التخطي إلى المحتوى الرئيسي

منتجات غيرت بشرتي للأحسن 😍 ✨




مساء / صباح جمال
كيفكم بعدالاختبارات و مع تجيهزات رمضان ؟
تكلمت قبل امس عن هذا الروتين و حبيت احطه هنا لأني استفدت منه وحابة الكل يستفيد ، قبل فترة قلت لكم أنو بشرتي فجأة سارت جافة جداً  💔 و من شدة الجفاف سار فيها قشور في الجبهة و شوية في الخد قريب من الاذن ، في البداية شلت هم التغيير المفاجئ و مرا تضايقت من القشور و كمان كان في حبوب صغيرة ففكرت أروح عند دكتورة بس هنا صعبة شوية مو زي عندنا مراح اكمل لاني ما حوقف و حيسير البوست طويل  😊 😂 قلت اهم شي احتاج الترطيب لأنو البشرة جافة و معاه سويت لي روتين عناية الي راح اقولكم عنه دحين .



روتيني من زمان  ينقسم لقسمين واحد اسبوعي و الثاني يومي فخليته زي ما هو بس غيرت الأشياء الي استخدمها بحيث تناسب نوع البشرة  .

الروتين اليومي : 




غسول من اورجينز origins مناسب لجميع أنواع البشرة  وظيفته انه يوازن البشره المناطق الجافة يرطبها و المناطط الدهنية يخفف الدهون الي فيها مرا جميل للبشرة المختلطة  👍 تركيبته جديدة علي أو مرا اشوف غسول قوامه شبيه بموس الشعر بس على اثقل ( frothy ) بس تحطي له شوية موية يسير رغوة حبيت فيه إني بعد ما استخدمه بشرتي تكون ناعمة و احس بإحساس النظافة الي كان البشرة تتنفس أهم شي هذا الإحساس  😂 و أهم شي أنه ما يجفف البشرة و ريحته جداً تجنن لافندر على نعناع و اعشاب  😍 يعني تخيلي تصحي من النوم كسلانة أو ترجعي من الدوام تعبانة  تغسلي وجهك بهذا الغسول  😴 آخر شي أحب استخدم مع الغسول فرشة مرا فرقت معايا الفرشة في تنظيف البشرة ي منها انواع كثير بأسعار مختلفة الي عندي من أولاي سارلها سنة و نص و مرا مرتاحة معاها . 




spot wand عصا سحرية للحبوب  😂 من بوتس ما عرفت ايش اسم المنتج بالضبط بس هوا علاج للحبوب الي تطلع فجأة زي الي تجي قبل المناسبات 💔 شكله زي العصاية و مقسوم نصين الجزء الشفاف للنهار و الثاني لليل لمى تطلع لك حبة تحطيه عليها ، عارفين لمى بتطلع الحبة يبدأ المكان الي حتطلع فيه يحمر و يالم على طول أول ما يسير كذا احطه ما يخلي الراس الابيض يطلع و أحياناً يطلع بس مرا صغير للشراء هنا .
ملاحظة: هذا المنتج مو علاج لحب الشباب هذا بس للحبوب الي تطلع فجأة تكون وحة او ثنتين كذا مو حبوب كثيرة  💗.




و اخيراً و ليس آخراً زيت برضو من بوتس لمى رحت اشتري كنت ابغى شي يرطب بعمق فشت هذا الزيت و شفت انو باقي حبتين قلت شكله حلو ما انتبهت لكلمة wrinkle reduce و لمى رجعت البيت انتبهت لها و كنت ناوية أرجعه بس صحبتي الجميلة روان اقنعتني اجربه و أنو المنتجات الي ضد التجاعيد ترطيبها يكون عالي و انا هذا الي ابغاه المهم أنه عجبني مرا 💗 استخدمه مرتين في اليوم من ٢-٣ قطرات بس ينعم البشرة و يرطبها و يعطيها اشراقة و يجدد خلايا البشرة للشراء هنا .



الروتين الاسبوعي : 




مقشر من كلينك تكلمت عنه قبل هنا بعض الاحيان ما اسويه لاني احس كثرة التقشير لبشرة الوجه مو كويسة بس هذا حبيباته جداً ناعمة .

ماسك الفحم من اورجنز لتنظيف المسامات بعمق 
هذا الماسك هو الي خلاني اشتري المجموعة هذي كان في الويش ليست حقي حق الماسكات مرا كنت متحمسة لو اكثر منتج مشهور عندهم و كل الناس تمدحه هو ينفع لجميع انواع البشرة و المكون الأساسي فيه الفحم و الطين الأبيض رأي فيه كثير حبيته 💗 و احب احساس النظافة بعده فعلاً ينظف البشرة تنظيف عميق حبيت تنظيفه أكثر من الطين الأوربي و ينظف المسام من قلب و يخلي ملمس البشرة يجنن 💖 و مشرقة و على انه بالفحم بس ما جفف بشرتي بالعكس احسه خفف الجفاف ممكن عشان أنا ارطب وجهي بعده مدري صراحة ، اتوقع اكثر شي راح يعجي الي بشرتهم دهنية لأنو ينظف الدهون و حتى في الموقع كاتبين احسن شي للبشرة الدهنية و المعرضة للحبوب . 

