التخطي إلى المحتوى الرئيسي

في الكتابة و التدوين حياة




مساء / صباح الأجواء الأجواء الجميلة 
تدوينة اليوم  فجأة خطر على بالي أكتبها حسيت نفسي أكتب هذا الكلام في مدونتي 🙂 و احترت في اسمها حيرة بس ان شاء القى العنوان المناسب 💪🏽 😂 أخليكم مع التدوينة الخفيفة و اللطيفة 😘 .

أذكر زمان أيام الابتدائي  لمى كنا ندرس تعبير كنت لمى يطلبوا مننا نألف قصة أو نكتب مقالة عن شي معين كنت أنبسط و استمتع في الكتابة و بعدين في خامس بدأت الي خذي موضوع من النت جاهز و اطبعيه  و استمر لحد المتوسط اعترف اني كنت أسويه دايما لانو صراحة مريح و الأبلة ما تقرأ و لاتدري عن ايش كتبنا  💔 بس أحياناً كنت أعبر من عندي أو أضيف و أغير كلام من الي آخذه من النت و أنبسط لمى اسوي كذا بس شي يزعل أني أتعب و أكتب كلام من تأليفي و في النهاية ينرمي و محد يشوفه زيه زي الجاهز 😥 طريقة التدريس السيئة للأسف مدري متى يبطلوا بعض المدرسات هذي الحركات لحسن حظي اني مو مهتمة في الأدب و مو مهتمة بالكتابة و التعبير الادبي على هالاسلوب سيبوكم من هذي القصة بس حبيت أذكرها 😅 لأنو شي يزعل يعني المفروض المدرسات يشجعوا الطالبات و يخلوهم يشوفوا وين طموحاتهم بالذات المراحل الدراسية الأولى في أبلات كثير مستحيل أنساهم و إالى الأن كل ما آذكرهم ادعيلهم قد ما فادوني و علموني 💕 وفي الفئة الثانية الي نو كومنت المهم نرجع لموضوع الكتابة ، الكتابة كانت و ما زالت بالنسبة لي متنفس جميل جداً أحب أكتب في كل حالاتي فرحانة أكتب زعلانة أكتب معصبة أكتب زمان كنت أكتب يومياتي و بعدين لمى صار عمري ١٣ بطلت اليوميات و سرت أكتب زي المقتطفات كذا كلام أعبر فيه عن أحاسيسي و مشاعري سواء كانت سعيدة أو حزينة و كنت دايماً أحطها في تويتر عاد القهر إني حذفت الحساب و كنت حافظتها في الجوال و اتفرمت و راحت 😭 ، لأني إنسانة كتومة و ما أحب أقول لأحد مشاعري أعتبر الكتابة حافظة أسراري و مساعدتي للتخطيط لحياتي و مستقبلي و كل شي مجرد ما ابدأ أكتب يكون في بالي كلمتين أو جملة فجأة ألاقي نفسي عبيت الصفحة لقيت نفسي في الكتابة و اكتشفت إني أعشقها كثير تمر علي أوقات أبغى أوصل فكرة أو مشاعر لأحد أو حتى رأى بالكلام ما أقدر بالذات المشاعر بس عن طريق الكتابة أقدر أوصل الي أبغاه ببساطة و أنا مرتاحة و أنا صغيرة كنت دايما أحب أكتب لماما رسايل سواء إعتذار أو تعبير عن حب إلى الان أحب أوصل مشاعري بالكتابة أكثر من الكلام أحس مهما جلست أكتب عاجزة أوصف عشقي للكتابة للأمانة أول ما بديت المدونة و قلت قبل كذا بديتها عشان أفيد بنات غيري بالأشياء الي جربتها و لأني أحب الكتابة ما ترددت بس ما توقعت و لا خطر على بالي اني القى متعتي و شغفي في الكتابة زي دحين و أنا أكتب هذي التدوينة الي فجأة كذا جات على بالي و قلت خليني أكتب و اندمجت و تحولت لموضوع ينزل في المدونة كمية سعادة و متعة الحمدلله يارب 💕 لو جلست أكتب يوم كامل ما حقدر أوصف الشعور و السعادة إلي أحسها لمى أكتب تدوينة  😍 كيف إني جالسة اشارك بمواضيع في  عالم الانترت العالم الكبير 🌍 و لمى وحدة تبحث عن شي في قوقل يطلع لها الي كتبته صحيح أني ما أكتب بلغة عربية فصيحة و لا أكتب روايات أو شي مرا واو  🙄 بس الكتابة و التدوين بالذات مو مقتصر على شي معين المدونة تعبر عن صحبة المدونة لكل وحدة  أسلوب و طبع خاص ، و أنا لقيت نفسي و شغفي في التدوين إلي من خلاله أقدر أوصل رأي و أفكاري و تجاربي و أشاركها مع ناس ممكن أعرفهم و ممكن لا و يستفيدوا منها و ممكن لا في النهاية لكل واحد رأيه الخاص مو لازم الي أكتبه يعجب كل من يقرأه 💞 . 



