تونرات طبيعية للوجه

مساء / صباح الجمال يا جميلات 
اليوم راح أكلمكم عن تجربتي لي تونرين نتايجهم حلوة و مكوناتها موجودة في كل بيت و طريقتها سهلة جداً وزيادة على كذا غير مكلفة و هي تونر أو منقوع المرة و الرز 

تونر المُر أو المُرة :

فوائد منقوع المرة :

المرة معروفة من زمان من أيام الفراعنة كانو كعلاج لبعض الأمراض و الإغريقين كانو يستخدموها كمطهر للجروح لها استخدامات كثيرة في الطب الشعبي و فوائده كثيرة بس أنا راح أذكر فوائدها للبشرة
١- لأنها تعتبر مطهر فهي جداً كويسة لحب الشباب و آثاره .
٢- توحد لون البشرة و تفتحها و تزيل الشوائب .
٣- تساعد على تصغير مسام الوجه .
و شفت كمان مكتوب إنها تسمن الوجه 🤔 .

طريقة تحضير منقوع المرة :

انا صرحة اسويها عشوائي بس هي تقريباً ل ٣٠٠مل من المويا ٥ قطع مرة كبيرة أو ١ و نص ملعقة طعام جالسة احاول اتخيل الكمية المناسبة  😂 مثلاً اذا سويتيها في قارورة مويا صحة زيي اذا عبيتي العلبة كلها تحطي المرة كمية ربع القارورة ممكن و ممكن تخليه كذا بس أنا خليته منقوع يومين و بعدين صفيته من قطع المر و اهم شي قبل لا تسويه تغسلي المرة عشان إذا فيها تراب أو شوائب .

تجربتي :
لي شهر و أسبوع تقريباً من بديت استخدمها اساس استخدامي لها عشان مسام وجهي تعبتني جربت أشياء كثير و ما صغرت الحبوب في وجهي الحمدلله ما تطلع كثير بس حبة او اثنين ثلاثة  في الشهر مرا و اذا انضغطت نفسيا و سار عندي لخبطة في نظامي المرة معروفة إنها جداً كويسة للبشرة الدهنية و الي معرضة للحبوب زمان استخدمتها فترة و نتيجتها للحبوب حلوة بس تطول حالياً بشرة وجهي جداً جافة تحسنت فترة و مع البرد دحين رجعت جافة كنت مترددة اسوي تونر المر ولا لا بس عارفين هوس البشرة الجميلة ✨ خلاني اغامر و سويته طريقتي استخدمه مرتين في اليوم الصباح و الليل و ما استخدمته يوميا في الأسبوع الأول ٣ ايام بس و الاسبوع ٥ أيام  اول شي لاحظته في الأسبوع الثاني وجهي سار فيه اشراقة و لمعة صحية و المسام و هي الشي الأهم لاحظت صغرت شوية و كان فيني اثر كم حبة راح بفترة اقل من العادة ، الأسبوع الثالث تحمست و سويته كل ايام الأسبوع بس في هذا الأسبوع الجو برد اكثر و بشرتي سارت جافة مرا و تتقشر من شدة الجفاف فسرت بعد ما أحط التونر على وجهي أحط بعده زيت الوجه من بوتس مرا احبه تكلمت عنه هنا 

الأسبوع الرابع المسام الحمدلله 💕 صغرت كثير سارت طبيعية مو واضحة و كبيرة زي اول و الوجه نضر و الجفاف لسى موجود بس خف و طلعت لي حبة في دقني لاحظت انها ما عورتني مرا تعرفوا لمى الحبة تبدأ تطلع المكان الي تطلع في يكون حساس و يألم و اهم شي ما طلع الرأس الأبيض 😍ينرفزني 😂 ، الأسبوع الخامس و هو الأخير لسى ما خلص بس رجعت استخدمه ٣ ايام و طلعت حبة جديدة لسى ما راحت بس ما طلع الرأس الأبيض 😂 و اثر الحبة الي قبل ما راح بس خف كثير 👌🏽 النتيجة للان اعجبتني اول ما أحطه وجهي  ينشد بس ما لاحظت انه وجهي سار مشدود مافيه تجاعيد عشان الاحظ ولا خطوط بس في شي لاحظته و فرحت مرا لأنو مرا مضايقتني تحت منطقة العين قريب من الأنف 👃🏼حبة بيضاء تحت الجلد مرا مطفشتي و لها فترة طويلة ممكن ٣ سنين و مو راضية تروح عاد كنت دايما احاول اشيلها بملقط  😂 و هي ناشبة ما تبغى تنزل و دحين الحمدلله راحت بس للأمانة ما أعرف هي منه ولا من شي ثاني لأني في هذي الفترة سويت ماسكات و في الزيت الي استخدمه و الغسول فما اعرف هو مع كلهم راحت ولا من المرة بس .


