ما كنت ناوية اكتب هذي السنة تدوينة نهاية العام بس قررت اجلس و اكتب الي يجي في بالي بحكم اني أول ما بدأتها قررت تكون تدوينة سنوية و راح استمر عليها بإذن الله💪🏼، فعلاً الأيام تعدي بسرعة و هذي سادس سنة أكتب تدوينة نهاية العام😿💖.
٣١ ديسمبر ٢٠٢٠ الساعة ٦:٣١ مساءاً
أقدر أوصف هذي السنة بجملة بسيطة...
(سنة العقبات و الضياع و رحلة اكتشاف الذات).
ما زلنا في زمن الكورونا 🦠و حالياً ظهر فايروس كورونا جديد، لكن الحمدلله تم ايجاد لقاح للوقاية منه و بإذن الله راح اخذه.
٢٠٢٠ أغرب سنة
بدايتها كنت متفائلة حتى لمى جات الكورونا و شعور الخوف و القلق و جا الحظر حاولت استغله بطريقة ايجابية و رجعت اتعلم اخذت دبلومة و استغليت الدورات المجانية و اخذت دورات في مجالات أحبها و رجعت اشتغل بحماس بعد توقف سنة تقريباً بعدين على جولاي بدأ الحماس يقل و المزاج يتغير مريت بمرحلة مشاعر و احاسيس غريبة 🤯 كنت أحس اني ضايعة و ما عندي أي هدف حقيقي في حياتي فترة انتقاد للذات و عدم اقتناع ☠️ و لقيت نفسي رجعت لدوامة بذلت جهد قبل عشان أطلع منها و لمى شفت أنه نفسيتي كل مالها و تسوء قررت إني أوقف السوشيال ميديا و حتى التدوين 👩🏽💻 كنت ناوية هذي السنة أدون أكثر و مسوية القائمة للمواضيع بس ما قدرت أكتب المهم بعد ما وقفت السوشيال ميديا حسيت اني حتى الشغل مالي نفس فيه و مو قادرة و برضوا وقفته و بعدين قررت انه أعيد ترتيب أولوياتي و أركز اهم شي على راحتي و سعادتي وارجع من جديد اركز على selflove و ال mental health بديت من نوفمبر حبة حبة الين ما الحمدلله أنا حالياً حياتي تعتبر منظمة و جالسة أسوي أشياء احبها بدون ضغوطات و سعيدة جداً الحمدلله يارب دائماً كلنا نكون سعيدين و مرتاحيين، لسى أعاني من كثرة الأحلام الي ما تخليني أرتاح في نومي تكلمت عنها أكثر من مرة في تويتر و في بنات ما قصروا عطوني حلول بس ما انحلت و ناوية ان شاء الله ابدأ اسوي تأمل 🧘🏻♀️ قبل النوم أو الصباح يقولوا يخخف من الأحلام جربت قبل فترة بس ما استمريت و ما شفت فرق.
من الأشياء الي تعلمتها في ٢٠٢٠
طبيعتنا كبشر نقدر نتأقلم مع الظروف.
استشعر نعمة كل لحظة في حياتي💖.
اصنع من اللاشئ شئ✨.
استغل الفرص و أحارب الخوف و التردد💪🏼.
التعلم باستمرار و حب الاستطلاع إلا ما يفيدني يوم👩🏻🏫 .
ما اضغط على نفسي في شي و اسمع لها🥳.
رحلة البحث عن السعادة قد تكون طويلة و لكن في النهاية تجنى ثمارها🍃.
فاصل: و أنا جالسة اكتب فجأ اسمع صوت مويا قوي تطلع مطر قوية حلوة رحت استمتع فيها و رجعت اكمل كتابة المطر عطتني طاقة ايجابية و تفاؤل بانه السنة الجديدة بتكون سنة خير و أفضل بإذن الله 💖.
نرجع للأشياء الي تعلمتها
تقدير نعمة وجود الأهل و العيش معاهم💗.
علاقة فيها مجاملات كثير و تحسس ابعدي عنها.
ما أحب الروتين بس لمى يكون في وتين يومي يكون منظم و استفيد من الوقت أكثر.
كل تجربة امر فيها تكون مفيدة حتى لو فشلت بالعكس تعطيني دافع و تجهزني للتجارب الجديدة.
أهداف ٢٠٢٠:
كمان هذي السنة ما كتبت أهداف بس كنت احط كل شهر هدف ديني و صحي و تعليمي و مادي و مرات أعيد نفس الاهداف بعد كم شهر أهم شي تكون واقعية و اقدر اسوئها حبيت هذي الطريقة أكثر من طريقتي السابقة و تحقيقها اسهل و ابسط، بالنسبة للمدونة و حسابات السوشيال ميديا كانت عندي افكار لها و مواضيع كنت ناوية اعوض في المدونة عن السنة الي فاتت بس ما قدرت بإذن الله ٢٠٢١ راح انزل من ١-٣ تدوينات في الشهر، الباقي زي ما قلت لكم قبل كان اهم شي عندي صحتي النفسية و روقاني و فعلاً لمى خليتهم اهم هدف لي و بعدهم عيلتي و بعدهم باقي الأشياء ارتحت كثير و حسيت اني انجزت.
ايش سويت في 2020
غير الي ذكرته فوق وزني كان يزيد و يقل و يزيد و يقل و هكذا 😅 و كمان جربت اسوي حنا لشعري أول و آخر مرة كان مرة زمان و مرة عدمت شعري هذي المرة أيام الحجر سويت خلطة قناع الشعر المعجزة و مرة حبيتها سويتها 4 مرات تعطي لون حلو للشعر و لمعة و جربت جل بذور الكتان مرة حلو و ناسبني أممم تعمقت في عالم الوثائقيات و حبيتها🎬، تقريباً رجعت قطعت المشروبات الغازية و ابدعت في المخبوزات أثناء فترة الحجر فطاير و عيش كنت تقريباً يومياً اسوي 🥐🍞🥖.
مفضلات عشوائية:
١-كريم الجسم من بوتس.
٢-سائل استحمام من فلكسيتول.
٣-كريم القدم من فلكسيتول أحبه عشان فيه يوريا.
٤-شامبو و بلسم الترا دو بالافوكادو و الشيا.
٥-حلاوة أبو بقرة ( قديمك نديمك).
٦-عطر قوتشي بامبو
٧-بودرة مسك من حمام الهنا.
٨-تنت ايتود هاوس يجنن مرة يا بنات انصح فيه و بشدة.
٩-سيروم ملتي ڤايتمن من دايركتا لاب مرة مرة أحبه.
١٠-كريم ليلي كمان من دايركتا لاب و أحبه تكلمت عنهم هنا.
١١- مويا بالليمون.
١٢- ماسكرا حواجب شفافة من ريميل لندن.
١٣-قلاية فيليبس الهوائية.
١٤-مقشر الوجه من يور جود سكن.
١٥-سماعة بوس اللاسلكية.
١٦-معطرات المفارش من كراميل .
١٧-تطبيق canva للتصميم.
١٨-تطبيق UNUM لترتيب فيد الانستجرام لي 3 سنين تقريباً استخدمه و مرتاحة عليه.
١٩-تطبيق one note.
٢٠-ماسك السدر كتبت طريقته هنا.
في الختام كل عام و أنتم بخير و سنة سعيدة على الجميع 😘💗
تعليقات
إرسال تعليق