التخطي إلى المحتوى الرئيسي

سلسلة التدوين | مواقع للقوالب المجانية للمدونة + شوية نصائح


مساء / صباح السعادة

ما وحشتكم تدوينات سلسلة التدوين  👀 ؟ لا طيب 🚶🏼.

قبل لا ابدأ الموضوع الأساسي حابة أقول انو اليوم و لله الحمد مدونتي صار لها سنتين 🎉 🎉 مرا فخورة اني اكملت سنتين من التدوين و عقبال العمر كلو ان شاء الله ، و أبداً ما ندمت اني سويت مدونة بالعكس تمنيت أعرفها من زمان بس للأسف عرفتها متاخر قبل ٩ سنين ممكن لمى كنت رابع كانت أول مرا أدخل عالم 

الانترنت و كنت أشوف المنتديات و تعجبني و سرت ابحق كيف اسوي منتدى و كل فترة اسوي لي منتدى كانه لعبة 😂 و اصمم له ديزاين و كل فترة ستايل قالب مختلف و اسم غير  استمريت الين ما خلصت الابتدائي يمكن سويت ٦ منتديات و كلها فاضية او فيها موضوعين ٣ بالكثير 😂 بعدين في المتوسط طلع تويتر و الانستجرام و انسحب ع المنتديات و قبل ٤ سنين و أنا ٢ ثانوي اكتشفت شي اسمه مدونات و في ٣ مرا حبيت الفكرة و جلست ابحث عن مواقع لانشاء المدونة و جربت كم موقع الين ما استقريت على بلوجر لانه الاسهل ( تكلمت عن المنصات حق التدوين في تدوينة راح احطلكم رابطها آخر شي ) و الحمدلله سويت المدونة و بديت اتعلم كيف اضبطها من الصفر ممكن غيرت قالب المدونة اكثر من ١٠ مرات حملت برنامج لتصميم القوالب و تعلمت عليه شوي و صممت للمدونة قالبين و ما عجبوني و حذفت البرنامج كله مشوار طويل و حلو الين ما استقريت على القالب الحالي صار له سنة ممكن او اكثر و الحمدلله عاجبني كل الي وصلته له الان عاجبني الحمدلله بس اسم المدونة مو مرا صراحة لسى ما لقيت الاسم الي يريحني ، و بعد المشوار الطويل الي سويته عشان اضبط المدونة ققررت اسوي سلسلة التدوين و بالنسبة للمشاهدات صح انهاوقليلة على سنتين تدوين بس برضوا مبسوطة في العدد الحمدلله أصلا لمى بدأت ما توقعت أوصل ١٠٠٠٠ و أعديه كمان ، كنت أقول اذا خلصت أول سنة و مشاهداتي ١٠٠٠ نعمة ، شكراً من كل قلبي لكل شخص زار مدونتي 💕 و شكر أكبر لكل شخص كتب لي كومنت 💗💗 و الي تحب تكتب و نفسها تسوي تدوينة بس ما تعرف تكتب عن ايش عادي مو لازم تخصصي مجال معين للتدوين تقدري تكتبي عن اي شي في الحياة أهم حاجة انك تكوني حابة دا الشي و مستمتعة فيه ، خليني أبدأ في الموضوع الأساسي  لأني لو كملت حتسير التدوينة عنوانها غير المحتوى . 


أول شي قبل لأحط لكم المواقع راح اعطيكم موقع مرا حيفيد الي محتارة في اسم مدونتها مو عارفة ايش تسميها أو الي في بالها اسم و حابة تعرف اذا في مدونة بذا الاسم أولا اسم الموقع SpinXo 



هذي الصفحة للي محتارة في الاسم أو ما تعرف ايش تسمي المدونة تحط في الفراغات المطلوب و تضغط سبن و مو لازم تعبي كل الاختيارات بكيفك الرابط هنا .




الصفحة الثانية للي مختارين الاسم و حابين يعرفوا إذا في أحد ماخذه ولا لا ، الحلو فيه انو يحط لك كمان اليوتيوب و الانستجرام و غيرهم اذا متاح او مأخوذ الرابط هنا ،للي استخدمت الرابط الي فوق الصفحة هذي تنفتح من نفسها بعد ما تختاري الاسم . 

