مساء / صباح البدايات الجميلة
عودة للتدوين بعد غياب سنة 😊 حاسة اني ما اعرف اكتب و لا عارفة كيف ابدأ بس
قلت تدوينة نهاية العام من التقاليد السنوية في المدونة ما ينفع ما اكتبها و ان شاء الله تكون بدايتي في العودة للتدوين.
و انتهت سنة ٢٠١٩ بحلوها و مرها بالنسبة لي كانت اكثر سنة امر بتقلبات في حياتي و احس بضياع و تشتت و محاولة العثور على النفس، زي ما يسموها أزمة ربع العمر، عشان كذا قللت كثير من تفاعلي في السوشيال ميديا و تركت التدوين لاني فقدت الإلهام و جلست أتعرف على نفسي اكثر و ركزت على اهدافي و كيف راح احقققها.
أهداف ٢٠١٩:
السنة هذي قلت راح اجرب ارجع زي زمان ما استخدم بلانر بصراحة حسّيت بقيمته انه فعلاً كان يخليني انظم وقتي قد ما اقدر بدونه كان وقتي ضايع و ما عرفت أرتبه، جربت برامج كثير في الجوال ما حبيتها مافي زي الورقة و القلم في التنظيم ف ٢٠٢٠ ان شاء الله راح اشتري لي بلانر صح و كمان هذي السنة ما سويت زي كل سنة أحط لي لستة أهداف مقسمة لا حددت بس هدفيين عامة ترتيب أولوياتي و تغيير نمط حياتي لصحي و منظم قد ما اقدر اممم 🙆 حلو و مو حلو، حلو لأَنِّي كنت اضغط على نفسي اني أحقق اكبر عدد ممكن من الأهداف و أحياناً استعجل و أندم و مو حلو لأنو لمى ما حطيت اهدافي واضحة و بالتفصيل سرت متكسلة أسويها ف بداية السنة كنت ماشية تمام فيها و اكتسبت عادات جديدة و تخليت عن عادات بس في النص خبصت شويتين و وقفت كل شي بسبب انو طبعي ملولة و كنت في البداية مرة متحمسة و اشتغل بحماس مرة و لمى انطفى الحماس خلاص وقفت بس الحمدلله في نوفمبر استوعبت اني جالسة أضيع وقت ورجعت بالتدريج و رتبت نفسي.
السنة هذي تعلمت اني ما اشطح مرة في مخططاتي للمستقبل يعني خير الأمور أوسطها و انو اذا عندك حلم او هدف مرة نفسك تحققيه و حاولتي مرة ماقدرتي و كمان مرة و مرة ثالثة الى ما استسلمتي و قلتي ما راح تقدري تحقيقه، لا توقفي و تعيشي في احباط حاولي تسويه غيري في خطتك للوصول له او شوفي ايش ممكن تحطي أهداف عشان توصلك له ممكن ظروفك ما تسمح لك تحقيقه في نفس الوقت الي انتي تبغيه بس الا ما يجي يوم وتوصلي له ان شاء الله، تعلمت انو الرضا و القناعة تعيشك سعيدة أنا الحمدلله من زمان قنوعة بس هذي السنة قررت اني ما راح اشتري شي ما احتاجه حتى لو عجبني شكله او ممكن يفيدني يوماً ما في البداية كان صعب بالذات لمى احد من الي حوليني يتكلموا عن شي انو مهم لازم تشتريه بس مسكت نفسي وحاولت قد ما اقدر اقلل كل شي عندي و اذا شي مرة ابغاه لمى اخلص شي يشبه له أشتريه مرة راحة انو ما عندي أشياء كثير و حوسة و حللت الأشياء الي عندي مثلاً في ملابس لها عندي كم سنة جديدة ما عمري لبستها دحين حللتها 😂 اول كنت افتح الدولاب أقول ما عندي شي بروح اشتري دحين لا💪مبسوطة اني قدرت و اقتنعت بالي عندي 💖، و كل سنة اتعلَّم زيادة انو الحياة نعيشها مرة و اني استشعر النعم و السعادة في تفاصيل يومي الصغيرة و الكبيرة و انو سعادة الانسان بيده و قربه لله عز وجل فلا تربطها دائماً بالناس، تعلمت انو اذا عندك صديقة تقدر الصداقة الي بينكم حتى لو انقطع التواصل بينكم فترة طويلة تسأل عنك و لمى تتقاتلوا تعبر عن فرحتها و ما تزعل ع القطيعة و وقت ما تحتاجيها تكون موجودة لك حافظي عليها she's a real friend، تعلمت انو الانتقاد مو دائماً يكون سلبي أحياناً يكون محفز لك للوصول لهدف او تغيير لك للافضل، شاركوني في التعليقات ايش اهم الأشياء الي تعلمتوها هذي السنة...
