التخطي إلى المحتوى الرئيسي

يوم في حياتي | a day in my life






 مساء / صباح الجمال

تدوينة اليوم فكرتها جديدة على مدونتي بس صراحةً من اكثر التدوينات الي استمتعت في تصويرها و كتابتها فكرتها هي اني اصور يومي من اول ما اصحى لحد ما انام ، دايما اشوف في اليوتيوب فلوقس زي كذا و كمان تدوينات عند بلوجر اجانب ما قد مرت علي بلوجر عربية و كاتبة تدوينة زي كذا  😊 و مرا عاجبتني الفكرة و حبيت اسويها يلا نبدأ  😍 ...




يوم السبت 15/10/2016


نظام نومي غير مستقر اسبوعين اصحى الصباح ٣ اسابيع انام الصباح  😊 في هذا اليوم كان نظامي انام الصباح .



٢:٤٠ م




صحيت من النوم اول ما اصحى من النوم اشيك ع الجوال اشوف الواتساب و التليجرام و بعدين اقوم اغسل وجهي و افرش اسناني و اصلي الظهر و كذا انا قبل لا انام اخلي مويه جمبي عشان  اشربها لمى اصحى قبل لا اكل شي ع الريق مرا مفيد هالشي  .






٤:٠٠ م 




عشان احنا نتغدا المغرب لازم اكل شي و بما اني مريضة شربت حليب دافي مع شابورة و عادةً بعد الفطور اسوي الغدا بس اليوم ما سويته لاني مريضة فجلست شوي ع الجوال و بعدين تروشت و تجهزت للغداء و جاء بابا و تغدينا . 



٧:٣٠ م 

صحبتي ولدت يوم الخميس رحت ازورها .






٨:٤٤ م 

بعد ما نزلت من عند صحبتي رحت مع ماما و اختي سنتربوينت عشان تبغى كم حاجة و جلست ألعب اختي و سويت شوبنق بالنظر  😂 لاني مقررة ما اشتري شي هالفترة بس اشتريت لي حاجتين  😂 💔  .








بعض الملابس الي عجبتني ...








الجاكيت هذا مرا حبيته 



و الفستان هذا كمان مرا حلو بس ما اشتريته 💔 لانو عندي تنورة شبهه .










 التنورة  😍 😍 .





اختي عجبها هالفستان و قالت لي اصوره  😂 .




و طبعاً لازم امر هنا و اشوف الروائح الجديدة  😂 .



هذي ثلاث طاولات مع بعض شكلها يجنن فخمة و كلاسيك . 



١٠:٤٨ م 

ماما راحت هي واخواني السوبر ماركت و انا جلست مع اخوي الصغير  👼🏻 . 



١:١٩ ص 



رتبت الاغراض الي جابوها .



٢:٣٤ ص 




جا وقت العشاء اخواني ناموا الحمدلله و مافي احد يزعجني و بما انو اليوم قضينا دلعت نفسي في العشاء و سويت لي بيزا سريعة  😋 و طبعا لازم جوجو تساعدني شوي . 














٣:٤٠ ص 



تفرجت فيلم money monster حسيت من اسمه انو حلو و حق عصابات و كذا بس طلع سيء ما حبيته مرا و بعده شفت حلقة من مسلسل كوانتيكو  .


٦:٢٠ 



سويت ماسك الطين الاوربي هوا المفروض اسويه كل اسبوع بس انا اخليه كل اسبوعين او ثلاثة  😂 😊  ، و على ما ينشف الماسك طبعت كم شي حق اختي الي في الابتدائي و غسلته و غسلت المواعين بعده .


٧:٣٠ ص 



قرب وقت النوم غسلت وجهي بغسول و فرشت اسناني ( روتين الليل ) و كتبت خطط اليوم الي بعدو و جلست على جوالي اشوف سناب شات  و الانستجرام . 


٨:٠٠ ص 



جاء وقت النوم و خلص يومي و باذن الله اليوم الي بعده اجمل 💞 .


و بكذا اكون انتهيت و زي ما قلت اول مرا استمتعت و انا اصور لهالتدوينة و راح اسوي تدوينات زيها في المستقبل ان شاء الله و اذا كنتي بلوجر و تقرأي تدوينتي جربي تسوي زيها راح تعجبك  👌🏼 😍.

 photo sig_zpsnzw9exvy.jpg

تعليقات

  1. حبيييييت تدرين الفكرة براسي بس الكسل وضغط الدوااام بس يوم شفت تدوينتك حمستيني اسوي حقتي

    ردحذف
  2. حبيت فكرة البوست ودي اسويها ..

    ردحذف
  3. يوم مليان انشطة ماشاءالله 😂❤️❤️

    ردحذف
  4. فكرة التدوينة تدور ف بالي من فترة طويلة؛ ومن قريت البوست تحمّست اطبقهّا��
    استمتعت بتفاصيل يومج ، و الله يحلّي ايامج دايماً��.

    ردحذف
  5. بسيطه ماشاءالله احب اللي كذا احس بالراحه وانا اشوف

    ردحذف

إرسال تعليق

المشاركات الشائعة من هذه المدونة

نتيجة تجربتي لتمارين كلوي تينغ

مساء/ صباح الخير  موضوع التدوينة واضح من العنوان  🏃🏻‍♀️  إذا انتي جديدة في عالم الرياضة، كسولة، تملي من الروتين، تبغي تمارين بسيطة و ما تتعب مرة بس نتيجتها حلوة و تفرق كملي قراءة التدوينة للنهاية،

تجربتي لمنتجات ماوي مويستر (مجموعة زبدة الشيا) منتجات شعر طبيعية | Maui moisture

صباح / مساء الجمال ✨ يالله أحس من زمان ما تكلمت عن منتجات عناية بالشعر 🙆🏽‍♀️ اليوم حقولكم عن تجربتي لمنتجات الشعر من ماوي مويستر و هي براند امريكية 🇺🇸 اكثر شي حمسني اجربها هو انها تعتبر طبيعية 🌿 و اهم شي لحظة 🤦🏽‍♀️ خلوني أول شي اقولكم نوعية شعري 👩🏻‍🏫، طبيعة شعري جاف ع قولة ماما يشرب الزيت لأني دايماً اهتم في و أزيته و النتيجة بعد فترة تبين و إذا سحبت اسبوع أو اثنين عناية الشهور الماضية كلها ع الفاضي زيادة ع طبيعته الجافة ما اشرب مويا تمام غذائي مو تمام فتقصف الشعر و تعب حالياً الحمدلله التقصف و التلف خف كثير آخر ٥ شهور بس الجفاف لا مفر منه المهم دايماً أبحث 🕵🏽‍♀️عن شامبوهات كويسة

اصنعي غلاف لهايلايت الإنستجرام الخاص بك بطريقة سهلة جداً ✨

مساء / صباح الخير يا جميلات من فترة سارت موضة جديدة في الإنستجرام عند البلوجرز و الانفلونسرز و انتشرت بسرعة الي هي غلاف أو خلفية لهايلايت الإنستجرام و مرا حبيتها جداً جميلة و كيوت 😻 و أحسها ترتب الحساب ف من وجهت نظري أحس لازم أى بلوجر تسويها في إنستجرامها إذا عندها هايلايتس لأنها تبين الحساب مرتب و بروفيشنال ف راح أحط لكم طريقتين و كل وحدة أسهل من الثانية .