تونر الأرز : 

فوائده :
الأرز يستخدم في كثير من منتجات العناية بالبشرة لاحتوائه على فيتامينات و معادن كثيرة بالذات منتجات شرق آسيا لو تلاحظو عندهم أشياء كثير بالأرز معلومة جديدة علي إنه الرز فيه مادة اسمها pitera هذي المادة تساعد على تجديد خلايا البشرة و كمان فيه نسبة من مضادات طبيعية لأشعة الشمس من فوائده 
١- توحيد و تفتيح لون البشرة .
٢- يعطي البشرة نظارة و حيوية .
٣- مبرد للبشرة المتهيجة .
٤- ينظف البشرة .
هذي الأشياء الي أعرفها عنه و سويته عشان أبغى وجهي يكون مشرق و صافي قبل لا أكتب التدوينة قرأت فوائده ولقيت زنه كمان 
٥- يعالج حب الشباب .
٦- يعالج مسام البشرة و عيوني سارت كدا 😍.
٧- يعالج الكلف و التصبغات .

طريقة عمل تونر الأرز : 
كمية الرز تكون نص كمية الماء يعني مثلاً كاسة رز كاستين مويا ، أول شي تغسلي الرز كويس من الأتربة و الشوائب بعدين تحطي الموية و تكون عادي بدرجة حرارة الغرفة مو باردة و لا حارة و تخليه من ساعة إلى خمسة ساعات أنا خليته ٥ و بعدين اصفي الموية و استخدمها ، و في طريقة ثانية وحدة قالت لي عليها و هي حطي الرز ع النار كانك تطبخيه و لمى تغلي الموية و تسير بيضا صفي الرز و خليها تبرد و استخدميها .

تجربتي : 
لسى بديت هذا الاسبوع و استخدمته مع تونر المرة ٣ أيام مرة و ٤ أرز و المرة هذا أخر اسبوع لأنه خلص و حجرب تونر الأرز لحاله و تحمست له أكثر لأنه فوايده تقريباً زي تونر المرة بس ما ينشف البشرة فحلو للي بشرتهم جافة لاحظت بس انه يعطي نتيجة فورية أول ما اسويه على طول وجهي يسير كأنو لمبة 😂 بس على طول تنطفي بعد شهر إن شاء اكتب تجربتي كاملة له .

ملاحظة : الأفضل ينحطوا في الثلاجة و ما يجلس معاكي أكثر من شهر يفضل انك تسويها كل اسبوع او اسبوعين عشان يكون فرش أكثر  .

تحديث بتاريخ ١٢ فبراير : تونر الأرز وقفته بعد ما كتبت التدوينة بإسبوع و رجعت له نص يناير رأي فيه حبيته يعطي البشرة إشراقة و ما يجففها بالنسبة للحبوب قلت نسبة الحبوب تطلع لي الحبوب المعتادة  في الشهر ثنتين ثلاثة ولاحظت إنها ما تطلع كبيرة زي أول و المسام الحمدلله من بعد ما استخدمت تونر المرة و بعده استخدمت شي سحري راح اقول لكم عنه قريب سارت كانها مافي آخر شي نقطة توحيد اللون و التفتيح صراحة ما شفت تفتيح بس توحيد لون ممكن إنه آثار الحبوب عندي الحمدلله اختفت بس برضوا ما أقدر أحكم بدقة لأنو كنت أستخدم شي معاها ملاحظة أخيرة يفضل لمى تسوي تونر الرز تسوي كمية حق اسبوع أقصى حد لأنها يخرب 😷 حتى لو كان في الثلاجة و سايرة أحب أحطه وقت الطبخ لأنه يكون بارد يبرد على وجهي من حرارة الفرن . 


انتهت التدوينة ان شاء الله تستفيدوا منها و الي جربت واحد منهم تكتب ايش رأيها حبة النتيجة و لا لا 💖 .

تابعيني على شبكات التواصل الاجتماعي : 

instagram

twitter

snapchat
أو

و عشان توصلك التدوينات أول  بأول على المربع الأزرق الي مكتوب فيه متابعة 💗