تجربتي للكيراتين المعالج من اينوار | inoar moroccan hair treatmemnt

Wednesday, April 20, 2016





السلام عليكم و رحمة الله و بركاته 


مساء / صباح الإصرار 



قبل لا أبدا التجربة حابة أقول لكم انو انا قبل ٥ شهور تقريباً سويت بروتين عند كوافيره و للأسف ما ضبط 💔 ، كانت تجربة فاشلة الصراحة و جاني احباط .





انا طبيعة شعري جاف جدا و متقصف و نافش ، زي دي الصورة تقريباً :








ممكن سار لي سنة عندي الكيراتين في البيت من زمان طلبته و كنت حسويه بس اغلب الي حولي شجعوني أسوي بروتين و بعد شهرين من نتيجة البروتين الفاشلة كنت اقنع ماما تسوي لي بروتين مرا تانية المهم و الأسبوع الي فات جا في بالي أسوي الكيراتين الي عندي و أقنعت ماما و قلت لأختي عشان يساعدوني .




الكيراتين الي سويته من اينوار inoar moroccan hair treatment  
يوعد بانه ينعم الشعر و يعطيه لمعه و يرطبه حجمه ٢٥٠ مل اشتريت اثنين و يجي معاه الشامبو و استخدمت واحد بس حتى ما خلص بقي يمكن اقل من الربع و طول شعري الين اخر ظهري  

الأشياء الي استخدمتها : 
- استشوار 
- سيراميك 
- مشط باسنان صغيرة
- كمامة 
- قفازات 
الكمامات ضروري عشان ما تنخنقي من الدخان و القفازات لازم لأنو مرا ينشف اليد . 

تجربتي + كيف سويتو : 

يوم الخميس تاريخ ٣١/٣/٢٠١٦ تحديداً الساعة ٨ ونص غسلت شعري بالشامبو الي جا مع العلاج و بعدين انشغلت و الساعة ٩ وربع غسلت شعري مرا تانية بس خليت الشامبو ٣ دقايق مع مساج في الشعر المفروض اغسل شعري مرتين ورا بعض  بعدين جففته بالاستشوار ما جففته كله لا لازم يكون ندي يعني مبلول بنسبة ٢٠٪ و بعدها قسمت شعري أربعة أقسام و قل قسم يتقسم حسب شعرك عشان تحطي العلاج تمام على خصلة خصلة و بعد ما تحطيه ع الخاصة تمشطي الخصلة بالمشط الي اسنانه نحيفة و قريبة زي الي يُقصُوا فيه الشعر و لازم تحطي العلاج على بعد ١ سم من الجذور النقطة هاذي جداً مهمة عشان لا تنحرق فروتك لا سمح الله خلصت ماما الله يحفظها من شعري الساعة ١٠:٢٠ ولازم اخلي العلاج ربع ساعة ع الشعر ( ١٥ دقيقة ) . 

انا خليته ٢٥ دقيقة و بعدين جففت شعري بالسشوار ما نشف مرا مزبوط ع الساعة ١١ بديت أسوي ستريتنر ( سيراميك ) بس قبل لا أبدا برضو قسمت شعري كيف قسمته ؟ أخذت طبقة صغيرة من تحت و ر فعت الباقي و بديت اول وحدة سويتها ما قدرت عيني مرا دمعت و حرقتني فاستشورت نص شعري لأنو مكتوب في العلاج كدا بس لمى سويت البروتين ما استشورت لي الحرمة و لمى بحثت عن الطريقة بالعربي مو كاتبين خطوة الاستشوار بعد ما استشورت بديت أخذ خصلة خصلة بالستريتنر أمسك المشط بيد و الاستريتنر باليد التانية و كل خصلة أعيد عليها الستريتنر من ٦ الى ١٠ مرات الي استشورته ما سوا دخان كثير و عيني دمعت شوي اما الطبقة الي فوق خنقتني و حرقت عيني من الدخان الي استنجته انو الاستشوار يخفف من الدخان  خطوة المشط ما كملتها للنهاية لانها تاخذ وقت اكثر و شعري ما كان فيه تشابك عكس البروتين لمى حطيت العلاج شعري كان جدا متشابك و الحرمة ما نشطت لي بالفرشة أبدا بس اخر شي الشعر الي قدام مشطته اول بالفرشة و كان ينزل شعر مرا كثير 💔 اما الكيراتين الحمدلله ما نزل شعري أبداً خلصت سرمكة الشعر 😂 الساعة ٣ و نص و خليته اكثر من ٢٤ ساعة للاني انشغلت بس انتبهوا تسوا زيي ، في العلية مكتوب بعد ٢٤ ساعة و في فيديو في اليوتيوب مكتوب بعد ١٥ دقيقة ف الأفضل تخليه من ساعة الى ٢٤ ساعة مقارنة ثانية بين البروتين و الكيراتين لمى سويت البروتين كان شعري يتصلق قبل لا اروشه اما الكيراتين ما كان يتصلق و فيه حيوية و نعومة و الريحة خفت البروتين أظن ما كان فيه ريحة . 

