نهاية عام ٢٠١٧ | The end of 2017

Monday, January 01, 2018




مساء / صباح السعادة و الايجابية و الرضا و كل شي حلو و سعيد 💞 أحس ابغى ابكي 😭 مو مصدقة انو هذي ثالث سنة اكتب فيها عن نهاية العام مشاعري متلخبطة فرح و حماس و انتماء مدري ايش دخل  بس حسيت هذي التدوينة سارت جزء من حياتي كل نهاية سنة أكتبها في نفس اليوم 💕 و تبقى ذكرى لي كل سنة ايش سويت فيها و ايش سار لي فيها و ايش التغيرات و خلاص حوقف كلام عشان لا أطول 🤭 أهم شي شعوري وصل لكم 💕 .





سنة ٢٠١٧ كانت سنة تغيير كبير جداً فيني حسيت إنها سنة نضج ، تفكيري تغير و أهم شي سرت ٢١ مدري 💃🏽 ليش مرة فرحانة من زمان و متحمسة من قبل بسنة  😂 بس كذا أحس خلاص أنا سرت كبيرة و خلاص young  😌 جد هذي السنة أكثر سنة تغيرت فيها شخصيتي أحس تفكيري مرا تغير نظرتي للحياة تغيرت أشياء كثير كنت أشوفها شي مهم ولازم منه سرت أشوفها تافهة أحس هذي السنة تعرفت على نفسي أكثر 🕵🏽‍♀️سرت أعرف أشياء جديدة في نفسي من هوايات و اهتمامات و طبع و غيرت أشياء في نفسي كنت أقول مستحيل تتغير ثابتة زي مثلاً العناد الزايد و أكتشفت إني استمتع و مرا انبسط لمى أطبخ  👩🏽‍🍳و تعلمت طبخات كثير كنت أقول صعبة و مستحيل اسويها و أحب أتأمل تغيرات القمر 🌕 🌖 🌗 🌘 مدري هل سبب التغيرات هذي الغربة و إني سرت أجلس لحالي كثير و تعرفت على نفسي لمى انعزلت أو تغير عادي مع الزمن و طبيعي الشخص لمى يكبر بس قررت أنو لازم كل كم شهر أجلس جلسة أحدث نفسي فيها إيش الأشياء الي أحبها و ايش الأشياء الي تخليني سعيدة و أيش الحاجات إلي نفسي اتعلمها و ايش العادات الي أبغى اكتسبها و الي أبغى أغيرها فيني محد راح يأثر فيك كثر نفسك إذا حطيتي شي في بالك و قررتي لازم تسويه حتسويه إن شاء الله  .

أهداف ٢٠١٧ :
اهداف السنة هذي قسمتها ٣ أقسام ( ديني - شخصي - مشتريات ) و كانت اهداف بسيطة و متواضعة و الحمدلله الديني و الشخصي تقريباً كله حققته أو نصه اما المشتريات 👎🏽 ممكن بس شي واحد بس ما تفرق الحمدلله مبسوطة بالاهداف الثانية الاهداف الدينية احتفظ فيها لنفسي اما الشخصية مثلاً كان نفسي اتعلم الخبز سواء كيكات او معجنات اقل شي اكون تعملت ١٠ وصفات و الحمدلله سويتها و هدف ثاني يخص المدونة و هو اتواصل مع براند سواء كانت صغيرة او كبيرة و الحمدلله سويته و من المشتريات كنت أبغى اشتري ليزر منزلي بس ما اشتريته مترددة للآن و ٣ مرات اشوفهم مسويين عليه خصم نص السعر و اتحمس بعدين ابطل لانه نتايجه تحتاج وقت محتارة  .

