تجربتي لمنتجات sanctuary spa ( السبا في البيت 💆🏽‍♀️)

Monday, March 26, 2018


صباح/ مساء الشتوية الجميلة  ❄️ الي مدري متى حتخلص 🙄 حرفياً أطول شتاء يمر علي الربيع بدأ و الجو شتوي 🌬 بس مو مشكلة احب البرد ☃️ و أحب أجواء الشتوية الدافية 😴 💖 و تدوينة اليوم عن منتجات برائحة دافئة و ترخي الأعصاب مناسبة جداً للشتاء من براند اسمها sanctuary spa منتجات تابعة لسبا بريطاني  أنشأ عام ١٩٧٧م  خلوني احكيكم عنه شوي 👩🏻‍🏫


السبا سواه واحد لزوجته البالرينا من حبه 💑 لها قرر إنه يسويه عشان يكون لها مكان للراحة و الاستجمام و كان مكان هادئ لراقصات الباليه 👯‍♀️حق دار الأوبرا الملكية للاسترخاء و الاستجمام و يستخدم فيه منتجات خاصة فيه بتركيبات فاخرة ✨ مستوحاة من السبا و طورت من قبل معالجين مختصين و في عام ١٩٨٨م أطلقت مجموعة Sanctuary Spa body care منتجات غنية بالزيوت و الزبد و عطرهم المميز الخاص و في عام ٢٠١٤و بعد ٣٧ سنة من تدليع الناس 🧖🏽‍♀️ سانكتشري سبا قفل 💔 شوفوا الصور مرا يجنن 😻 و كمان نسائي و صح معنى سانكتشري الملاذ الآمن 💕.

عرفت البراند هذي قبل ٤ أو ٣ سنوات كانت جديدة في النهدي و شكلها مرا عاجبني بس ما جربتها و ما فكرت أجربها لأني ما كنت أعرف عنها شي و ما في تنوع في المنتجات و سعرها مرتفع أذكر السكرب كان ب ١٠٠وشي و في شتاء ٢٠١٦ لمى سافرت لقيتها في بوتس و منتاجتهم مرا متنوعة من منتجات العناية بالجسم و الاستحمام و للعناية بالبشرة حتى شموع موجودة و أسعارها معقولة فرق كبير بين الأسعار لأنها عاجبتني أخذت لي من عندهم سائل استحمام أجربه و من بعده وقعت في غرام هذي البراند عاد أنا من النوع الي إذا عجبني منتج من براند خلاص أسير أحبها و big fan لها و في شتوية ٢٠١٧ رجعت اشتريه بس لقيت عليه عرض وقت الكريسماس مع منتجات ثانية فأخذته عشان أجربهم امتع نفسي بالريحة الجميلة .

whether you have 30 seconds or 30 minutes simply relax, breathe & letgo to Find Your Sanctuary
هذي الجملة حاطينها في منتجاتهم مرا عاجبتني 🧡 .


: Sanctuary Spa body wash

أول منتج راح أتكلم عنه و هو الي خلاني أحب هذي البراند و وقعت في غرامه من ديسمبر ٢٠١٦ سائل الاستحمام أو غسول البشرة  body wash معزز بحبيبات الجوجوبا من مكوناته جلسرين ، زيت خروع ، زيت بذور الجوجوبا، زيوت عطرية أحب ترطيبه و كيف يخلي البشرة ناعمة و يديني إحساس بالإنتعاش و النظافة و أهم شي الريحة 👌🏼😴 ريحة منتجاتهم عشق ما أعرف ايش هي بالضبط نفسي أعرف ايش هي أحس فيه شي من الحمضيات و ورد ممكن ياسمين مدري 🤯 بس انها تروق و فعلاً حق إسترخاء، العلبة حقه بلاستيك شايفين كيف شكلها يجنن مرا حبيت التعليب الجديد فخم مرا أحلى من الي قبله 🤩 حجمه ٢٥٠ مل الشي الي مو عاجبني فيه لمى سار الكمية نص العلبة سار ينزل بصعوبة لو كان ضغاط أفضل مكتوب إنه الريحة تطول بس هي حدها ساعة ساعتين بالكثير . 


: Sanctuary Spa body scrub
مقشر يومي خفيف بالخفاف الطبيعي 🌋 و الزيوت العطرية، المقشر قوامه جل خفيف و تقشيره جداً خفيف و ناعم البشرة و لأنه مكون من زيوت فيخلي البشرة ناعمة أحسه كأنه سائل استحمام بحبيبات تقشير أكثر من إنه مقشر و لمى استخدمه يرغي برضوا زي الغسول الريحة الجميلة الي ترخي الأعصاب و أحسه يعطيني إحساس الي البشرة تتنفس و إنتعاش، حجمه ٢٠٠ مل بالنسبة لي أحس ما راح أرجع أشتريه كمقشر إذا جا مع منتجات ثانية ممكن أخذه لكن لحاله في مقشرات كثير أحسن بس الي تحب المقشرات اليومية ممكن يعجبها أو الي بشرتها جدا حساسة ما تتحمل مقشرات السكر كمان حيعجبها لأنه مرا خفيف .


