روتين عنايتي بعلامات التمدد

السلام عليكم و رحمة الله و بركاته 

صباح / مساء الخير 

كيفكم صبايا ؟ 

كثير بنات يعانوا من علامات التمدد ( الخطوط الحمراء او البيضاء ) و انا من ضمنهم  🙁





ايش هي التشققات أو علامات التمدد و ايش اسبابها :

هي خطوط تظهر في الجلد الي تعرض لتمدد سريع و تكون غالباً في الاماكن الي تتجمع فيها الدهون بشكل كبير ( البطن - العضد - الصدر - الافخاذ - تحت الابط - الورك - الارداف ) .

من اسبابها :
١- الحمل و الولادة .
٢- عند البلوغ .
٣- زيادة الوزن بسرعة .
٤- قلة ترطيب البشرة خاصة الاماكن الي تتجمع فيها دهون .



التشققات الي فيني صار لي ممكن 4 سنين و انا احاول  اعالجها و المشكلة انو الي فيني بيضاء و يئست انها تروح و جربت خلطات و كريمات و اشياء كثير ، اخر شي جربته هذا الروتين و حسيت انو فادني هو طبعاً  ما خلاها تروح بس خففها ( خلى لونها قريب للون البشرة ) بنسبة ممكن امممم ٣٥٪  ، يا كثر ما تمنيت اني انتبهت لها لمى كانت حمراء لانو الحمراء في البداية فتقدري تعالجيها بس للاسف ما انتبهت لها الا بعد ما تغير لونها ، و الي فيها خطوط حمراء تنتبه  لها من بدري قبل لا تسير بيضاء ، و الامهات و الاخوات انتبهوا لاخواتكم الي في مرحلة البلوغ و علموهم يرطبوا بشرتهم دايما لانو غالباً تطلع وقت مرحلة البلوغ و الترطيب ان شاء الله ما يخليها تطلع و شرب الموية كمان مهم كوقاية و زيت فيتامين e . 

الروتين هذا كنت اسويه قبل سنة و دحين راح ارجع له ان شاء الله .

١- التقشير 

و قت الاستحمام : التقشير بحركة دائرية  جداً مهم لانه يزيل الجلد الميت و يجدد الخلايا و ينشط الدورة الدموية  و يخلي البشرة تمتص الكريم اكثر ، حاليا استخد هذا المقشر قبل كنت اسوي سكر و زيت زيتون .

٢- زيت بايو اويل او فيتامين e

معروف هذا الزيت بانه يخفف السترتش ماركس و يوحد لون البشرة نتيجتوا حلوة بس يبغاله صبر النتيجة تبين بعد استخدام لمدة ٣-٤ شهور .

٣- زبدة الشيا أو الكاكاو

قبل النوم بساعة او نص ساعة  ادهن الاماكن الي فيها سترتش ماركس بزبدة الشيا و لمى اصحى اتروش و اسوي الخطوتين الي فوق .


لنتايج افضل استخدمي مع هالروتين الديرما رولر بس للامانة انا ما جربتها خايفة منها بس دايما اسمع انها تخفف التشققات كثير .

آخر شي حابة اقول لا تنسوا  تتابعوني على السناب شات 

هذا سنابي 👇🏽😊

instagram

و كمان تابعوا مدونتي اذا حابين توصل لكم التدوينات اول باول

و بس  😊

اتنمى انكم تستفيدوا  💗 💕

تحديث بتاريخ ٢٢ نفمبر ٢٠١٦ :
زبدة الشيا كثير قالوا تسمرهم فالي تسمرها عادي تقدر تبدلها بأي نوع زبدة أو كريم للتشققات أو كريم عادي و الي ما قد جزبتها تستخدمها في منطقة صغيرة كم يوم للتجربة عشان تعرف اذا سمرتها او لا .