 سنة ٢٠١٧ أكثر سنة أصور فيها القمر و السحب  🌕 ☁️ و أكثر سنة استمتعت بالمطر 🌧 و أول مرا أشوف الشجر وقت الربيع كيف يطلع 🌸 و أول مرا أشوف الخريف الحقيق 🍁 و أجلس أراقب الأشجار كل يوم لحد ما طاحت كل أوراقها و أول مرا أشوف ثلج  ❄️ و أول مرا أركب قطار  🚊  و للأسف ما قريت فيها كتب إلا كتابين بس كنت مخططة أقرأ فيها كثير بس ما قدرت حظي نحس في الكتب إلي قرأتها و غامرت و جربت أشياء كثير لأول مرا في حياتي 💞 وتعرفت على بنات من دول مختلفة و اكتشفت إنو المحادثات العابرة الي تكون وقت انتظار أو في المصعد في أي مكان حلوة و ممتعة و تعلمك أشياء جديدة و إنك ممكن تلاقي صحبات كويسات من السوشل ميديا و مو حلو أخوك يكبر و إنتي بعيدة عنو 💔 .

بعض صور الغيوم و القمر





المدونة و حسابات السوشل ميديا :
كنت أتمنى اكتب تدوينات أكثر من السنة الماضية كنت أقول أقل شي حكتب ٤٠ تدوينة بس للأسف ما قدرت بس إن شاء الله ٢٠١٨ مقررة كل شهر انزل من ١-٤ تدوينات راح احاول ما اوقف ولا شهر ان شاء الله و بالنسبة لحسابات السوشل ميديا أكثر شي قدرت التزم أكون متفاعلة فيه السناب شات و بعده الانستجرام أحاول كل يوم أنزل صورة بس لازم فترات اقطع و إن شاء الله هذي السنة أحاول ما يعدي اسبوع إلا وأنا منزلة بوست بالنسبة لتويتر مخليته مكان فضفة  🌚 بس الفترة الأخيرة رجعت له تذكرت أيام زمان قبل الانستجرام و السناب شات و حبيته 💕 .



تطبيقات و ألعاب الجوال :
في الصيف علقت على لعبة اسمها Windin و في نوفمبر حملت لعبة Homescapes m و معلقة عليها حالياً مرا عاجبتني بالنسبة للتطبيقات الثانية
.Cookpad
.Soundcloud
.Revl
Audible تطبيق تابع لأمزون فيه كتب صوتية مجانية إعلاناته تطلع لي في كل مكان زي إعلانات جولي شيك عندكم  😂 فحملته و عجبني اسمع الكتب و أنا امشي أو وقت التنظيف .
Spotify كمان كان يطلع لي في كل مكان  😂.
Remotemouse مرا من المرات التراك باد حق اللابتوب خرف و جلس كم يوم مخرف و كنت ابغى استخدمه ضروري و قلت اكي في شي يربط اجهزة أبل ببعض يخلي الجوال ماوس و حصلت هذا البرنامج المنقذ  💪🏼 🤩 و من بعدها حبيته يريحيني لمى اشبك اللاب توب في التلفزيون ما اجلس اتحرك من مكاني  😴 .


السنة هذي أقل سنة تفرجت فيها افلام من ٤ قلت لكم كبرت خلاص  😂 امزح بس كان عندي أشياء أهم من الأفلام و ما كان عندي وقت فراغ كثير زي السنوات الي قبل المهم من الأفلام الي تفرجتها  :

ممكن شهر ديسمبر أكثر شهر تفرجت فيه أفلام لأنه إجازة و برد مع البرد الواحد ما يبغى يسوي شي إلا ينسدح و ياكل بس 😅 و أفلام نوفمبر و ديسمبر كانت مرا حلوة  😍

 رعب ouija 2.

ok jaanu هندي دراما.

Beauty and the beast 2017 تفرجته في السينما و كان أول مرا أروح سينما سار له مكانة خاصة في قلبي لأني جربت شي جديد استغربت إني ما تحمست قبل كذا للسينما و أنا أحب الأفلام بس يمكن لأني تعودت أتفرج في البيت  🤔.

