خطوات لتعلم الميك اب من اليوتيوب و زيادة اشياء

السلام عليكم بنات ... كيفكم ؟ 

من زمان عن التدوين اخذت اجازة قصيرة 

كثير مننا حابة تتعلم كيف تسوي ايلاينر او كيف تسوي ظل او كيف تسوي كونتور او  او ... الخ اشياء المكياج ما تخلص هههههههه و ما عندها احد عندو الخبرة الكافية عشان يعلمها او في عندها احد يعرف في شغلات الميك اب بس ما يعرف يشرح او يسوي لاحد  ( دي  سارت لي  هههههههههه ) او تبغى تدخل دورة بس ما عندها خلفية فين دورات المكياج او ما ناسبها السعر ، خلوني اكون صريحة معاكم أنا حالي من حال أغلب البنات الي في عمري ما اسوي الا الأشياء البسيطة الي هي كحل ومسكرا و فاونديشن و ايلاينر و هالشغلات بس دحين الوضع تغير بما اني ماخذه هالسنة اجازة قلت خليني اتعلم شغلات جديدة في المكياج و ما اقدر اخذ دورة لأنو مسجلة في معهد إنجليزي و ما اعرف شي عن دورات المكياج في جدة فقلت خليني اتعلَّم من اليوتيوب كيف اسوي ظل و اتعلم كيف اسوي الايلاينر مزبوط و اشوف اي رسمة تناسبني و كمان في اشياء كثير حسيتها مهمة في الميك اب و تعتبر من الاساسيات الي المفروض اهتم فيها زي الاندرتون مثلا صراحة ما كنت اعرف عنه وكنت استخد اي فاونديشين هوا كان مناسب لي بس لمى شفت و قريت عن الاندرتون لقيت الانسب عارفة اني ما جبت شي جديد في اليوتيوب ، بس سبحان الله ممكن افيد بنات و ان شاء الله افيدكم و لو بشي بسيط ❤️، راح أتكلم اليوم عن طريقتي في تعلم الميك أب من اليوتيوب و الفيديوهات الي شفتها سهلة و الشرح فيها مبسط يا حبي للفيديوهات الي كذا ما أحب الي فيها خطوات كثير و اخر شي ان شاء الله راح أحط حسابات او قنوات أحب اشوف فيديوهات الميك أب عندهم ❤️ .

طيب أنا سار لي تقريبا ثلاث شهور وانا اتعلَّم من اليوتيوب كيف أسوي الآي شدو و قبل كنت اتعلَّم كيف أسوي الآيلاينر و الكونتورينق ( لمى تعلمت الكونتور طلع الستروبينق 💔 😂 )، من وجهة نظري إنّو الستروبينق مو بديل للكونتورينق و الكونتورينق تكنيك اهم من الستروبينق ( حسيت أني ميك أب ارتست ههههههههه من جد دي وجهة نظري قولوا لي إِيش وجهة نظركم في الكومنت ؟  ) ، يلا نبدأ 



1- تحددي انتي ايش تبغي تتعلمي من اليوتيوب بالنسبة لي اهم شي انو تكوني عارفة ايش تبغي بالضبط عشان يكون سهل عليك البحث و افضل تحددي ايش تبغي بالتفصيل يعني مثلا تبغي تتعلمي رسمة ايلاينر معينة او مثلاً السموكي اي شدو .



2- معرفة اندرتونك و السكن تون اهم ممكن بعضكم يستغرب ايش دخل الاندرتون في اليوتيوب راح تعرفوا في النقطة الي بعدها و هذي فيديوهات عشان تعرفوا ايش الاندرتون حقكم . 

لمى فتحت اليوتيوب عشان احط الفيديوز شفت دا الفيديو حق دلال الدوب تقريباً نفس الكلام الي حكتبو هههههههه ممكن الفيديو احسن من الكتابة بالنسبة للبعض ❤  

الخطوة 3 و 4 متشابهة 

3- حاولي تشوفي يوتيوبر نوع بشرتها زيك يعني انا مثلا وجهي دهني اشوف يوتيوبر زيي بشرة وجها دهنية مثلا بشرتي حساسة و دهنية برضو احاول اشوف وحدة زيها او اتحسس من مواد معينة ممكن كمان تلاقي وحدة نفسي بالضبط و ممكن تقريبا يكون نفس نوع بشرتي ، بس اذا انتي بشرة وجهك حساسة لازم تعرفي ايش المواد الي تحسسك .

4- بعد ما حددتي ايش تبغي تتعلمي جاء دور البحث عن اليوتيوبر الي تشبهك يعني مثلا تبغي تتعلمي كيف تسوي كونتور و وجهك بيضاوي شوفي وحدة وجهها بيضاوي و لون بشرتها زيك او قريب منه عشان تعرفي ايش الدرجة الي تناسبك و مثلا تبغي تتعلمي ايلاينر و تبغي تعرفي ايش الرسمة الي تناسب عينك تشوفي وحدة عينها زي عينك او تكتبي مثلا ايلاينر للعيون اللوزية او النعاسة او اي شكل عين وكذا.

