التخطي إلى المحتوى الرئيسي

Happy birthday to my blog



صباح / مساء السعادة 
اليوم ٧مارس ٢٠١٨  في نفس هذا اليوم قبل ٣ سنوات انولدت و طلعت ع الدنيا مدونتي و كتبت أول تدوينة لي 👩🏽‍💻 و كانت تعريف لمحتوى المدونة صراحة ما كنت ناوية أنزل تدوينة اليوم بس حسيت ٣ سنوات شي كبير لازم أوثقها في المدونة 💕 بالذات إني أقدس الذكريات و بنتي الالكترونية كبرت و سار عمرها ٣ سنوات 😍 .

البداية 
أول ما بدأت بديت لأني أحب أجرب و كنت دوبي جديدة في عالم التدوين و مرا حبيت فكرة المدونات و قلت دامي احب اجرب في نفسي أشياء كثير و عندي تجارب ليش ما أفتح مدونة و ببحث كم يوم عن منصات التدوين و ضغطة زر سويت المدونة 👍🏼 و كان في بالي الموضوع و متحمسة له أذكر كانت أيام مدرسة أرجع من المدرسة على طول افتح جهازي و أكتب و خلصت التدوينة و نزلتها و مع الحماس بداية التدوين كنت كل دقيقة أحدث و أشوف عدد المشاهدات و كانت صفر طبعاً 🙃💔 كنت كأني طفلة اشترت لعبة جديدة أجرب و أكتشف و حماس 😍 و سرت ارسم خطط مستقبلية شاطحة لمدونتي و بعدين سرت احوس و اتعلم ع القوالب و من هنا أكتشفت شي جديد أحبه 💞 و استمتع فيه  و لأني حبيته  تعلمت كل شي بنفسي كل شي في المدونة و شكلها سويته بنفسي جربت أصمم قالب من الصفر و جربت أخذ قوالب جاهزة و أعدل عليها و كل يوم أتعلم شي جديد و أغوص في عالم ما كان في بالي إني أحبه و يكون من مصادر السعادة عندي و اسير لمى أبغى أغير جو اخبص و أجرب 👩🏽‍💻  و قررت أبدأ سلسلة التدوين لأنه لمى كنت أبغى اتعلم ما كنت أحصل معلومات كثير بالعربي و حبيت أفيد زي ما استفدت  . 


عشق جديد:
مع الوقت سار عندي حب و إنتماء للتدوين سار جزء مني من زمان أحب الكتابة  بس مع التدوين سرت أحبها أكثر و عشقتها💕 ما أعرف كيف أوصف لكم الشعور بس أبدأ أكتب أحس الكلام يطلع فجأة و أكون مرة سعيدة 😃 مساحة خاصة فيني أعبر فيها عن رأي خصوصا تدوينات قسم flashlight له محبة خاصة و تدوينات نهاية السنة جزء مني أشوف التغيرات الي سارت لي كل سنة و حسيت إني خلال الثلاثة سنوات تغيرت كثييير للأحسن الحمدلله ،كتبت تدوينة عن الكتابة و التدوين للي حابة تشوفها هنا  ،  المدونة خلتني أحب البرمجة و سرت أقول هذا المجال إلي أبغى أشتغل فيه 👩🏽‍💻 أشياء كثير تعلمتها و حبيتها بعد التدوين لو اتلكم يوم كامل ما حخلص 💕. 

أصدقاء جدد : 
من الأشياء الجميلة إلي سارت لي في عالم التدوين الصداقات تعرفت على مدونات ساروا صديقاتي و في منهم ساروا زي  أخواتي 💞  و متابعات جميلات  سرنا صحبات هذي من أجمل الأشياء في السوشيال ميديا 💞 و من الأشياء الجميلة كمان نافذة المدونات أحسهم عائلتي الألكترونية .

إنقطاع الإلهام :
حالياً في مدونتي ٧٣ تدوينة منوعة من تجاربي لمنتجات و طبخات من تأليفي و يوميات و ذكريات بالنسبة لي كنت أتمنى أكون كتبت تدوينات أكثر من كذا بس الظروف و مشاغل الحياة 😅 ما تخلي الواحد يبدع أمزح 🙄 هو طبعاً الظروف تأثر بس أكثر شي متعب في التدوين إنقطاع الإلهام 💔 لمى تجيبك فترة تكوني عاجزة عن الكتابة و مافي أفكار في بالك و أسوأ شي لمى تحسي إنو عندك طاقة كتابة و نفسك تكتبي بس ما عندك شي تكتبي عنه أو ما في فكرة في بالك من الأساس 🤯 عشان كذا اشوفه مهم إنو يكون عندي دفتر اكتب فيه أي فكرة تطلع في بالي أو في ملاحظات الجوال الأسوأ منه هو لمى يكون عندك أفكار و مواضيع كثير للتدوين و كل يوم تطلع لك فكرة 💡بس يكون عندك عجز في الكتابة مو قادرة تكتبي 🤭 الي يسير لها كذا ترا عادي كل الشخصيات العظيمة يسير لهم كذا 😌 إنقطاع الإلهام يجي لكل الناس شوية فترة نقاهة و خروج عن منطقة الراحة يرجع إن شاء الله 👍🏼 حالياً سرت أي تدوينة تجي في بالي على طول أكتب رؤوس الأقلام عشان في حالة انقطع الالهام أقدر أكتب لأن الفكرة واضحة و يبغى لها ترتيب و أحياناً ما تضبط .

