السلام عليكم و رحمة الله و بركاته
كيفكم بنات ؟ و كيف تجهيزكم للدوامات ؟
قبل 5 ايام رحت السوبر ماركت و اشتريت منتجات دايم اشوف عليها مدح سواء في الانستجرام او البلوق .
من بالمرز ..
زبدة الكاكاو مع فيتامين هـ
كثير يمدحوها انها توحد لون البشرة و ترطب البشرة و تزيل التشققات و الندبات ، سعرها 24 ريال .
رأي البدائي فيها : ما حبيت ريحتها أبد بس حبيت انو البشرة تمتصها بسرعة و ما اصدق انو يزيل التشققات ممكن يخففها ، اختي مرا خقت عليه و على ريحته كل شوي تسوي منه لول .
لوشن الكاكاو و فايتمين هـ من بالمرز
نفس الزبدة بس على لوشن ريحته اخف من الزبدة الزبدة احس من ريحتها النمل حيجي فيني ههههه كاتبين تنعم و تصقل البشرة الجافة و العلامات و الندوب نفس الي قبلها يعني ، سعرها 24 ريال
رأي الاولي فيه : امم صراحة مدري ما جربته الا مرا وحدة و حسيت الزبدة احسن ترطيبها سريع بس شفت كثير يمدحون الاثنين مع بعض .
حلاوة ازالة الشعر من فيم
ما دري كم سعرها لأني من زمان اشتريتها مرا ما عجبتني شعري طلع في أقل من شهر و طلع مرا كثير يعني المفروض لمى انتف الشعر يطلع بعد شهر و شوي شوي هذي لا على طول طلع زي الموس ، و جسمي تحسس منها يمكن عشان بالعود .
سائل استحمام من برجوا
كتبت عنه قبل كذا وقلت انه عاجبني لانو خالي من الباربين ، الذهبي مقشر الأحلام ( dream scrub ) حبيباته جدا ناعمة و صغيرونة هههه و ريحته مرررا تجنن كذا ريحة فخمة راقية سلكوا للوصف هههههه و البنك زدني جمالا ( beautify me ) ريحته جاية ورد على بودرة مدري كيف بس ريحة كيوت هههه و البرتقالي ايقظني ( wake me ) ريحته حمضيات يجنن ♥ ♥ ، سعره تقريبا 18 ريال .
زيت bio-oil
زيت بايو اويل اشهر من نار على علم ان شاء الله المثل كذا صار من مشاهير الانستا كثير مرا تكلموا عنه و خلطوه مع اشياء كثير بس أنا اخلط منتجات مع بعض بس الزيوت الطبيعية عادي ، هالزيت يوعد انه يعالج مشاكل البشرة و الي هي ( الندوب - علامات التمدد - تفاوت لون الجلد - الجلد الهرم - الجلد الجاف ) ، من مكوناته فيتامين هـ و ا و زيوت الاذريون ز الخزامى و اكليل الجبل و البابونج عشان كذا البعض يسميه الزيت المعجزة يوعد انه بعد 3 اشهرعلى الاقل من الاستخدام تبان النتيجة ، سعره الصغير 60 مل ب 40 ريال .
انطباعي الاول له : ريحته حلوه في ريحة زي ريحة اللافندر حلو يجيب الاسترخاء يمكن البعض ما تعجبه و كاتبين انه سريع الامتصاص و من جد سريع الامتصاص .
شامبو و بلسم غارنييه الترا دوكس
الشامبو بزبدة الشيا و زيت الافوكادوللشعر الشديد الجفاف و المجعد و برضو مرا اشتهر و سوا ضجة و الكل يمدحه الى الان ما شفت شي سلبي عنه و الحلو فيه انه خالي من الباربين و السيليكون ♥ ♥ ♥ ، سعره الشامبو و البلسم نفس السعر 15 ريال للواحد .
رأي الاول فيه : استخدمت الشامبو 3 مرات بس و حبيت انه خالي من السيليكون و الباربين ، دايما الشامبوات تخلي الشعر ناشف بس هذا لا و عيبه انو ريحته قوية مرا بالنسبة لي ما حبيتها بس ما تعيب اني استخدمه لانو مرا عجبني ♥ ♥ و انا استخدمته كثير و كمان ما يصفي مزبوط طبعا عشان ما فيه سيليكون و ان شاء الله يبقى كذا ما يتغير بعد فترة زي باقي الشامبوات .
بديل الزيت من لوريال
مدحته لي صديقتي خصوصا انو شعري كيرلي و شفت كثير بلوقرز مدحوه عجبني انو له كذا طريقة تقدري قبل الشاور او بعده او خلاله او لمى تسرحي شعرك و حجمه حلو و كمان فيه ارجان حبيب الكل ♥ قلت اتوكل على الله و اشتريه ، سعره 18 ريال
الانطباع الاول : اول شي خليت بابا يستخدمه قبلي لول لا تستغربوا اصلا ما سرت مهوسة بالمنتجات و العناية الى منو الله يطول بعمرو ، مرا عجبه من اول مرا قال مرا رطب شعره و عطاه لمعه و بعده اتشجعت اجربه لانو ولا مرا اشتريت منتجاتهم و احسها مو مرا بس طلعت غلطانة ليتني اعرفه من زمان ♥ ♥ احلى من حق بانتين بكثير مرا زمان اشتريت حق بانتين مرا ما عجبني بس دا لا كويس .
غسول الفم ليسترين زيرو
احسن غسول للفم بالنسبة لي جربت انواع كثير بس هذا احسنهم فيه هذا و في زيه وردي او موف ما حبيته حسيت انه ينشف الفم و هذا منعش اكثر ، سعره 24 ريال .
المنتجات الجديدة حكتب عنها اكثرفي الانستا بعد ما اجربها اقل شي 3 شهور باذن الله ، هذي كانت مشترياتي المتواضعة اتمنى تستفيدوا و احبكم ♥ .
جربت شامبو غارنييه ، ماحسيته ناسبني ،، شعري ناعم ودهني حسيته دهّنه زيادة .
ردحذفبديل الزيت احطه ع أطراف شعري لما احط سدر يرطبها ، مرا جميل ..
❤