Rings كمان رعب  😂 السنة هذي تفرجت أكثر شي رعب تعويض عن ٢٠١٦ ما تفرجت فيها رعب كثير و أنا أحبها 💓 المهم  هذا الفيلم كانه الجزء الثالث the ring و هذا الفيلم جزء من طفولتي 💞 .

Boss baby

Annabel

teenage ninja turtles : out of shadows

unlocked أكشن مرا ما حبيته

Home again دراما كيوت

و كمان عدت كل أجزاء Harry Potter مدة اسبوع لمى عدتها حسيت كذا 🤩 مدري كيف أعبر حنين للماضي و ذكريات جميلة و كل شي مدري المهم كان شعور حلو .

و الفيلم الي استناه من ٢٠١٥ اخيراً نزل 💃🏽  pitch perfect 3 one of my all time favs بس لسى ما شفته 💔 .

Fantastic beats فيلم رواية لنف كاتبة هاري بوتر حلو بس مو زي هاري بوتر .

Happy death day مرا عجبني فكرته جديدة علي حبيتها .

Atomic blonde أكشن



اوكي 😅 اكتشفت اني تفرجت أفلام كثير هذي السنة بدايتها و نهايتها طلع حتى أكثر من ٢٠١٦ و تراني دايماً انزل اسماء افلام في السناب شات يعني للي حابة تشوف افلام في الويكند أو بس تبغى اسماء أفلام تتفرجها أي وقت  تضيفني سناب و كذا يعني فهمتوا  😁 .

نجي للمسلسلات هذي من جد ما تفرجت كثير حقيقة  😂 تقريباً كلها نفس الي اتفرجهم من قبل الشي الجديد بس مسلسل pll أخيراً خلص بعد ٧ سنين نهايته مرا ماتوقعته احسهم سوها من كثر ما طولوا المسلسل ساروا مو عارفين ايش النهاية فقالوا خلينا نطلع وحدة مدري فين بس عجبتني .

تفرجت جديد  و Stranger things  و Modren family و Dynasty اعتقد بس هذول تابعتهم اول مرا هذي السنة و ليش بس أكتب اسماء الأفلام و المسلسلات لأني لو جلست أكتب قصة كل واحد محد راح يقرأ التدوينة من طولها فأي اسم حسيتيه حلو فلم أو مسلسل حسيتيه حلو شوفي إعلانه في اليوتيوب  💞.

١٧ مفضلات عشوائية لهذي السنة :

١- سالتيد كرامل كيك من coop .

٢- فرنش فانسيس كيك .

٣- زيت للوجه من بوتس تكلمت عنه هنا .

٤- مقشر flake away من سوب غلوري .

٥- شاي البابونج و شاي و المريمية .

٦- عطر جوتشي فلورا الوردي جورجس جاردينيا .

٧- عطر فيكتور اند رولف بون بون .

٨- بودي واش من سانكتشوري بالريحة الاساسية حقهم احبها ريحة استرخاء .

٩- بودرة ماركس أند سبنسر برائحة الماغنوليا .

١٠- برايمر العين من ايسنس .

١١- مزيل مناكير بوتس خالي من الاسيتون .

١٢- بطاطس بالملح البحر من coop جالسة أكل منه دحي مرا يجنن  .

١٣- بلانر ٢٠١٧ من بان دو .

١٤- كوكيز سالتيد كارميل .

١٥- لوشن فازلين للبشرة الجافة بدون رائحة .

١٦- ماسك الفحم من اورجينز .

١٧- اندومي بنكهة الخضار كنت احسها مو حلوة و لمى جربتها وقعت في غرامها  💖.

صور من يوميات ٢٠١٧ سويتها السنة الي فاتت في السناب هذي السنة حبيت أنزلها كمان في المدنة .