إختيار الإسم المناسب : 
من أكثر الصعوبات الي واجهتني في المدونة اسم المدونة مو قادرة أثبت على اسم معين جربت أسماء كثير للأن ما حصلت الإسم الي ما أفكر أغيره بعد كذا 😓 خلال الثلاث سنوات ممكن غيرت اسم المدونة ٨ مرات و هذا الشي غلط لأنو كل ما تنعرف المدونة باسم و رابط أروح أغيره بس ايش اسوي لعقلي الي مافي شي يعجبه 😠 خلاصة الموضوع لاتغيروا اسم مدونتكم كثير و أختاروا الاسم قبل لا تفتحوها و لازم تكوني متأكدة منه 👍🏼. 


ختاماً : 
دائماً أقول لأي وحدة عندها حب كتابة و تحب تشارك الناس لاترددي و سوي مدونة جد التدوين شي مرا حلو و  إذا ما تحبي تشاركي الناس تقدري تخلي مدونتك برايفت و تكون شي لك وحدك و شكراً لكل وحدة قرأت التدوينة و شكراً لكل متابعاتي و قراء مدونتي و عيشوا حياتكم و انبسطوا و دايماً جربوا أشياء جديدة عليكم و اطلعوا من منطقة الراحة الخاصة بكم ممكن في يوم من الأيام تلاقي نفسك في مكان ما عمرك فكرتي فيه مافي شي مستحيل عند رب العالمين be strong and believe in yourself 💖.


تابعيني على شبكات التواصل الاجتماعي : 






و عشان توصلك التدوينات أول  بأول على المربع الأزرق الي مكتوب فيه متابعة 💗
photo sig_zpsnzw9exvy.jpg

تعليقات

  1. تدوينة جميلة حبيتها. كل سنة و مدونتك بخير

    ردحذف
  2. كل سنة ومدونتك من إبداع إلى إبداع 🎊💓

    ردحذف
  3. جماالك وجمال مدونتك ماشاءالله. عقبال سنوات طويله لك من الابداع والنجاح ان شاءالله❤️🙌🏼😻

    ردحذف
  4. بالتوفيق لُبنى. و عُقبال المليون موضوع و مُتابع. ❤️

    ردحذف

إرسال تعليق

المشاركات الشائعة من هذه المدونة

نتيجة تجربتي لتمارين كلوي تينغ

مساء/ صباح الخير  موضوع التدوينة واضح من العنوان  🏃🏻‍♀️  إذا انتي جديدة في عالم الرياضة، كسولة، تملي من الروتين، تبغي تمارين بسيطة و ما تتعب مرة بس نتيجتها حلوة و تفرق كملي قراءة التدوينة للنهاية،

تجربتي لمنتجات ماوي مويستر (مجموعة زبدة الشيا) منتجات شعر طبيعية | Maui moisture

صباح / مساء الجمال ✨ يالله أحس من زمان ما تكلمت عن منتجات عناية بالشعر 🙆🏽‍♀️ اليوم حقولكم عن تجربتي لمنتجات الشعر من ماوي مويستر و هي براند امريكية 🇺🇸 اكثر شي حمسني اجربها هو انها تعتبر طبيعية 🌿 و اهم شي لحظة 🤦🏽‍♀️ خلوني أول شي اقولكم نوعية شعري 👩🏻‍🏫، طبيعة شعري جاف ع قولة ماما يشرب الزيت لأني دايماً اهتم في و أزيته و النتيجة بعد فترة تبين و إذا سحبت اسبوع أو اثنين عناية الشهور الماضية كلها ع الفاضي زيادة ع طبيعته الجافة ما اشرب مويا تمام غذائي مو تمام فتقصف الشعر و تعب حالياً الحمدلله التقصف و التلف خف كثير آخر ٥ شهور بس الجفاف لا مفر منه المهم دايماً أبحث 🕵🏽‍♀️عن شامبوهات كويسة

اصنعي غلاف لهايلايت الإنستجرام الخاص بك بطريقة سهلة جداً ✨

مساء / صباح الخير يا جميلات من فترة سارت موضة جديدة في الإنستجرام عند البلوجرز و الانفلونسرز و انتشرت بسرعة الي هي غلاف أو خلفية لهايلايت الإنستجرام و مرا حبيتها جداً جميلة و كيوت 😻 و أحسها ترتب الحساب ف من وجهت نظري أحس لازم أى بلوجر تسويها في إنستجرامها إذا عندها هايلايتس لأنها تبين الحساب مرتب و بروفيشنال ف راح أحط لكم طريقتين و كل وحدة أسهل من الثانية .