمية محددة أهم شي يكون ثقيل زي الحناء بالضبط و تحطيه على الوجه مدة تتراوح ين 5-10 دقائق الأفضل أنو أول مره تستخدميه تكون 5 دقائق  كنت أسويه قبل 4 سنوات تقريباً بس أذكر إني بطلت منو عشانو لزج بس ينظف البشرة و يخفف حب الشباب و مع الاستمرار يزيل الرؤوس السوداء و يوحد لون البشرة .

2) مناديل clearasil لحب الشباب :

كليراسيل صراحة ما حبيتها مرا ما سوت شي في  الحبوب بس ممكن ما تخلي الحبة تطلع كبيرة  بس ممكن كانت تنظف البشرة سرت أسويها في وجهي و رقبتي و ريحتها كأنك في  مستشفى و خلصت و ما اشتريت  .

3) غسول تنقية البشرة من clearasil :

لمى استخدمت الغسول مع المناديل بانت النتيجة حسيت أنو الحبوب خفت و الآثار كمان خفت بس بعدين سحبت عليه لأنو بشرتي صارت مررا جافة المفروض استخدم كريم مرطب بس ما كنت عارفة و طفشت لأنو إذا وقفت أسبوع ترجع الحبوب و أكتر من أول كمان .

4) غسول لتقشير الوجه و منظف يومي لإزالة الرؤوس السوداء من كلين اند كلير clean & clear : 

اثنينهم شي عجيب جد الكل لاحظ الفرق الحمدلله الغسول اليومي شي حلو ريحته حلوه و حبيباته ناعمه جدا خفيف ع الوجه و المنظف ما اذكر صراحة  :) و بعدين نفس السالفة و قفت كم يوم و رجعت الحبوب و كل شي رجع و أنا ما أحب استمر على شي مدة و نتيجته مو مره مقنعة .










5) كريم vagheggi phytocosmetici balance : 

هذا أنا اسميه الكريم السحري هذا اعطتني هو الدكتورة هو تقريباً زي فيوسيدين بس الفيوسيدين ما حبيتوا لأنو كان يجفف الحبة و يخليها زي الجرح مدري كيف اوصفه و هذايخفف التهيج و تختفي الحبة بدون أثر احطو ع الحبوب  كذ مسحه خفيفه قبل ما أنام كل يوم 3 أيام بالضبط و تروح الحبة من جد سحري  حجمه 50 مل أول كنت استخدموا كل يوم بس دحين سرت ما استخدموا دايماً بس للضرورة معايا من سنتين و ما خلص مقتصده فيه مرا لأني ما لقيت زيو في الصيدلية بس موجود اون لاين  .



6) ماسك bioclean G2 masque من methode cholley suisse : 

دا برضوا من الدكتورة عبارة عن ماسك مقشر لإزالة آثار الحبوب و الرؤوس السوداء و كمان يخفف الحبوب انصحكم فيه صراحة جدا جيد طريقته تحطي طبفة خفيفه ع الوجه و تخليه لمدة 15 دقيقة .

7) الطين المغربي الطبيعي : 

ينظف البشرة و يعطيها لمعة و يقلل من ظهور الحبوب بشكل ملحوظ و ينعمها و يزيل الرؤوس الوداء دا كلو لاحظتو في وجهي و قرأت أنو كمان يقلل النمش و يتخلص من الضرر الناتج عن الأشعة الضارة و أنو يمتص الزيوت عشان كذا يقلل من حب الشباب و الي بشرتهم دهنية يحطوا موية ورد معاه شكلو نفس الي في الصورة أخليه مع موية بحيث يكن زي المعجون .


8) دالسين تي dalacin t : 

هو الي في النص اول موعد عند الدكتورة ادتني هو و استمريت عليه الى الموعد التاني يعني تقريباً كان م3 أو 4 أسابيع و ما سوا أي شي مرا ما حبيته . 

9) صابون harrogate sulphur soap : 

برضو اعطتني هو الدكتورة بس للأمانة ما افتكر بالضبط نتيجتها بس كانت كويسه و بعدين دورتها و ما لقيتها لا في النهدي و لا المتحدة و لا .... كم صيدلية مافي .





10) صابون نيتروجينا لحب الشباب : 

لما خلاص يئست من اني القى صابونة الكبريت رحت الصيدلية أدور صابون بديل و شفت حق نتروجينا وجربته و مرا أعجبني صار لي 4 شهور استخدمه مرا عاجبتني النتيجة و استخدم معاه غسول و احيانا استخدمه للحبوب الي في الظهر بس هو للوجه بس عادي  .

11) neutrogena visibly clear 2in1 : 

 و هذا الغسول إلي اشتريته معاه 2 في 1 غسول و قناع طريقتي كانت أول شهر مرتين في الاسبوع اسوي طبقة خفيفة من الماسك في الوجه لمدة خمس دقائق و بعدين أغسل وجهي و احط الصابون بحركة دائرية رقيقة  لمدة دقية او دقيقتين لين ما تسير رغوة  و بعدين الماسك مرة في اليوم و الصابون مرتين في اليوم و اذا كنت مستعجلة استخدمه كفسول . 


ملاحظة :

بعض أسباب ظهور حب الشباب اضطرابات الهرمونات و الدورة الشهرية  و كثرة القلق و التوترو أسباب كثيرة موجودة في النت و هذي المستحضرات كلها عوامل مساعدة لتخفيف الحبوب و عدم ظهورها بس الأساس عشان ما تطلع الحبوب أو يقل احتمال ظهورها  تحافظوا على صحتكم و تشربوا مويه كثير و تقللوا من الدهون و تسوا رياضة و في حاجة كمان قالتها لي الدكتورة تفحاتين في اليوم بديلة عن كل الأدوية و مفيدة كمان للشعر .


أعتذر ع الإطالة و إذا صدر من أي خطأ املائي و أتمنى أنكم تستفيدوا 
<a href="http://www.bloglovin.com/blog/13788903/?claim=nsk427ay3yt">Follow my blog with Bloglovin</a>

تابعيني على شبكات التواصل الاجتماعي : 



1 comment:

  1. يااااه الحبوب وما ادراك مالحبوب ، أكثر حاجة تنرفز ، وكمان من أكثر الأشياء تشويه للوجه ..

    يبغالها حذر شديد ومتابعه لمهيجات الجسم من الأكل أو المستحضرات ..

    ReplyDelete