تجربتي لمجموعة pep-start من كلينيك

Wednesday, March 29, 2017




صباح / مساء الخير .

موضوع اليوم عن ٣ منتجات من كلينيك من مجموعة pep-start و هي مجموعة عبارة عن ٥ منتجات وظيفتها تعطي البشرة نشاط و حيوية و تجهزها أو تهيئها للماكياج .

المنتجات اللي جربتها : 




1- pep-start 2in1 exfoliating and cleanser : 


هو عبارة عن غسول يومي و مقشر خفيف  ٢ في ١ .

وصف المنتج : غسول يومي ينظف البشرة بشكل لطيف مع حبيبات للتقشير تزيل الاوساخ و خلايا البشرة الميتة و يعطي البشرة نعومة و اشراقة و يناسب جميع انواع البشرة و ما يسبب جفاف .




تجربتي و رأي في المنتج : 
هنا رأي فيه بداية استخدامي له .
أول شي خالي من الباربين و مواد الفتالايت و ما اعرف ايش مكوناته بس أحس فيه ريحة فواكه حمضيات كنت أقول ممكن برتقال او يوسف افندي بس بعدين حسيت فيه بابيا و جريب فروت المهم فيه فواكه ههههههه 😂 ، هذا احترت فيه حبيت و ما حبيت حبيت فيه انه حبيباته ناعمة و صغيرة و حبيت كمان ملمس بشرتي بعد ما استخدمه و شكلها كذا يعطي اشراقة و مع الاستخدام راح تلاحظي انه ينظف البشرة زي آثار الحبوب خففها بس ما شالها تماماً ممكن لاني ما استخدمه كل يوم  و المسام كمان ينظفها اول ما استخدمه بشرتي كانت دهنية و كان مرا ممتاز و عاجبني و الفترة هذي مع تغير الجو بشرتي تحولت جافة و كان كمان تمام بس الاسبوع هذا بشرتي سارت جافة جداً و تتقشر و استخدمه عدمها زيادة زود القشور عن نفسي احس ما راح ارجع اشتريه اول شي لاني ما افضل استخدم غسول مقشر بشكل يومي و اذا ابغى مقشر حق بايو ديرما عن تجربة حلو و ينظف أكثر لأنه مقشر مقشر مو غسول مقشر . 
سعره في موقع سيفورا ١٩.٥٠ و الريفيوز كثير يمدحوه . 



2- pep-start hydroblur moisturizer :

هو عبارة عن كريم مرطب للبشرة و يعطيها مظهر مطفي و يسوي بلر للعيوب 

وصف المنتج : 
كريم مرطب خالي من الزيوت و يساعد على إخفاء عيوب البشرة بشكل فوري  بحيث يعطي البشرة مظهر blur ( البلُر تأثير معروف في الصور الي هو يخلي الاشياء مو واضحة ما عرفت كيف اوصفه 😑 ) و ترطيبه خفيف و يعطيك مظهر بشرة مطفية خالية من اللمعان لمدة تقريباً ٧ ساعات و يمنحها لمسة مخملية و يسموه الفلتر الجديد المفضل . 