قبل و في الفترة إلي كنت استخدم هذي المنتجات كنت استخدم عسل المانوكا كل يوم ملعقة صغيرة على الريق فممكن هوا كمان ساعد في تحسن البشرة ، تكلمت عنه قبل كذا في السناب شات  فوائده مرا كثيرة و أنا فادني في أشياء كثير ابحثوا عنه تلاقونه في صيدلية النهدي و اتوقع وايتس في الصيدليات الكبيرة و في محلات الأشياء العضوية و المكملات  . 


آخر شي حابة أقول مو لازم  تستخدمي هذي المنتجات عادي بالمنتجات الي عندك و تعرفيها تشوفي نتيجة حلوة اهم شي الالتزام و less is better أظن كئا المثل 😅كل ما كانت منتجات العناية الي تستخدميها أقل كل ما كان أحسن و تكون فيها كل الي تحتاجيه ( غسول - كريم أو زيت مرطب - مقشر ( مو ضروري أو حسب نوع بشرتك ) - تونر ) و إذا بشرتك تعاني من حب الشباب ابحثي ايش العلاج الي يناسبها سواء كان طبيعي أو لا  أو روحي عند دكتورة حسب الي يناسبك و أهم شي الي بشرتها حساسة ما تستخدم أي شي إلا قبل لا تقرأ عنه كثير و بس أتمنى انكم تستفيدوا و كل عام و أنتم بخير مبارك عليكم الشهر  🌙 .



تابعيني على شبكات التواصل الاجتماعي : 



أو 

تعليقات

  1. يعطيك العافيه 💕❤❤، مرا تحمست لمنتجات اورجينز ماسك الفحم مع الغسول ، انا بشرتي مختلطه على دهنيه ، والحين اخذت علاج عن الحبوب ف صارت بعض الامكان بوجهي تتحسس واماكن مثل التي زون وخصوصاً الخشم يضل يدهن ، وتطلع لي حبات يمين يسار شوي بعد ، فحسيت ان الغسول ان شاء الله يكون بيرفكت ليي ، والماسك تتوقعي يفيد للرؤوس السوداء ؟ انا حالياً أستخدم ماسك الطين الأوروبي ، وحبيت كنتيجه اولى بس أحس أن اذا خلصته أبي أجرب شيء غير ، فماسك الفحم دا تحمست له منك 😻❤❤.

    ردحذف
    الردود
    1. انا كنت استخدم ماسك الطين الأوربي قبل هذا حسيت هذا ينظف أكثر و بالنسبة للرؤوس السوداء أنا قبل لا أسوي الماسك
      أحط لصقة الرؤوس السوداء و بعدين احطه و النتيجة حلوة خفت كثير حتى بدون اللصق بس مع اللصق أفضل بالذات للرؤوس السوداء القديمة

      حذف
  2. متحمسة كثير لغسول اوريجينز و ماسك الفحم 😍❤️❤️❤️
    حبيت روتينك ، يعطيك العافيه لولا

    ردحذف

إرسال تعليق

المشاركات الشائعة من هذه المدونة

نتيجة تجربتي لتمارين كلوي تينغ

مساء/ صباح الخير  موضوع التدوينة واضح من العنوان  🏃🏻‍♀️  إذا انتي جديدة في عالم الرياضة، كسولة، تملي من الروتين، تبغي تمارين بسيطة و ما تتعب مرة بس نتيجتها حلوة و تفرق كملي قراءة التدوينة للنهاية،

تجربتي لمنتجات ماوي مويستر (مجموعة زبدة الشيا) منتجات شعر طبيعية | Maui moisture

صباح / مساء الجمال ✨ يالله أحس من زمان ما تكلمت عن منتجات عناية بالشعر 🙆🏽‍♀️ اليوم حقولكم عن تجربتي لمنتجات الشعر من ماوي مويستر و هي براند امريكية 🇺🇸 اكثر شي حمسني اجربها هو انها تعتبر طبيعية 🌿 و اهم شي لحظة 🤦🏽‍♀️ خلوني أول شي اقولكم نوعية شعري 👩🏻‍🏫، طبيعة شعري جاف ع قولة ماما يشرب الزيت لأني دايماً اهتم في و أزيته و النتيجة بعد فترة تبين و إذا سحبت اسبوع أو اثنين عناية الشهور الماضية كلها ع الفاضي زيادة ع طبيعته الجافة ما اشرب مويا تمام غذائي مو تمام فتقصف الشعر و تعب حالياً الحمدلله التقصف و التلف خف كثير آخر ٥ شهور بس الجفاف لا مفر منه المهم دايماً أبحث 🕵🏽‍♀️عن شامبوهات كويسة

اصنعي غلاف لهايلايت الإنستجرام الخاص بك بطريقة سهلة جداً ✨

مساء / صباح الخير يا جميلات من فترة سارت موضة جديدة في الإنستجرام عند البلوجرز و الانفلونسرز و انتشرت بسرعة الي هي غلاف أو خلفية لهايلايت الإنستجرام و مرا حبيتها جداً جميلة و كيوت 😻 و أحسها ترتب الحساب ف من وجهت نظري أحس لازم أى بلوجر تسويها في إنستجرامها إذا عندها هايلايتس لأنها تبين الحساب مرتب و بروفيشنال ف راح أحط لكم طريقتين و كل وحدة أسهل من الثانية .