في سنة ٢٠١٩:
اهتماماتي تغيرت و سرت اشوف أشياء كانت مهمة لي و لازم منها أصبحت تافهة.قابلت بعض صحباتي المدونات في جدة 😍و كان يوم مرة جميل و انبسطت معاهم ان شاء الله نتقابل مرة ثانية كلنا.
في هذي السنة اول مرة تجيني دعوة لايڤنت و رحت له و كانت تجربة مرة حلوة و انبسط فيها 💕، و جربت أسوي كيك بعد توقف ٣ سنوات بس للأسف برضو تجربة فاشلة بس ان شاء الله سنة ٢٠٢٠ اضبطه 💪، صح كيف نسيت أقول لكم انه و لأول مرة في حياتي قدرت أسوي دايت و نقصت ٦.٨ كيلو في تقريباً ٣ شهور و بعدها بفترة كمان سويت دايت و نقصت ٣ كيلو و احلى شي اني ما حرمت نفسي اعتبره إنجاز عظيم لأَنِّي انسانة أحب الاكل مرة 😋🍕🍔🍞ان شاء الله راح اكتب تدوينة عنه.
١٩ مفضلات عشوائية:
١- شاي الليمون بالزنجبيل🍋🍵.٢- روج من مكياجي درجة tempting mattes 01.
٣- عطر الجسم Blush pink من تيد بيكر.
٤- كريم الوجه الليلي من directalab.
٥- سماعات Bsoe وايرلس.
٦- ستك فاونديشن من ميك اب ريڤلوشن.
٧- ايس كريم ساندوتش السعودية حب منذ الطفولة بس هذي السنة ادمان.
٨- زيت جوز الهند من باراشوت.
٩- شمع تصفيف الشعر من لي ستافورد.
١٠- Netflix 💗.
١١- جل الصبار.
١٢- الشاورما اكثر أكلة غير منزلية أكلتها هذي السنة 😂😋.
١٣- سائل استحمام pears.
١٤- مقشر جسم منزلي.
١٥- ماسك الموز للشعر (منزلي).
١٦-جبنة فيتا مع فلفل رومي 😋 اكتشفتها في نوفمبر صدفة لذيذة جداً ليش محد قال لي عليها من قبل 😕.
١٧- لوشن البشرة الجافة Flexitol .
١٨-ماسكرا ايسنس lash princess تجنن 😍.
١٩- شامبو و بلسم John Frieda.
انتهت سنة ٢٠١٩ و بدأنا سنة ٢٠٢٠ يارب تكون سنة حلوة عليكم و مليئة بالسعادة و الإنجاز و التغيير للأفضل 💕.
و بكذا انتهت تدوينتي، أتمنى انها عجبتكم و قراءة ممتعة 💖
صراحة ما توقعت اني راح اكتب هذا كله لأَنِّي حرفياً لي سنة ما كتبت بس حالياً جاني حماس ارجع للتدوين و افتكرت قد ايش الكتابة تبسطني 😍💖، بقولكم شي بصراحة قبل لا اكتب التدوينية كنت أقول سنة ٢٠١٩ ما كانت مرة حلوة بس و أنا اكتب و استرجع ذكرياتها طلعت فيها أشياء كثير حلوة و تجارب جديدة و دروس بس أنا ما كنت مركزة الا في الأشياء السلبية بس طلعت سنة حلوة مو نفس الي كنت أبغى بس الحمدلله على كل شي 💕 و ان شاء الله الجاي أحسن.
نهاية عام ٢٠١٥
نهاية عام ٢٠١٦
نهاية عام ٢٠١٧
نهاية عام ٢٠١٨
تابعيني على شبكات التواصل الاجتماعي :
و عشان توصلك التدوينات أول بأول على المربع الأزرق الي مكتوب فيه متابعة 💗
ليست هناك تعليقات:
إرسال تعليق