تجربتي لمنتجات العناية بالشعر من لي ستافورد ( Lee Stafford ) بزيت الأرجان

Friday, March 03, 2017





صباح / مساء الأجواء الخورافية  😍


و أخيراً حكتب ريفيو مجموعة لي ستافورد اجلته مدة طويلة لانو شعري فجأة صار يتساقط بشكل غير طبيعي و سار مرا ناشف خفت انه يكون السبب و ما كتبت الريفيو بس دحين خلاص تأكدت انه مو السبب راح اتكلم عنه ، أول شي نبذة عن لي ستافورد :



لي ستافور مصفف شعر من مدينة صغيرة في بريطانيا اسمها لي اون سي ( leigh-on-sea ) انجلترا فتح أول صالون له عام 1984م و كان في بيته و عام  1998م فاز بجائزة مصفف الشعر البريطاني في هذا العام و منها زادت شهرته و انعرف اكثر و اكثر و عام 2000  فتح ثاني صالون له و عام 2001 بدأ لاين منتجات تصفيف و عناية الشعر الخاص فيه و كمان سوا اجهزة تصفيف الشعر ، للي حابة تعرف عنه اكثر .

عنده ثلاثة ثلاثة مجموعات أساسية و وحدة تتفرع لكذا شي أنا اخترت مجموعة الأرجان و هي من المجموعات الأساسية ، جربت 4 منتجات و هي شامبو و بلسم و ماسك و زيت .







 شامبو مغذي بزيت الأرجان | Lee Stafford argan oil nourishing shampoo : 




أول ما استخدمته كان في آخر شوال  كنت مسوية كيراتين اينوار قبلها ب ٤ شهور تقريباً  بس ما ضبط مرا  بس كان موجود في شعري المهم و من اول استخدام انصدمت من النتيجة 😳 شعري مرا ترطب و بعد ثالث استخدام شعري كان كانه مستشور مافيه تطاير ولا نفشة بس التقصف في الاطراف موجود و بعده بفترة ممكن قبل ٣ أو ٤ شهور شعري انقلب ١٨٠ درجة صار ناشف مرا و باهت و يتساقط بشكل فضيع 💔😭 خفت انه من الشامبو بس بعدين قلت يمكن من الكيراتين او ممكن عشان وقفت الفيتامينات الي آخذها ، كنت اخذ فيتامينات لمدة ٣ سنين اعطاني هي الدكتور و ب ٢٠١٦ وقفتها لاني حللت و كان كل شي فيني سليم الحمدلله ، و كملت استخدام الشامبو و في دي الشهرين الحمدلله شعري بدا يتحسن و سرت اشوف نتيجة الشامبو مرا ثانية 💖 بس مو خيالية زي في البداية باختصار : يرطب الشعر - يخفف النفشة ( اكثر شي فرق معاي ) - ينعم ملمس الشعر - ينظف الشعر تمام لمى استخدمه احس فروة راسي نظيفة جداً راح يبين معاك لمى تستخدميه و الحلو فيه مو زي أغلب الشامبوهات لمى اغسله ملمس الشعر يكون خشن و ناشف كانه بلاستك ماعرفت اوصف 😂 بس اكيد فهمتوا قصدي المهم يكون ملمس الشعر ناعم جربت نوعين شامبو خالية من السيلكون و ما خلت شعري زيه .

عيوبه : عيب واحد بس انه لازم استخدم كمية كبيرة اكثر من اي شامبو مع انه في مادة سولفات لوريث الصوديوم 🙃 .

قوامه ثقيل و تقريباً بدون ريحة انا صراحة أحس ريحته كأنه شامبو جونسون بس أختي تقول لا . 

هل راح ارجع اشتريه ؟ 
 اكيد اصلاً هذي ثاني علبة استخدمها و نتيجته على كثر الشامبوهات الي جربتها ما شفت زيها ابداً . 



بلسم مغذي بزيت الأرجان | Lee Stafford argan oil nourishing  conditioner:





بما أنو طبيعة شعري جاف فمستحيل استغنى عن البلسم 💓 ما راح اكثر كلام بس انا كنت استخدمه دائماً مع الشامبو ممكن بس ٣ مرات استخدمت الشامبو بدونه عشان اشوف الفرق و كانت النتيجة مع البلسم الشعر يرطب اكثر و النفشة تقل اكثر و جربته كمان لحاله عشان اشوف اذا يرطب الشعر اذا استخدمه مع شامبو غير و طلع ينفع  ، و لاحظت كمان أنه خفيف كأنه لوشن و زيه زي أي بلسم ما ينزل بسهولة من الشعر بس يخلي ملمس الشعر يجنن 😍 . 

هل راح أرجع اشتريه ؟ 
برضو أكيد و هذي ثاني علبة 😇 .