٢٠١٧ سنة جداً جميلة بالنسبة لي انتهت بحلوها و مرها💕 و كمان أيامها كانت تمر بسرعة البرق و بإذن الله سنة ٢٠١٨ تكون أجمل للكل 💕 متفائلة جداً أحسها حتكون سنة إنجازات و جميلة بإذن الله لي و لكم دحين حشوف 🎇 و اروح أشوف ورقة الأهداف و شكراً لك لأنك وصلتي لآخر التدوينة 💗 و شكراً لكل الي يتابعوني في المدونة ، تويتر ، سناب شات أو انستجرام و شكراً للبنات اللطيفات في الانستجرام الي سرنا دايما نتكلم مع بعض تعليقاتكم و كلامكم يسعدني و يصنع يومي 💗 و كل عام و أنتم بخير happy new year 💗🎉🎇.



تابعيني على شبكات التواصل الاجتماعي : 


snapchat
أو


و عشان توصلك التدوينات أول  بأول على المربع الأزرق الي مكتوب فيه متابعة 💗
 photo sig_zpsnzw9exvy.jpg

15 comments:

  1. تصويرك جداً جميل عجبني كثير تصويرك للقمر والغيوم وكل عام وانتي بخير وإن شاء الله 2018 تكون سنة جميلة سعيدة وأفضل، بالتوفيق.

    ReplyDelete
    Replies
    1. يارب سنة سعيدة على الجميع 💕

      Delete
  2. ياه لولا ياجمال التدوينة وياجمال كتابة الذكريات
    تحمست اكتب معك تفاصيل سنواتي ..
    سنتك سعيدة يارب ♥️

    ReplyDelete
    Replies
    1. ان شاء الله هذي السنة إبدأي أكتبي 😍 ، يارب سنة سعيدة على الجميع 💞

      Delete
  3. الللااااه حبيت تجميعك للصور وحبيت التدوينة بكبرها تحسينها تختصر 365 يوم 😍 ما ألومك لمن تغمرك المشاعر فجأة
    صراحة من أجمل الأشياء اللي حصلت في 2017 إني تعرفت فيها عليك لولا وعلى مدونتك الجميلة 💖

    وبإذن الله هالسنة بتكون أجمل وأسعد وتجمعين فيها ذكريات أجمل 💕

    ReplyDelete
    Replies
    1. حياتي و الله 😩 حتى إنتي من أجمل الأشياء الي سارت لي إن شاء الله نبقى دوم صحبات 💕 و يارب تكون سنة حلوة على الجميع

      Delete
  4. واااه جمال التدوينة والملخص الحلو 🙊💖💖 بس لحظة لحظة توك تكتشفين اندومي الخضار ؟!! ضاع نص عمرك 😂😂 حطي ليمون معه عشان ما تفقدين اللحظات الحلوة اللي كذا 🌚🎈

    ReplyDelete
    Replies
    1. تخيلي 😂 مدري ليش كنت احسها نكهة مو لذيذة عاد أنا أحب الحامض يبغى لي أجرب 😋

      Delete
  5. أحب الحماس والمشاعر الحلوة ان شاء الله دايم مبسوطة يا لولا وشكرا انك شاركتينا هذي المشاعر الحلوة الله يوفقك يارب💐

    ReplyDelete
    Replies
    1. شكراً 💕 الله يوفق الجميع 💕

      Delete
  6. حبيت مررره اهتمامك لتصوير القمر والغيوم جديد عليا صراحه بس لطيف جداًموفقه عقبال ١٠ سنين مع مدونتك

    ReplyDelete
  7. تدوينة لطييفة جدًّا، حبيت المشاعر الحلوة اللي فيها والامتنان للحظات الحلوة، حبيت التفاصيل اللي ذكرتيها واللي متذكرتها ومبسوطة فيها، نقلتي لنا مشاعرك الحلوة من خلال كلامك، وكمان التغذية البصرية لصور السحب والقمر، الله يجعل حياتك مليئة باللحظات الحلوة والسعادة والفرح.

    ReplyDelete