أشياء اعتبرها سلبيات : 
- الريحة القوية 
- الدخان الكثير 
- يحرق العين و يخليها تدمع  
ملاحظة : الي عندها ربو او حامل لا ما ينفع لها 
و الأطفال كمان ما ينفع لهم ، انا عندي ربو بس خفيف جداً الحمدلله بس مرا أنكتمت و حسيت كمان انو حلقي يتقطع لكن ماما و اختي بس دمعت عينهم . 

النتيجة : 
المفروض انها تكون كدا 





بس سارت كذا تقريباً :  








غسلت شعري بالبلسم بس زي البروتين و صراحة انا شعري ما سار زي الصور و لمى قرأت عنه كان الكلام انو يخلي الشعر سايح ممكن عشان مسوية بروتين بس شفت منه نتيجة إيجابية اكثر من البروتين لأنو لمى نشف ما في نفشة أبدا في شعري و شعري سار حيوي ما شاء الله و هذي اكثر شيئين انا ابغاها و الويفي ما راح من شعري صح نسيت بعد ما غسلت شعري طلعت الريحة حق المعالج و دمعت عيني 💔 ثاني مرا غسلتوا بالشامبو برضوا التشابك مافي بس في نفشة 💔 لكن طبيعية و خفيفة و بعد كذا راحت النفشة و الشعر المتطاير هاجد 😍❤️ و بكذا انتهت تجربتي ممكن البعض يعتبرها فاشلة لأنو ما ضبطت النتيجة مرا بس انا اعتبرها ناجحة لأنو اهم شي عندي الشعر يكون في حيوية و التشابك خف كثير .
بما انو شعري تحسن الحمدلله قررت انو أغير نظام غذائي لنظام صحي اكثر عشان يتغذى شعري كويس لأنو علاج الكيراتين مؤقت  و بس 😊. 


في شي عرفته بعد ما كتبت البوست و هو انو كل ما زادت نسبة الفرومالدهيد زادت نسبة الفرد و ذكرت فوق انو نسبة الفرومالدهيد في الكيراتين الي عندي 0.2% قبل لا تسوي الكيراتين او البروتين لازم اقل شي تكوني اخر مرا زيتي شعرك من أسبوعين و الأفضل شهر كامل و بعد الكيراتين لازم الشامبو يكون خالي من سولفات الصوديوم او السولفات و الصوديوم و البلسم نفس الشي انا اشتريت شامبو و بلسم  مكاديميا اويل | macadamia natural oil 
سعر الشامبو : ١٠٥ ريال 
البلسم : ١١٥ ريال 
من نزيه .  



الكيراتين من أمازون للي حابة تشتريه هنا 

في شي نسيت اكتبه في البداية و هو انو شعري قبل الكيراتين لمى اسوي له فير يبقى بس بعده سار يروح على طول ما يثبت حتى باسبراي 
انتهى البوست دمتم بحب . 


تحديث :

ملاحظة : لا تسوي الكيراتين الا للضرورة يعني اذا كنتي عروسة او تشتغلي و ما عندك وقت تستشوري و إذا كانت نوعية شعرتك خفيفة أو فروة راسك حساسة  اسألي مختصة قبل لا تسوي .




                         تابعيني على شبكات التواصل الاجتماعي : 


 photo sig_zpsnzw9exvy.jpg

7 comments:

  1. ماشاءالله عندك صبر على كل هالعملية الطويلة
    لكن المهم النتيجة طبعاً اللي تبرد الخاطر ��

    ReplyDelete
  2. تجربة جريئة لولا ، أنا جريئة بالقص بس خوافة بالأشياء الكيميائية .. ❤

    ReplyDelete
  3. This comment has been removed by a blog administrator.

    ReplyDelete
  4. This comment has been removed by a blog administrator.

    ReplyDelete
  5. This comment has been removed by a blog administrator.

    ReplyDelete
  6. This comment has been removed by a blog administrator.

    ReplyDelete
  7. This comment has been removed by the author.

    ReplyDelete