ماسك علاجي مغذي | Lee stafford argan oil deep nourishing treatment :




بعد ما شفت نتيجة المنتجات تحمست اشتري الماسك و اجربه بس للأسف خيب ظني 💔 ما منه فايدة ابد ما يسوي شي ابدا اول مرا جربته طبعاً بدون لا استخدم البلسم حسيت انه نشف شعري و ماما جربته برضو قالت نشف شعرها قلت اعطيه فرصة و اصلاً وقت تجربته كان وقت ما كان شعري تعبان و بقيت استخدمه لحد ما خلص و احترت معاه احياناً يرطب شعري و أحياناً لا ، آخر مرا استخدمته نشف شعري الغريب انو ناس كثير تمدحه انا اشوفه خسارة فلوس صراحة كانه بلسم بس انه ينغسل بسهولة مو زيه ، ممكن اذا استخدمت شامبو و بلسم غيرهم معاه تعجبني نتيجته . 




هل راح أرجع اشتريه ؟ 
لا لأنه زي ما قلت ما منه فايدة مع البلسم و الشامبو . 


زيت الارجان المغذي | Lee stafford arganoil nourishing miracle oil : 





الزيت هذا أفضل منتج في المجموعة كلها صراحة لأنه يغنيني عن استخدامها كلها هوا نتيجته مع الشامبو و البلسم احلى بس كمان لحاله بطل فايدته زي الباقيين يرطب الشعر و ينعمه و يخفف النفشة ، يستخدم على شعر جاف أو مبلول ضغطتين منه تكفي الشعر الطويل و بالنسبة لي أفضل استخدام له  لمى يكون الشعر ندي و كمان احب استخدمه قبل لا استشور شعري و بعد لا استشوره اذا كان باهت احط منه نقطة يعطي الشعر لمعة و اذا كان شعري مرا متشابك احط منه يفك لي التشابك و يسهل التمشيط 👩🏽 ، قوامه خفيف مو زي الزيوت و لا زي السيروم ، اختي مرا عجبتها نتيجتوا و اشترت لها و ماما جربت  حقي كم مرة  لاختي الصغيرة و كلهم شافو نتايج حلوة  . 


عيوبه : للاسف الزين ما يكمل 😂 ، الشي الوحيد الي مو حلو فيه سعره مبالغ فيه على كميته بس الكمية تبقى مدة طويلة استخدمه دايما و لسى فيه ما خلص و لا مخلص ، بعد ما كتبت حسيت انه نتيجته مقاربة لسيروم تريسمي اذا حابة تشوفي التدوين هنا بس اني ما مدحته كثير 😂 ممكن الفرق الوحيد النفشة هذا خففها يلا ممكن نعتبروا بديل ارخص شكلي راح ارجع اشتريه . 

هل راح أرجع اشتريه ؟ 
اكيد  





منتجات لي ستافورد تنباع في صيدلية النهدي في عيب واحد في كل المنتجات و هو السعر سعرها مرا مبالغ فيه عندنا ، فالي حابة تجربها تستغل وقت العروض و التخفيضات أنا اشتريتها كان عليها عرض الشامبو و البلسم و الزيت مع بعض بسعر أقل . 





أول مرا أكتب تدوينة منتجات كذا كأني اتكلم عادي ما أختصر 😂 بس شعور جميل صراحة  .


لكل الي يقرأوا تدويناتي 💖 💗 💓 .


اكتبوا لي في التعليقات ايش أفضل شامبو جربتوه ؟ 




تابعيني على شبكات التواصل الاجتماعي : 



أو 

7 comments:

  1. للحين ماوصلت للشامبو اللي اعجبتني نتيجته وخلتني استمر عليه كل فتره اغير طبيعة شعري دهني و هالشي متعب جدا جدا جدا :(

    ReplyDelete
    Replies
    1. البحث عن شامبو مناسب اصعب شي في الحياة 😭 أنا سار لي ٣ سنين أدو والحمدلله أخيراً حصلت

      Delete
  2. تحمست على المجموعه كثير وببحث عنها في النهدي ����❤️

    ReplyDelete
  3. المجموعة تحمسسس كثير
    يعطيك العافيه 💓

    ReplyDelete
  4. لما كنت في عمرة اشتريته من المدينة المنورة وفعلااا كااان تحفة وكان افضل حاجة استخدمتها ف شعري خصوصا ان انا شعري جاف ومتكسر وهااايش وفيه كل العبر بجد نتايج الزيت ده تحفة بس للاسف مش عارفة 💔💔💔الاقيه في مصر

    ReplyDelete
  5. شوفي ممكن تلاقيه اون لاين أو ممكن في مراكز التجميل الكبيرة

    ReplyDelete