ريڤيو الغسول العلاجي اليومي سوبر كلينس من جلامجلو|Reviewthesupercleansedaily treatment cleanser from Glamglow

Tuesday, April 12, 2016



السلام عليكم و رحمة الله




صباح / مساء الدلال

حتكلم اليوم عن تجربتي الخاصة لغسول Supercleanse daily treatment & clearing  cleanser من جلام جلو الي هو الغسول الابيض .





اول شي نبذة عن براند جلام جلو :

 


براند جلام جلو بدأ من عام 2010 من قبل جلين و شانون ديليمور و كان حصري فقط للباكستيج و الخبراء في هوليود يستخدموه للنجوم و في عام 2011 سار جلام جلو بيد الكل يعني سار ينباع في المحلات و من اول شهر من انطلاقه كسر الدنيا و دحين متوفر في اكثر من 86 دولة و اكثر من 6500 محل و من ظمنهم سيفورا و سارت الصوالين و مراكز السبا تستخدمه و خلال الاربعة السنين الماضية جلام جلو تطورت من محادثة ( الي هي قصة انشاءهم للبراند موجودة في موقعهم للي حابة تشوفها بس عشان طويلة ما حكتبها ) الى قصة نجاح و ثورة في عالم الجمال و كمان اخذوا جائزة الجمال و براءة اختراع لتقنية التيوكسي ( تكنولوجيا الاوراق الحقيقة ) المعروف عنها انها طريقة عشان تبقى المكونات فرش و سريعة المفعول و تتضمن هذي الطريقة الطين و اوراق الحقيقة لنتائج فورية .
اول منتج لهم كان الماسك الأسود و بعده بدأو ينتجون انواع ثانية من الماسكات للبشرة و للعين و للشفايف و الغسول و
برضوا أنواع منه و الحلو و المعروف في منتجاتهم انها تنفع للنساء و الرجل و لجميع الاعمار .










الغسول يتميز بانه تركيبته تتحول من طين الى رغوة و اهم مكوناته حمض الجلايكولك و اللاكتيك الي يساعد  خالي من 
- الباربين .  
- السلفات .
- الفثالات . 


صورة للمكونات و فوائدها :




يوعد بانه :

- ينظف البشرة .
- يحسن البشرة .
- يطفي اللمعة .
-تنظيف المسام .







أخذته على مدح الموظفة في سيفورا فرع الأندلس مول نصحتني اخذه لانه بشرتي دهنية و فيها مسامات و جزاها الله خير و الله يوفقها لأنو جد فادني ❤️. 










تجربتي :

اول شي وقفت كل المنتجات الي استخدمها للوجه عشان اعرف نتيجته بالضبط ، و بدأت استخدمه في نص يناير بس بشكل متقطع و بعدين بدأت التزم بداية فبراير اول أسبوع استخدمته مرتين في اليوم مرا في الليل و مرا الصباح لمى استخدمه في الليل بعده أحط زي التونر و لاحظت انو وجهي سار جاف و تقشر على انه كان دهني و وقفت مدة ٥ ايام تقريبا بعدين رجعت استخدمه مرا وحدة في اليوم بدون التونر و بعد ٤ ايام تقريباً لاحظت حبوب في الذقن و بعد أسبوع حسيت الرؤوس السوداء سارت شبه مختفية ( ملاحظة : الرؤوس السوداء الي فيني اصلا مو كثير شوي في نهاية الخشم و شوية في الخد ) بعد ٢٠ يوم تقريباً قلت نسبة الرؤوس السوداء اكثر و منطقة التي زون عندي دهنية دحين سارت عادية للامانة من اول ما استخدمته ما نزلت في الشمس كثير او رحت مكان حار او فيه رطوبة بس قبل حتى البيت تدهن شوي في الحر ، بس في شي مو حلو صحيح انو المسامات تنظفت بس الغسول ما سكرها لسى مفتوحة قصدي يعني لسى واضحة فمدري ممكن تتعرض للاوصاخ مرا تانية فسرت أسوي ثلج بعد ما استخدمه للاحتياط و في شي حلو لاحظته انو بعد ما استخدمه وجهي يكون ناعم ، مرا جربته كغسول للماكياج مرا ما ينفع ما نزل المكياج توقعت انه حيكون زي بايوديرما بس لا اساساً مو مكتوب هههههه ، شخصياً حبيته جداً احسه يزيل الدهون أو الزهم من الوجه مزبوط و يصفيه  و كمان حسيت انه نزل الدهون الي في الخشم افضل من الزنجبيل هنا و كمان بعد ما اغسله احس بشرتي مشدودة .





