بعد عملية بحث سريعة في جوجل مرة تحمست اجربه عليه مدح كثير 😍 و حسيت اني لو ما سويته فاتني شي خطير خلوني اقولكم اول فوائد بعدين الطريقة .
فوائد السدر:
- يفتح البشرة.
- يعالج حب الشباب.
- يزيل البقع الداكنة.
- يزيل الرؤوس السوداء.
- يقشر البشرة و يعطيها نضارة.
الفوائد أخذتها من هنا ، بالنسبة لاستخدامه لحب الشباب زمان مرة استخدمته و تكلمت عنه في تدوينة تجربتي لبعض منتجات الوجه .
الطريقة الأكثر تداول :
الطريقة الشائعة خلال بحثي كانت عبارة عن :
-حليب بودرة.
- سدر .
-مويا.
غالباً تكون مكتوب ملعقتين طعام سدر بس لمى جربتها حسيتها كمية كبيرة .
طريقتي:
جربت كذا طريقة حالياً استخدمه بثلاث طرق حسب المتوفر المكونات نفسها مكون واحد هو الي يختلف.
المكونات :
-ملعقة طعام و ممكن ازيد نص ملعقة سدر.
-كركم جسم نص ملعقة.
-سائل للخلط ( حليب بودرة مع مويا/ حليب سائل/ لبن).
-زيت عطري بالليمون اختياري.
طريقتي اخلط المكونات كلها اهم شي قوام الخليط ما يكون مرة خفيف ولا مرة ثقيل يعني ينفرد معاك بسهولة بس لمى تمسكيه ما يتكب على طول هو تقريبايعتبر لزج و لمى تخلطيه راح يطلع لك شوية رغوة كذا معناته كويس و جاهز للاستخدام احب اخليه اقل شي ربع ساعة و بعدين استخدمه لان السدر بنتفش شوية مع الوقت و بعدين احطه على جسمي المفروض اقل شي ربع ساعة بس صراحة ما احب اطول جربت مرتين أنشف بالاستشوار ما عجبني عدمت الدنيا و كمان لمى ينشف مرة لمى قشرة بحركة دائرية يطفش شوية ف سرت اخليه لحد ما احسه شوية بدأ ينشف و استخدم للتقشير ليفة مغربية و مويا بحرارة اقدر اتحملها
طريقة اللبن أو الحليب السائل:
بانسبة لي أفضل طريقة بالحليب السائل لاحظت انه يخلي الماسك ينشف بسرعة و تجربة حلوة و لمعة الجسم وقتها تكون حلوة ، اللبن كمان حلو و برضو ينشف بسرعة بما اني ما احب اطول بس اثنينهم ما احب استخدمهم الا لو كان عندي خربان كا اتقبل اني استخدمه كذا لجسمي يعني حليب البودرة اهون.
بالنسبة لزيت الليمون اضفته مؤخراً في آخر ثلاث اسابيع اهم سبب انه اذا زاد من الماسك يخليه يجلس عندي يومين عشان استخدمه و كمان يعطي ريحة لأني ما أحب ريحة السدر و استفيد منه بنفس الوقت بس مرة احط شوية نقطة وحدة بس لو كثرت يحرقني و ما اقدر اخليه دقايق صحبات البشرة الحساسة انتبهوا لهذي النقطة.
نتائج الاستخدام:
ممكن لي ٣ شهور من بديت اجربه استخدمه مرة في الاسبوع و في اسبوعين وقفت استخدام من أول مرة استخدام لاحظت لمعة خفيفة في الجسم اشبه باللمعة الي تكون بعد الحمام المغربي و كمان ترطيب يرطب البشرة شوية اكثر مكان شفت فيه نتايج يدي ممكن هي اكثر شي اسوئها تمام توحيد لون البشرة ممكن شوية بعد ٥ استخدامات في الأماكن الجافة أما بالنسبة للآثار عندي أثار حساسية في الساق و حرق سار لي بعد أول استخدام و لسى موجودين خفو شي بسيط زي أي مقشر عادي بس لسى يعطيني احساس حلو بعد كل استخدام نظافة و لمعة في البشرة و نعومة و كذا بشرة نضرة حلوة فأكيد راح استمر عليه قد ما اقدر شفت بنات يقولوا انه في البداية استخدموه يوميا و شافوا نتيجة حلوة بس انا احس مستحيل اسوي كذا مرة في الاسبوع تكفي.
و لنتايج أحلى بعده رطبي بشرتك بمرطب ترطيبه عميق.
تعليقات
إرسال تعليق