تجربتي و رأي فيه : 
أكثر منتج حبيته من الثلاث منتجات 💕 ، أول استخدام لاحظت انه يخلي ملمس البشرة مخملي و كمان يطفي اللمعه بس في نفس الوقت في إشراقة في الوجه ، مع كريم الأساس يستخدم كمرطب و برايمر في نفس الوقت جربته ذحين وانا اكتب انصدمت 😱 تأثير البلر اختفى و أنا لسى كنت ناوية أمدحه جربته مع فونديشنين واحد لانكوم و الثاني لوريال حق لانكوم سايل و حق لوريال ثقيل و فل كفرج و كلهم تبين المسام بس حق لوريال اكثر مرا ما عمري شفت وجهي كذاعلى انه لمى استخدمهم لحال ما تبين المسام 🙃 و مسحته و جربت مرا ثانية و طلع تمام طيب ليش أول كذا ؟! أتوقع لانه أول مرا سويت الكريم و بعدها يمكن بنص ساعة أو أكثر حطيت الفونديشن ع العموم أنا لمى استخدمه ما كنت اركز ع المسام لانها مو مرا كبيرة عندي ، رأي من أول و الي كنت ناوية  أقولو حبيت فيه أنه يخلي ملمس البشرة مخملي و ناعمة و مشرقة و حبيت كمان أنه خفيف و ما يدبق و حبيت أستخدامه قبل الميك اب بس ككريم مرطب يومي ما حبيت  و مرا حبيت الافكت الي يسويه من جد كاني حاطة فلتر 💖 يعطي ايفكت البشرة الصافية هذا الكلام أول بس دحين طلعت لي حبوب و راحت بقي الأثر ، الآثار الغامقة تبين بس القاتحة لونها قريب من البشرة يمشي عليها الايفكت استخدمه بكريم اساس و بدون اكثر شي احبه بدون كريم اساس احطه على الوجه و إذا في حبوب أو آثار اغطيها بكونسيلر مكتوب عنه كمان انه يخفف الخطوط بس مدري ما لاحظت هالشي  . 
سعره في سيفورا ٢٩.٥٠ دولار و الريفيوز كثير يمدحوه . 




3- pep-start eye cream : 



وصف المنتج : 
كريم للعين يمنحك الترطيب و الإشراق ، يخفف من الانتفاخ في ثلاث ثواني و يخلي شكلك مصحصح و منتعشة و يرطب المنطقة و يحضرها للميكب مناسب لجميع انواع البشرة و خالي من الزيوت من مكوناته زبدة الشيا للترطيب و الكافيين و العسل الأسود ( دبس السكر ) لمظهر مشرق و نشيط يعني مصحصح 😁 .






رأي و تجربتي : 
أكثر منتج كنت متحمسة أجربه من الثلاث بس صدمني شوي 💔 ، أغلب الوقت أستخدمه بدون كريم أساس نتيجته مرا تعجبني ترطب المنطقة و تخليها مشرقة و فيها نضارة و بالنسبة للانتفاخ الحمدلله ما عندي انتفاخ و لمى اصحى من النوم ما يكون عندي انتفاخ الا نادر جداً بس شفت كثير يمدحوه للانتفاخ اتوقهع مرا بيفيد الي دواماتهم الصباح يخلي وجههم مصحصح أنا دايما استخدمه اكون صاحية من قبل باكثر من ساعتين ، مرا ما حبيته مع المكياج يخلي تحت العين رمادي  جربته بكونسيلر و بدون و غيرت نوع الفونديشن مافي فايدة على أنه مافيني هالات كثير شي مرا بسيط مع الفونديشن ما يبين بس مدري ليش يسير كذا و جربت احط الكريم و استنى دقايق  شوية لحد ما تمتصه البشرة مافي فايدة خلاصة الموضوع لحاله مرا يجنن مع المكياج ما عجبني ابداً . 

سعره ٢٦.٥٠ دولار اكثر منتج من الثلاثة الناس تمدحه .



فيديو لمنتجات pep-start :




اتمنى تستفيدوا 💗 


تابعيني على شبكات التواصل الاجتماعي : 



أو 


 photo sig_zpsnzw9exvy.jpg

3 comments:

  1. دوختيني تمدحين بعدين فجاه تسبين😂❤ احس الحين اكثر المنتجات اللي عليها مدح كثير ماتصير قد المدح ابدًا .. يعطيك العافيه لولا💋

    ReplyDelete
    Replies
    1. 💞 هههههه 😂 أهم شي فهمتي الخلاصة و استفدتي

      Delete
  2. منتجات كلينيك تهبببل مرررة
    عليها مدح كثير 💓

    ReplyDelete