نصيحة 💕 : 
انصح كل وحدة  نفسها تسوي مدونة بس مو عارفة كيف تبدأ أو خايفة ما تلقى قراء أو تبغى مدونتها مثالية مافيها ولا غلطة تشيل من راسها فكرة رأي الناس  و المثالية لأنو المدونة زي الدفتر الخاص فيك تكتبي عن كل شي تحبيه عناية ، شعر ، تجميل ، تسوق ، حتى لو خليتيها يوميات فين رحتي و ايش سويتي عادي مو مشكلة لأنها مساحتك الخاصة للتعبير عن نفسك و ممكن تخليها برايفت إذا ما تبغي الناس تقرأ و تسير دفتر يوميات الإلكتروني انتي بس جربي و إذا ما عجبتك تقدري بضغطة زر تحذفيها ، الحياة كلها تجارب إذا جلسنا مكاننا و خفنا أو ترددنا نسوي شي جديد علينا حنجلس دايما  في مكاننا لكن لو جربنا شي جديد علينا حنستفيد من التجربة حتى لو فشلت 💕.

انتهت التدوينة اتمنى تعجبكم 💞 .


تابعيني على شبكات التواصل الاجتماعي : 


snapchat
أو
و عشان توصلك التدوينات أول  بأول على المربع الأزرق الي مكتوب فيه متابعة 💗
photo sig_zpsnzw9exvy.jpg

تعليقات

  1. يالله على طاري اللي تبغا مدونتها مثاليه هههههههههه جت فترة بعد ما مشيت في التدوين شويتين جاني احساس اني مو راضيه على ممدونتي وابغاها تكون بروفشنال مرره اللي كنت اقرا فيها زماان.. وبعدين بالصدفه كنت عاليوتيوب اتفرج احد اليوتيوبرز المليونيات وكانت تتكلم اننه كيف بدأت وانها كانت تصور بكاميرا اللابتوب وجوده سيئة ومحتوى ضعيف بس انها لسى محتفظه بهذيك المقاطع وما حذفتها لأنها تمثلها وتمثل بدايات نجاحها 💭
    يالله كيف كلامها ألهمني وصرت أروح المدونات اللي كانت تعجبني وأشوف بداياتها واكتشفت انه كله يجي مع الوقت..
    الكتابه تطلع أجمل شيء فيك، حتى تقدرين تتعرفين على نفسك وتوجهاتكوتفكيرك من الكتابه اللي تطلع معاك وقت الالهام ❤

    ردحذف
    الردود
    1. حلو تخلي القديم و ما تحذفيه عشان تشوفي التطور و اكيد لمى تشوفي بدايتك و تقارنيها بوحدة قبلك في التدوين ممكن تشوفي انو مدونتك مرا تنفع و لازم تطوري بس هو حبة حبة تتطوري و خبرتك تزيد و تسيري تعرفي اغلاطك و ما تعيديها