مواقع القوالب المجانية : 
كلها جربت القوالب حقها 
mybloggerthemes

soratemplates

protemplateslab

themexpose

gooyaabitemplates

بالنسبة لي أفضل القوالب الي تكون خلفيتها أبيض Ⅹ أبيض  أحسها اريح للعين و ماتملل بالذات الي مدوناتهم فاشن أو بيوتي و إذا حابة خلفية القالب ملونة أفضل تكون فاتحة ، ثاني شي الالوان الثانية زي مثلا العناوين او اسم المدونة حلو تكون الوان متناسقة أو كلها نفس اللون مثلاً الي مدونتها طبخ خلفية القالب بيضاء و العنوان أخضر أو أزرق  أحسها ألوان حلوة لمدونات الطبخ و يكون مثلا الشعار شوكة ملعة تخيلتها كيوت 😍 و إذا مدونات لايف ستايل تكون الوانها باستيل باختصار كل ما كانت شي هادي و ناعم ما في زحمة تكون حلوة لانها مدونة شخصية و في النهاية كل واحد و ذوقه شوفوا الصور هذي بعض القوالب الي عجبتني و رابط كل واحد تحت الصورة : 













cheerup الخط الرمادي  مو في القالب تنبيه مو راضي يروح 


في غيرهم كثير في المواقع الي حطيتها فوق .


نصائح عشوائية : 

١- لا تركزي في عدد المشاهدات ، لأنو إذا ركزتي فيه من أول ما تبدأي راح يجيك إحباط و ممكن تبطلي تدوين ، خليه أخر هدف لك و حطي عدد معقول على بدايتك عشان حتى لو قربتي له تكوني مبسوطة . 

٢- لا تقارني نفسك بأحد نفس مجالك ، خليك واثقة من تدويناتك حتى لو أحد كتب زيها أو مشابهة لها و تكون شهرته أكثر لا تزعلي أو تتضايقي لأنو التدوين مساحة حرة كل واحد يعبر عن رأيه و يكتب الي في بالو بوجهة نظروا و طريقتوا و لكل واحد راح يكون له جمهور يحب كتاباته . 

٣- حاولي دايما تكتبي عن أشياء ماحد كتب عنها أو نادر أحد تكلم عنها ، مثلاً إذا مدونتك تتكلم عن الماكياج جربي ماركة مو معروفة مافي ريفيوهات عنها أو منتج جديد بإختصار حاولي تكون مواضيعك حصرية هذا الشي يزيد المتابعين .

٤- اكتبي باسلوبك الخاص لا تحاولي تقلدي أحد و خليك عفوية في تدويناتك ، في شي أعاني منه لمى اكتب احتار اكتب كاني اكلم وحدة و لا كثير ، لمى اقرأ تدوينة كتبتها اشوفها مقسومة بالنص 😂 بس جد يحير .

٥- أي فكرة تجي في بالك أكتبيها على طول في الجوال أو خلي دفتر صغير و قلم معاك في كل مكان عشان اي فكرة تجيك تكتبيها على طول و بعدين انتي شوفي الافكار و رتبيها زي ما تحبي اهم شي لمى تجي في بالك لا تطير ، أنا اسوي كذا و عندي أفكار من سنتين و لسى ما سويتها و بعض الأفكار اكنسلها أحس ما لها داعي او ما حقدر أكتبها عادي بس أهم شي لمى تجي فترة الخمول يكون عندي مرجع للأفكار . 

٦- تواصي مع مدونات زيك و سوا بينكم تعاون أو كولابريشن على موضع معين ، فكرة مرا حلوة منها تتعرفي على مدونات زيك و منها تدعموا بعض .

٧- في حاجة اسمها وصف البحث في blogger هذي تكتبي فيها أي شي يخص التدوينة أو كلمات يبحثوا عنها الناس تخص التدوينة مثلاً أنا كتبت تدوينة عن مسلسل M و في التدوينة كاتبةز ملخص القصة اروح اكتب في وصف البحث : قصة مسلسل M لأنو الي حيبحث في جوجل عن القصة حيكتب كذا يعني وصف البحث يسهل ظهور مدونتك في جوجل ،  إن شاء الله فهمتوا ماعرفت كيف اشرح 😟 .