طريقة الاستخدام : 


احط ٢ او ٣ ضغطات في طرف صباعي و اوزعه على وجهي و هو جاف و بمساج لطيف بحركة دائرية ابدأ احط الموية و تكون باردة شوي شوي و بحركة دائرية برضو الى ما يتحول الطين لطبقة من الرغوة اغسل وجهي و انشفه بالمنشفة .







شكل الغسول قبل لا يتحول رغوة شايفين كيف كأنه طين 






هنا شكله لمى يبدأ يتحول لرغوة













آخر شي انصح الي بشرتهم دهنية أو مختلطة مايلة للدهنية انهم يشتروا الغسول و ممكن كمان الي عندهم حب شباب لانو مرا فادني من دي الناحية الحمدلله ، اما الي بشرتها جافة ما ينفع لها لانه يجفف البشرة سعره ما اذكر صراحة بس في حدود ١٠٠ ريال . 







فيديو عن الغسول و طريقة استخدامه : 





هذي كانت تجربتي لمدة تقريباً ثلاث شهور او اكثر أتمنى انها تفيدكم دمتم بخير . 


تحديث 10 / 6 / 2016 : 

في الشهر الرابع و الخامس من التجربة : الرؤوس السوداء الي قلت عنها فوق راحت تماماً ، و بالنسبة للدهون حالياً الجو حر و رطوبة و كم مرا خرجت وجهي لمع بس مو زي قبل لا استخدمه خفت كثير يعني مثلاً اول كان وجهي يلمع  على طول من اول ساعة او ٢ اخرج فيها دحين لا بعد ٤ او ٥ ساعات بالنسبة لي احس ما اقدر احكم كذا لأنو لسى ما جات الرطوبة تمام ممكن تتغير النتيجة مع زيادة الحر و الرطوبة ، و مرا شفت اليوتيوبر الجوهرة و البلوقر وفاء يقولوا انهم يستخدموه زي الماسك فحبيت اجرب استخدمه كماسك حطيتي على وجهي ولمى نشف بديت احط موية بالتدريج نفس الطريقة الاساسية اول ما حطيته حسيت بحرقة كأنه يتفاعل في وجهي زي احساس الماسكات الي بالنعناع 😂😂 ، و ريحته الصراحة ما سميتها الى لمى استخدمه كماسك حسيت كانه فيه شجرة شاي مرا حبيت نتيجة استخدامه كماسك 😍 أحسه ينظف احسن من استخدامه كغسول بس ما استخدمه كل يوم كماسك لأنو حسيت انو وجهي جف مرا في أسبوع واحد عشان كذا بطلت و سرت أسويه مرا في الأسبوع و بالنسبة للدهون الي في الوجه مدري حسيت انه ما في شي حيخليها تروح لانه طبيعة بشرة وجهي كدا ، نجي للمسامات استخدم بعد الغسول توتر راح أتكلم عنه قريب ان شاء الله 😍😍 و فيه نقطة مهمة نسيت أقولها في البداية بعد الغسول رطبي شفايفك عشان ما تجف و حاولي قد ما تقدري تخلي الغسول بعيد شوي من الشفايف و بس 😘 . 

ملاحظة : اعتذر اذا كانت الكلام الي كتبتو في التحديث مو مرتب لأنو كتبته في ايام مختلفة و شكراً . 



تابعيني على شبكات التواصل الاجتماعي : 



 photo sig_zpsnzw9exvy.jpg

1 comment:

  1. قوامه غريب ، قلام قلو عليها مدح يحمّس ..❤

    ReplyDelete