صباح / مساء السعادة
يالله مرة مشتاقة للتدوين 😥 أحس لي سنة ما دونت مو كم شهر حبيت ارجع بموضوع خفيف تكلمت عنه قبل كذا في السناب شات و اقترحت علي المدونة الصديقة علياء ( الثالث و العشرين من فبراير) إني أوثقه في تدوينة 👩🏻💻 و انشغلت بالسفر و نسيت و قررت أكتبها الآن لأني أحاول أعدل نظامي بعد الصيفية و أطلع من مود الإكتئاب و الطفش و الطاقة السلبية و الكسل الي فيني من تغير الوضع و اللخبطة الي سارت في الفترة الأخيرة و أحاول اسير إنسانة نشيطة و تفكر بإيجابية و منجزة و متقبلة التغيير ✨زي مو كاتبة في العنوان راح أقولكم عن عادات تخليني أبدأ يومي بإجابية .
أول شي حاولت أرجع أعدل نومي عشان أقوم الصباح و رجعت لروتيني مو منظم مرة بس أحاول، عندي صعوبة في الإلتزام بروتين معين عجزت ألقى حل فجالسة أحاول التزم بالأشياء الي تعطيني نشاط زي مثلاً :
- أرتب السرير أول ما أصحى من النوم .
- أغسل وجهي بموية باردة جدآ ( دايما أحب أغسل وجهي بمويا باردة جداً نفسياً أحسه أفضل للوجه 😅).
- أفتح كل شبابيك البيت أجدد الهواء و الشمس تدخل البيت + أبخر البيت باللبان سبحان الله ع طول لمى اسوي كذا أحس بنشاط و سعادة 😍💗.
- أمشي ع الأقل ٤ أيام في الاسبوع وقت النهار طبعاً، هو أفضل في الهواء الطلق بس إذا ما قدرت عادي في البيت أمتره 😂.
ثانياً إضافة عادات جديدة لروتينك
والله بدون مبالغة مرة تغيرت نفسيتي سرت أقوم بنشاط و يبدأ يومي بنشاط و حماس و سرت أنجز أكثر :
- اشرب موية كثير بديت فيها من رمضان و التزمت أكثر شي في نص شوال و بعدين قطعت و دحين جالسة أحاول أرجع ضروري نشرب موية بكميات تناسبنا عن تجربة تفرق في أشياء كثير علاج خرافي نشاط و طاقة / الصداع للي يعاني من الشقيقة لمى تشربي مويا تماما يخف بإذن الله / تحسن في البشرة و الشعر، الموية تخليك انسانة جديدة 😂 صح تتعب في البداية بس نتيجتها جميلة من زمان معودة نفسي أول ما اصحى اشرب موية الفترة الأخيرة سرت أحط مقدار مثلاً لازم كاسة كاملة أو نص العلبة الوسط .
- ممنوع أمسك الجوال أقل شي ساعة في البداية كان صعب مرة لاني متعودة أول ما أصحى امسكه بس بدأت بالتدريج baby steps أول شي ٥ دقايق بعدين ١٠ بعدين نص ساعة لحد ما وصلت للساعة و أحياناً أكثر بس صراحة أكثر شي نص ساعة و إذا ساعة ممكن امسكه شوي و اسيبه 🙆🏽♀️ بس فرق معاي سرت اقوم نشيطة و اخلص شغل البيت أسرع سويت لي زي التمارين الذهنية حسيت حلوة تصحصح راح اقولكم عليها بعد شوية ، لمى بطلت امسك الجوال حسيت و قتي سار مايضيع لأني لمى امسك الجوال أول ما اصحى عاد اجلس مسدوحة ساعتين ثلاثة عليه و ما أحس بالوقت 🤦🏽♀️ و أزعل وين ضاع يومي 😂.
- أول ما أقوم بعد الأذكار أقول ١٠ أشياء ممتنة و أحمد ربي و اشكره عليهاجربوها مرة تفرق في النفسية و تحسسك بالنعمة الي انتي فيها و كمان أحب ابتسم و امدح نفسي مثلاً أقول صباح الخير يا حلوة او صباح الخير انتي اليوم راح تكوني منجزة و تخلصي كل شي 😅 و لمى اقوم اسوي هذا التمرين البسيط حسيته يصحصح المخ 🧠 أذكر ٣ أشياء اشوفها مثلاً طاولة و كنب و كتاب و شيئين اسمعها مثلاً صوت المطر و العصافير 😴 شيء اتذوقه و شيئين احسها ممكن تشوفيه شي تافه بس أنا أحب اسويه الصباح يخليني أشغل مخي 👌🏼.
- أخيراً و ليس آخرا لا للتأجيل 🚫❌ اعترف إني من النوع الي يحب يأجل و دايماً في صراع مع النفس عشان ابطل هذي العادة و دايماً أحاول اتفاهم مع نفسي تبطلها و الحمدلله ماشية تمام بس لازم تجي أيام اسحب على كل شي راح احاول لحد ما يضبط معاي.
و بس والله الحياة مرة وحدة عيشيها بالطريقة الي تحبيها انتي بيدك تختاري تكوني انسانة سعيدة أو لا، لا تتعذري ب الظروف الي حولك و لا تطالعي في الي ما تقدري له اصنعي سعادتك بنفسك و احلمي و اسعي لتحقيق حلمك و ان شاء الله يتححقق 💕.
تابعيني على شبكات التواصل الاجتماعي :
و عشان توصلك التدوينات أول بأول على المربع الأزرق الي مكتوب فيه متابعة 💗
تدوينة لطيفه
ردحذفشعرت بالنشاط و الانتعاش من مجرد القراءه
شكرا لك