٨- حاولي دايماً الصور الي تحطيها في المدونة تكون و اضحة و جميلة و الخط كمان حلو يكون واضح ، أنا شخصياً إذا فتحت مدونة و لقيت صور مو مرتبة أو ماهي واضحة حتى لو كانت مفيدة ما أقدر أكمل و الخط إذا كان الكلام مرا كثير و الخط صغير متعب ، و أنا في بداياتي  عانيت شوي في التصوير كانت الصور مغبشة مو واضحة و طلع السبب القالب مقاس الصور فيه صغير و السبب الثاني صيغة الصورة و الحمدلله لو تشوفوا تدويناتي في البداية إلين آخر شي تلاحظوا الفرق تطورت كثير و إن شاء الله اتطور أكثر و أكثر 💕 .

انتهت التدوينة اتمنى انها تعجبكم كتبتها بكل حب لكم يا أصدقاء 💖 .


تابعيني على شبكات التواصل الاجتماعي : 



أو 




photo sig_zpsnzw9exvy.jpg


تعليقات

  1. حبييت موقع الاسماء مرره فكرته 👌🏽👌🏽

    ردحذف
  2. مساء الخير , موضوعك جداً جميل وكنت احتاجه .
    لكن بسألك كيف استخدم القوالب ؟ يعني كيف احطها ؟

    ردحذف
    الردود
    1. مساء النور ، هذي تدوينة كتبتها لطريقة تركيب القالب في المدون https://labonitablog.blogspot.co.uk/2016/02/blogging-series.html

      حذف
  3. موقع الاسماء عجبتني فكرته 😍 صدق اكثر شي حيرني وقت مافتحت مدونتي هو الاسم وحطيت اسم وغيرته بعد سنه ماكان عاجبني ابدااا فهالموقع بيساعد المبتدئات والمحتارات .😍👍🏼

    ردحذف
    الردود
    1. 💞💞 هذا الي أنا ابغاه المبتدئات يستفيدوا

      حذف
  4. وانا زي البنات تحمست لشغلة الاسماء ان كانت متاحه او لا ،، والقوالب كمان سبق وشفتها جميلة مره ❤️❤️

    ردحذف

إرسال تعليق

المشاركات الشائعة من هذه المدونة

نتيجة تجربتي لتمارين كلوي تينغ

مساء/ صباح الخير  موضوع التدوينة واضح من العنوان  🏃🏻‍♀️  إذا انتي جديدة في عالم الرياضة، كسولة، تملي من الروتين، تبغي تمارين بسيطة و ما تتعب مرة بس نتيجتها حلوة و تفرق كملي قراءة التدوينة للنهاية،

تجربتي لمنتجات ماوي مويستر (مجموعة زبدة الشيا) منتجات شعر طبيعية | Maui moisture

صباح / مساء الجمال ✨ يالله أحس من زمان ما تكلمت عن منتجات عناية بالشعر 🙆🏽‍♀️ اليوم حقولكم عن تجربتي لمنتجات الشعر من ماوي مويستر و هي براند امريكية 🇺🇸 اكثر شي حمسني اجربها هو انها تعتبر طبيعية 🌿 و اهم شي لحظة 🤦🏽‍♀️ خلوني أول شي اقولكم نوعية شعري 👩🏻‍🏫، طبيعة شعري جاف ع قولة ماما يشرب الزيت لأني دايماً اهتم في و أزيته و النتيجة بعد فترة تبين و إذا سحبت اسبوع أو اثنين عناية الشهور الماضية كلها ع الفاضي زيادة ع طبيعته الجافة ما اشرب مويا تمام غذائي مو تمام فتقصف الشعر و تعب حالياً الحمدلله التقصف و التلف خف كثير آخر ٥ شهور بس الجفاف لا مفر منه المهم دايماً أبحث 🕵🏽‍♀️عن شامبوهات كويسة

اصنعي غلاف لهايلايت الإنستجرام الخاص بك بطريقة سهلة جداً ✨

مساء / صباح الخير يا جميلات من فترة سارت موضة جديدة في الإنستجرام عند البلوجرز و الانفلونسرز و انتشرت بسرعة الي هي غلاف أو خلفية لهايلايت الإنستجرام و مرا حبيتها جداً جميلة و كيوت 😻 و أحسها ترتب الحساب ف من وجهت نظري أحس لازم أى بلوجر تسويها في إنستجرامها إذا عندها هايلايتس لأنها تبين الحساب مرتب و بروفيشنال ف راح أحط لكم طريقتين و كل وحدة أسهل من الثانية .