تحدي المكياج ب ٣٠٠ ريال

Thursday, March 24, 2016


السلام عليكم و رحمة الله و بركاته ..





مساء \ صباح الجمال 




اليوم مرا متحمسة للتدوينة 😍 لانو من زمان  نفسي اعمل كولاب  مع مدونات و لمى اقترحت المدونة مسك الفكرة على طول وافقت 
الكولاب عبارة عن تحدي مكياج كامل للوك يومي صباحي أو مسائي بقيمة ما تتعدى ال ٣٠٠ ريال و الهدف من التحدي نثبت انو في منتجات رخيصة و جودتها ممتازة زيها زي المنتجات الغالية ...حيكون كل يوم بنت او بنتين ينزلوا بوست الين يوم الاربعاء ... 


الجميلات المشاركات في التحدي ❤️ : 


Misk85
Lamia Fahad
Areej
Maya
Do3a mania
Artesian Maha
Jollza
Taiba Glam Blog



اخترت اني اتكلم عن مكياج يومي للخرجات الخفيفة او للدوام  :



اول شي قبل لا احط الفاونديشن احط برايمر او اي كريم مرطب و اخلي البشرة تمتصه من ٣ ل ٥ دقايق بعدين ابدأ .







أول شي أحط الفاونديشن من ريميل لندن اسه ماتش بيرفكشن ماخده درجة اغمق مني بشوي حسيتها تبين كأني مسوية تان المهم الفاونديشن فيه نسبة حماية من الشمس ٢٠ ، ترطيب لمدة ٢٤ ساعة بس ما لاحظت شي لان بشرتي دهنية ، يغطي المسام ، تغطيته من خفيفة إلى متوسطة  ينفع للبشرة  الصافية أو الي فيها عيوب شوية ، شخصياً فيني اثار حبوب في خدي اليسار ما يغطيها تمام ، فيه ريحة عطرية حلوه على انه بشرتي حساسة بس ما تحسست منه و حبيت انه خفيف ع البشرة مخليها تتنفس اول ما احطه يكون ديوي ( نضر ) دقيقة او دقيقتين و يقلب مات مو مرا مات كان البشرة مخملية 😍 سعره ٦٠ ريال من محلات التجميل .






ثاني خطوة بعد ما احط الفاونديشن هي الكونسيلر احطه على آثار الحبوب أو الحبوب إذا كانت في دا الكونسيلر من ال اي قيرل كثير قالوا عنه انه بديل ارخص لكونسيلر ماك برو انا ما جربت حق ماك بس هذا حبيته سعره ٢٠ ريال من تاجرة .






نجي للعين استخدم كحل ماكس فاكتور 030 بني انا احب احط الكحل جوا العين و في خط الرموش السفلية و أحياناً احطه في خط الرموش و جوا العين احط كحل بيج أو نود سعره ٣٠ ريال من محل تجميل .






رابع شي احط الماسكرا هذي مرا احبها من ميبيلين نيويورك اسمها the col ossal go يقال انها تكثف بس انا اشوفها ما تكثفت رموشي لكن تطولها طول حلو و تخلي الرمشه مرا سودا ممكن هالشي يعطي ايفكت الكثافة سعرها ٤٠ ريال من محل تجميل .







نجي للايلاينر هو مو خطوة اساسية ما اسويه كل يوم صراحة حسب مزاجي المهم دا جل لاينر من ايلف سواده فاحم جداً جميل و مات من قلب و حلو سهل الاستخدام معاي له ٣ شهور ولا نشف سعره ٢٠ ريال من تاجرة .










حواجبي استخدم ماسكرا نيكس درجة ايسبريسو امشط حواجبي فيها سعرها ٤٠ ريال نسيت اصورها اشتريتها من تاجرة  .






قبل الاخير بلشر كريمي من كلر بوب اسمه btween the sheets جداً جميل لكل يوم لونه يبين كانه طبيعي سعره ٥٥ ريال من تاجرة .





نختم بآخر شي من مكياجي اليومي أو خليني اقول شبه يومي لأنو مو كل يوم اسويه ، الروج حبيت احط ارواج نيكس لانها اشتهرت مرا و اظن مافي احد ما جربها شخصيا استخدمتها ممكن ٥ مرات و لونين بس الي هم ابوظبي و سكوتهولم حبيت انها كريمية ما تججف الشفايف زي ارواج المات الي مو حلو فيها انها تنشف بعد ٢ الى ٤ دقايق و حبيت انو الالوان واضحة من اول مرا سعرها ٣٠ ريال من تاجرة . 


المنتجات الي من تاجرة كلها من حساب في الانسقرام @glamourbeautysa 
أو من موقعهم هنا

هذي نهاية اللوك اليومي بالنسبة لي اتمنى انكم تستفيدوا و لا تنسوا تشيكوا على باقي المدونات الي نزلوا و انتظروا الي لسى ما نزلوا ❤️ . 

 photo sig_zpsnzw9exvy.jpg

1 comment:

  1. تحدي جمييييل وقوي ، إختيار مبلغ 300 ريال ممتاز ومناسب للكثير ..
    جميع المنتجات المذكورة عليها مدح كبير وهذا يدل ع جودتها بالرغم من رنخفاض سعرها وهذا شيء جميل .. ❤

    ReplyDelete