      حذف
  2. لما بديت التدوين لأول مرة طرت فرح بهذا الاكتشاف وحسيته مكاني، ومكان هدفي أبدا أجمع متابعين لكن فجأة تفاجأت بتعليق عندي في المدونة وحسيت إني شيء ��
    وهذا عطاني دافع للاستمرار ❤️
    وما زلت أشوف التدوين متنفس ما استغني عنه، حتى وأنا ما أكتب نفس أول

    ردحذف
  3. جد التدوين أحسة متنفس سواء تدوين في دفتر خاص أو مدونة إلكترونية خاصة أو مدونة عامة، رغم إن عندي قناة يوتيوب إلا إني أفكر أفتح مدونة أخليها بس تعبير ومشاعر كأنها دفتر يوميات وأفكر إنها تكون عامة عشان أشجع على التدوين وأكيد مو كل شيء ينعرض بس الي يفيد أعرضة 😻👏🏻👏🏻، يعطيك العافية وحبيت تدوينتك الرايقة.

    ردحذف
    الردود
    1. الله يعافيك ، جميل افتحي مدونة مرا حلو التدوين 😍 و الأحلى لمى تفيدي غيرك

      حذف
  4. صدق الكتابة مفيدة .. يعطيك العافية على هالتدوينة اللطيفة والمفيدة

    ردحذف

إرسال تعليق

المشاركات الشائعة من هذه المدونة

نتيجة تجربتي لتمارين كلوي تينغ

مساء/ صباح الخير  موضوع التدوينة واضح من العنوان  🏃🏻‍♀️  إذا انتي جديدة في عالم الرياضة، كسولة، تملي من الروتين، تبغي تمارين بسيطة و ما تتعب مرة بس نتيجتها حلوة و تفرق كملي قراءة التدوينة للنهاية،

تجربتي لمنتجات ماوي مويستر (مجموعة زبدة الشيا) منتجات شعر طبيعية | Maui moisture

صباح / مساء الجمال ✨ يالله أحس من زمان ما تكلمت عن منتجات عناية بالشعر 🙆🏽‍♀️ اليوم حقولكم عن تجربتي لمنتجات الشعر من ماوي مويستر و هي براند امريكية 🇺🇸 اكثر شي حمسني اجربها هو انها تعتبر طبيعية 🌿 و اهم شي لحظة 🤦🏽‍♀️ خلوني أول شي اقولكم نوعية شعري 👩🏻‍🏫، طبيعة شعري جاف ع قولة ماما يشرب الزيت لأني دايماً اهتم في و أزيته و النتيجة بعد فترة تبين و إذا سحبت اسبوع أو اثنين عناية الشهور الماضية كلها ع الفاضي زيادة ع طبيعته الجافة ما اشرب مويا تمام غذائي مو تمام فتقصف الشعر و تعب حالياً الحمدلله التقصف و التلف خف كثير آخر ٥ شهور بس الجفاف لا مفر منه المهم دايماً أبحث 🕵🏽‍♀️عن شامبوهات كويسة

اصنعي غلاف لهايلايت الإنستجرام الخاص بك بطريقة سهلة جداً ✨

مساء / صباح الخير يا جميلات من فترة سارت موضة جديدة في الإنستجرام عند البلوجرز و الانفلونسرز و انتشرت بسرعة الي هي غلاف أو خلفية لهايلايت الإنستجرام و مرا حبيتها جداً جميلة و كيوت 😻 و أحسها ترتب الحساب ف من وجهت نظري أحس لازم أى بلوجر تسويها في إنستجرامها إذا عندها هايلايتس لأنها تبين الحساب مرتب و بروفيشنال ف راح أحط لكم طريقتين و كل وحدة أسهل من الثانية .