صباح/ مساء الخير
اليوم راح أدوّن عن تجربتي للكريم السحري من yourgoodskin الي هو Balancing Skin Concentrate
ليش قلت سحري؟!
لأنه اول ما طلع سوا له حملة قوية مرة في بوتس و في السوشيال ميديا وطلع كلام كثير عليه و يوعدك بأنه يحسّن من بشرتك من خمسة نواحي : ملمس البشرة، مستوى الترطيب، الدهون، احمرار او يخلي البشرة احسن و يوحد لونها و يوازنها 🤩 قبل لا أقول تجربتي خلينا نتعرف شوية ع المنتج
اهم مكوناته:
الشاي الأخضر: ممتاز جداً للبشرة الدهنية، غني بمضادات الاكسدة ، يجدد خلايا البشرة و غيرها فوائد كثير.
فيتامين سي:يعطي البشرة نضارة ، يقلل تصبغات الوجه ، يرطب البشرة و يقلل من احمرارها و غيره كثير.
فيتامين أي: يخفف البقع الداكنة ، واقية من التجاعيد.
عشبة الزنبق اليابانية:
بيسابولول: نوع من الزيوت العطرية الي تستخلص من البابونج من اهم فوائده انه ممتاز لحب الشباب و أيضاً سرعته في علاج الندبات و الاثار و يرطب البشرة لانه يحتوي على البانثونيل.
سيفنغوزين: يحتوي على السيرامايد و هو مكون أساسي طبقة الجلد الخارجية يحفظ الماء و لرطوبة في خلايا البشرة و يساعد على محاربة التجاعيد و الخطوط الرفيعة.
شايفين كيف مكوناته مرة تحمس للتجربة 🤩🤩
طريقة الاستخدام:
يستخدم مرتين يومياً و ممكن نحط بعده كريم يومي او ليلي و كمان ممكن مع واقي الشمس.
تجربتي للكريم :
راح اكتب لكم تجربتي في تحدي ٢٨ يوم من استخدامه بدأته تقريباً نص يناير ، أول شي سويته وقفت كل شي استخدمه لوجهي عشان اشوف نتيجة الكريم وحده بس استخدم الغسول اذا سويت ميك اب استخدمه او اذا احس اني احتاج استخدمه ، و للأمانة ما كنت استخدم الكريم مرتين يومياً غالباً استخدامي له مرة في اليوم اما مرتين اذا افتكرت 😅.
الأسبوع الأول:
المفروض أول يوم البشرة تكون افضل و انعم الي لاحظته بعد ممكن ٦-٧ ايام استخدام بشرتي سارت اصفى✨ كان في اثر حبة في خدي اليسار مرة خفت بشكل واضح و كمان كانت طالعة لي شوية حبوب صغيرة و راحت الحمدلله ، اكثر مشكلة اعاني منها في وجهي هي المسام 😭💔 لازم كل فترة تسير واضحة اذا وقفت فترة عناية ترجع على طول و مع تغير الجو كمان لاحظت انو مع استخدامه بدأت ترجع تصغر بالنسبة ل انو يتحكم في الدهون أنا بشرتي تعتبر عادية مايلة للجفاف فما حقدر احكم على هذي النقطة، قبل لا أبدأ طلعت لي حبوب في منطقة الجبهة الي تكون من تحت الجلد مع استخدامي له لمدة ٨ أيام ما فرقت، كمان مؤخراً سرت احس منطقة تحت العين شوي غامقة 🕵🏽معاكم وحدة من النوع الي يدقق على اشياء محد يشوفها 🙋🏽♀️ كنت ما احط فاونديشن في الجمعات البسيطة حالياً احس لازم احط شوية كونسيلر عشان ارتاح نفسياً.
الأسبوع الثاني (١٨ يوم استخدام ) :
ما أعرف ليش مو قادرة التزم باستخدامه مرتين يومياً 🙄 حالياً النتائج زي ما هي بس الحبوب الي كانت في الوجه راحت الحمدلله بقي كم وحدة بس لاحظت انها خفت كثير اتوقع انها بسبب تغيير الجو أو لأني غيرت نظام اكلي ، هذا الاسبوع استخدمت الغسول مرتين ، بالنسبة للمسام قلت أكثر و ما أثر في الرؤوس السوداء و مرة يرطب الوجه ع تغيرات الجو و البرد إلا انو وجهي ما تقشر من الجفاف هذا الشي خلاني مرة احب الكريم 💗، يقال انو يخلي البشرة افتح صراحة ما فرقت معايا ممكن الي عندهم بقع داكنة تفرق معاهم اكثر.
الأسبوع الثالث:
هذا الاسبوع سويت ماسك 🧖🏼♀️ و لصقات الرؤوس السوداء بالنسبة للنتائج أكثر شي فرق معايا المسام نتيجة جداً ملحوظة و مرة حبيتها و الآثار راحت بس الحبوب الصغيرة مستمرة تطلع صراحة خفت أنها منه و وقفته كم يوم بس بعدين حسيت انو السبب ممكن من الماسك لانو مرتين استخدمته و تطلع أو شفرة فلامنجو هذي المرة حسيتها غير عن دايماً في شي غلط فيها تجرح شوي 🤔 فاحتمال من واحد منهم << عجبني الكريم ما ابغى اوقفه فابرر له 😂 حسيت البشرة سارت اصفى و نضارة اكثر.الأسبوع الرابع:
اخر اسبوع هو في العلبة حاطين عدد ايام استخدام الكريم و انو ع اليوم ال ٢٨ راح يخلص بس لسى باقي في حق فترة طويلة و لمى استخدمه ضغطتين صغيرة تكفي الوجه و الرقبة 👍🏼 بالنسبة للنتيجة اكثر شي حبيته انه عالج المسام الكبيرة 😍 و مرة مرة صفى البشرة و الحبوب الصغيرة راحت و الاثار يخليها تروح بسرعة حاليا بعد شهر من الاستخدام بشرة موحدة مافي dark spot ناعمة صافية مشرقة نضرة
حقيقي مرة انصح تستخدموه لانو مرة حلو و فعلا زي ما يقولوا يخلي البشرة healthier بالنسبة لملمس البشرة فعلاً يحسنه و يخليها انعم 👍🏼.
لمعلومات زيادة عن المنتج موقع Your Good Skin .
موقع بوتس .
تعليقات
إرسال تعليق