تجربتي لبعض منتجات ايلف

Sunday, August 07, 2016













السلام عليكم و رحمة الله و بركاته 

مساء / صباح الخير 

كيفكم مع الاجازة الطويلة ؟ 
تخيلوا اني من ٥ شهور تقريباً مصورة الصور بس ما فضيت اكتب التدوينة الا اليوم 😭😩، الي هي ريفيو بسيط عن منتجين للشفايف من ايلف و منتج للعين  .


المنتج الأول :

lf lip exfoliator




مقشر للشفايف على شكل روج احلى منتج من الثلاثة  😍 

مكوناته : سكر بني ، زبدة الشيا ، زيت الجوجوبا ، زيت العنب ، افوكادو ، فيتامين e . 

اول مرا استخدمته ما شفت منه فايدة و تاني مرا كمان ما سوا لي شي و بعدين طلعت طريقة استخدامي له خطأ 😊 طريقة استخدامه الصحيحة 😂 : ابلل الشفايف و بعدين استخدمه بحركة دائرية لمدة ١-٢ دقيقة و بعدين ابلل منديل و امسح شفايفي و احط مرطب و بس . 

انا دائماً احط ارواج مات و شفايفي دائماً جافة لأَنِّي ما اشرب موية كثير و هذا الشي يخلي الشفايف متشققة و الترطيب وحدو ما بيكفي عشان يعالج التشققات من الشفايف صح حيرطبها بس حتسير زي الطبقة من الجلد مدري اذا لها اسم معين  😊 بس الي تتقشر و لمى تسحبيها أحياناً تجرح الشفايف و ينزل دم المهم عشان ننزلها لازم نسوي تقشير لأنو التقشير ينزل الجلد الميت بلطف بدون ما يجرح الشفايف كنت اول اسوي سكر و زيت زيتون بس لمى جربت هذا حبيته اكثر لانه اسهل و ما يعدم الدنيا ، هو ريحته فانيلا على سكر بس دحين سارت ريحتوا زي الزيت لمى يسير قديم ، ممكن عشان من زمان عندي او ما حفظتو بطريقة صحيحة المهم استخدمه من ٢-٣ مرات في الأسبوع و حالياً موقفته لانه شكلو خرب ، سعره بين ٢٠ - ٤٠ ريال .







المنتج الثاني :   

Lip primer & plumper




برضو منتج للشفايف له جهتين جهة برايمر للشفايف و جه مكبر شفايف بالنسبة للبرايمر المفروض انه يخلي لون الروج اوضح و يثبته لمدة اطول بس انا ما عجبني جريته مرتين بل ما يوضح لون الروج خلاه افتح و و يخليه مو حلو مرا ما حبيته اما بالنسبة للمكبر نتيجته حلوه ريحته قرفة  لمى احطه ع الشفايف في البداية يحرق شوي و يقرص هو يعطي امتلاء بسيييط للشفايف ولاحظت انه يخفف من الخطوط 😍 في الشفايف و يوردها و الامتلاء يدوم من 3-4 ساعات ، سعره نفس المقشر 25 ريال هل راح اشتريه مرا ثانية ؟ لا طبعا لانو ما منو فايدة الا اذا كان ينباع كل واحد لحاله ممكن اشتري المكبر .








المنتج الثالث : 

Makeup remover pen 




قلم مصحح الاخطاء استخدمته للايلاينر اول ما اشتريته كنت متحمسة له مرا و لمى جربته عجبتني النتيجة بس بعدها انعدم القلم بالايلاينر و سار كل ما استخدمه يخبص لي الميك اب بدل ما يرتبه جربت امسح الأسود بمنديل برضو ما في فايدة ، سعره ٢٠ ريال ، راح ارجع أشتريه ؟ طبعاً لا لانه منتج جداً فاشل . 


و بكذا أكون انتهيت دمتم بحب 💞.




 photo sig_zpsnzw9exvy.jpg

1 comment:

  1. مقشّر الشفايف من الأشياظ اللي ودّي اجربها،
    احسه مهم خصوصاً في الشتاء لان الشفايف و الجسم عموماً يجف بسرعة
    يعطيج العافية لولا ع البوست وننتظر المزيد ��

    ReplyDelete