و كمان لمى تتعلمي من يوتيوبر لون بشرتها زيك و نوعها زيك  يساعدك لمى تشتري يعني مثلاً اذا مدحت فاونديشن و هي لون بشرتها زيك و نوعها زيك حتعرفي انو احتمال كبير يناسبك . 

ملاحظة : الاشكال الي في الفيديوز هذي الاساسية او المنتشرة او المعروفة المهم يعني الي اكثر الناس فيهم بس في ناس و مو شوة شكل الوجه يكون غير هذول الخمسة ❤ . 


5- عشان انتي لسى تتعلمي احسن تشتري مكياج رخيص ( مكياج الدرق ستور ) و يكون عادير مو ضد الموية (  watreproof )  انتبهوا يكون مكتوب فيه دي الكلمة بالنسة لي احسن عشان انا حتعلم فحمسح كتير لكن اذا تعرفي عادي تشتري شي ضد الموية .



6-  واخيراً و ليس آخراً التدريب ثم التدريب ثم التدريب لازم تتدربي كل ما كنتي فاضية او طفشانة شوفي و طبقي مع التكرار راح تتقني بإذن الله ❤  . 


هذي بعض الاشياء الي اشتريتها عشان اتعلم و كلها رخيصة 


بيبي كريم غارنيه حلو سعره تقريبا في 30 ريال البيبي كريم و الفاونديشن ما يحتاج نشتري ارخص الانواع لانو سهل فكل وحدة تستخدم الي تحبة بس انا اشتريت غارنييه عشان لمى اتعلم احب احط بيبي كريم 

و الكحل برضو نفس الشي حسب النوع الي تحبيه انا احب اكحال ان شاء الله كذا جمعها ههههههه مكياجي لانها ثابتة 

و البرايمر و الكونسيلر برضو اي نوع تحبوه ❤ 


البودرة اشتريتها عشان الكونتور بس ما استفدت منها ههههه بس جيدة تنفع يومية بس حق ريميل احسن ❤ 

البلاشر بلشرات افون جميلة و اسعارها حلوة 

حبيت دا الفيس باليت حق اتش اند ام الاضاءة الي فيه احسن شي

الاي شدو الهدف الاساسي ❤ 
اشتريت دا برضو من اتش اند ام يمشي حالو ما يوضح الى لمى احط برايمر او ابلل الفرشة بشوية موية عندي انواع غير و فيه باليتس باسعار حلوة زي حق ريميل مثلاً او فلومار 

نسيت اصور سعرو بس كا في حدود 39 ريال 

الفرش 

برضو فرش اتش اند ام حلوة جودتها و اسعارها حلوة ❤ بس المشكلة ما عندهم كل الانواع الفرشة البيضة مرا حبيتها للدمج ❤❤

ايلاينر كاراجا مرا حلو للتتعلم لانو ينمسح على طول و سعر في حدود 40 ريال 

اخر شي الماسكرا عن نفسي اشوف ارخص ماسكرا و حلوة ميبيلين نيويورك و هذي الي انا استخدما تبع بورجوا حلوه و مرا حابتها بالذات على رموش الجغن الي تحت ❤❤ 

زي ما قلت بداية البوست دول القنوات الي احب اتابعهم حق المكياج 

Teni Panosian مكياجها مرا يعجبني و سهل تطيبقه ❤

Michelle Phan برضو مكياجها يعجبني و المنتجات الي تتكلم عنها 

Carli Bybel دي my fav مرا احب مكياجها و المنتجات الي تتكلم عنها ❤

Dulce Candy نفس الشي

Babylailalov

NikkieTutorials زي الباقيين احب مكياجها و الاشياء الي تستخدمها  

Tati هذي قناتها مفيدة للي تبغى تشتري مكياج مجربة كل شي ما شاء الله هههههههه 

Wayne Goss  برضو my fav نصايحه مرا حلوه و مفيدة و ما يتكلم كتير زي البنات ههههههه ❤ 

LustreLux برضو حلو مكياجها ❤ 

KathleenLights على انو كلامها كتير هههههه بس still one of my fav و اثق في الاشياء الي تتكلم عنها ❤ 

Katerina Beauty Blog عينها و لون بشرتها و مكياجها حلو ❤

و في كتير غيرهم بس دول اكتر شي احب اشوف فيديوهات الماكياج حقهم قولوا لي ايش القنوات المفضلة لكم في اليوتيوب سواء مكياج أو غيره في الكومنت ، وهنا اقول خلص البوست وان شاء تستفيدوا منو و يكون دليل لكم للتعلم من اليوتيوب للي حابة تتعلم و احبكم اينما كنتم ❤ ❤ وكل عام وانتم بخير ولو انها متأخرة ، و ان شاء الله سنة خير على الجميع ❤ ❤ 

تحديث 7May 2017: رابط الموقع الي تكلمت عنه في السناب شات هنا فكرت الموقع هي إنك تدوري على يوتيوبر و بلوجر مشابهين لك مثلاً نفس لون البشرة أو نوعها أو رسمة العيون .