: Sanctuary Spa wet skin moisture miracle
فكرة اللوشن جديدة علي و مرة حبيتها تستخدميه وقت الشاور 🚿  آخر خطوة قبل لا تلبسي المنشفة و البشرة لسى رطبة  قوامه زي الحليب مرا سايل و خفيف ريحته نفس أخوانه بس هو الأكثر ثبات للأمانة قبل لا أجربه كنت أقول مستحيل يرطب و كل الي أحطه لمى انشف جسمي أكيد حينمسح بس صدمتني النتيجة و مرا حبيتها 👌🏼😍 ترطيبه حلو و تمتصه البشرة بسرعة و تبان النتيجة من أول أستخدام من جدا ما أبالغ حبيت فكرته مرا حلوة للناس الي ما عندها وقت و دايماً مشغولة و حسيته مرا حلو في السفر لأنه شي بسرعة و أصلاً دايما أطباء الجلدية ينصحوا بترطيب البشرة و هي ندية لأنها تكون تمتص المرطب بشكل أسرع 🤷🏽‍♀️ صح و مرا مرا منقذ في البرد خلاص يسير ع طول أخلص الشاور و ألبس عشان اتدفى و ترطيبه حلو سانكتشري سوا دراسة 🕵🏽‍♀️ل ٢٣٦٠ امرأة و نتيجتها كانت إنو ٦٥٪ من النساء ما يرطبوا بشرتهم بشكل يومي و نصهم كان السبب إنهم مشغولين عشان كذا سوا هذا المنتج للنساء الي ما عندهم وقت و كمان في العلبة حقه كاتبين إنه ٧٧٪ من النساء اتفقوا إنه اسرع من و تأثيره أفضل من اللوشن العادي، حجمه ٢٠٠ مل، بالنسبة لي حبيته و راح أرجع اشتريه بس ما راح يكون المرطب الأساسي في روتيني حيكون شي إضافي أو للطوارئ إذا مستعجلة أو في السفر .



: Sanctuary Spa heel balm and foot polish 

بلسم الكعب : أممم ما شفته شي واو لا عادي الشي الي حبيته فيه إنو خفيف ينفع للصباح و ترطيبه كويس و ريحته حلوة نعناعية منعشة 🍃بس جربت أحلى و أرخص . 


المقشر : 
لأني أحب مقشر بودي شوب سويت مقارنة بينهم لمدة خمسة أيام،
تقريباً متشابهين اثنينهم أساس التقشير فيهم حجر الخفاف 🌋و من مكوناتهم الرئيسية الزيوت العطرية و النعناع أسعارهم قريبة من بعض نجي للفرق بينهم، بودي شوب ريحته نعناع أكثر و لمى استخدمه شعور الإنتعاش منه أكثر أما هذا كأنه نعناع و ريحة زي الديتول على ليمون أخضر 😅 بس برضو منعش . 
مقشر بودي شوب : حبيباته جداً ناعمة و يسوي رغوة و منعش أكثر و بارد 🌬 ، الحجم ١٠٠ مل .
مقشر سانكتشري : حبيباته مقارنة بحق بودي شوب أخشن منها بس برضو ناعم مو قوي المهم، حبيت تقشيره أفضل من حق بودي شوب بثلاثة درجات  و بعد ما استخدمه ملمس القدم ناعم أكثر من حق بودي شوب أحس يبين إنه في زيوت، حجمه ٧٥مل . 
بالنسبة لي مقشر القدم أعتبره شي إضافي للدلع فما يفرق معاي عادي أي واحد منهم أهم شي شعور الإنتعاش 😴. 

: Sanctuary Spa hand cream

كريم اليد من مكوناته زيت اللوز الحلو و زبدة الشيا مافيه شي مميز و يخليه واو ترطيبه زي أغلب كريمات اليد و حبيت فيه إنه مايدبق و تمتصه البشرة بسرعة . 


: Sanctuary Spa eau de toilette

يعني أوكي مرا عاجبني ريحة منتجاتهم حق اللاين الأساسي بس مو معناته إني كمان أتعطر بعطر نفس الريحة 😂 فخليته لمفرش السرير 👌🏼 العطر حجمه ٢٥ مل .
و هذي كانت تجربتي للمنتجات و أكيد راح أجرب منتجات ثانية منها أبغى أجرب منتجات العناية بالبشرة حقهم و مقشر السكر كثير يمدحوا مقشر الملح حقهم بس أتحسس من الملح ما أقدر أجربه قولوا لي ايش أكثر منتج عجبكم و إذا سمعتوا عن البراند هذي قبل كذا أو جديدة عليكم و إذا جربتوها أو لا 💞.

تابعيني على شبكات التواصل الاجتماعي : 



و عشان توصلك التدوينات أول  بأول على المربع الأزرق الي مكتوب فيه متابعة 💗





 photo sig_zpsnzw9exvy.jpg



No comments:

Post a Comment