صباح / مساء الخير لكل من يقرأ التدوينة
اليوم تاريخ 12 ابريل اليوم 20 من حظر التجول .
قررت اكتب تدوينة عن هذي الفترة و شعوري وقتها كتوثيق لهذي الفترة، شي ما كنت اتخيل ابداً اني اعيش فيه كنت اسمع قصص عن اوبئة زمان و اشوف افلام مشابهة جداً للي نعيشه بس كنت اشوفها خيال علمي مستحيل تسير لنا، شي بس في الافلام بس سبحان الله انكتب لي اعيشه في الواقع
قبل حظر التجول الالزامي لمى توقفت المدارس ٨ مارس بدأوا شوية الناس بالحجر المنزلي و سار في وعي اكثر و لسلامتنا نجلس في البيت المهم وقتها كان في كثير اشوفهم في السوشيال ميديا منهارين و يتحلطمون من جلسة البيت و ايش نسوي و طفش... وقتها انا كنت جالسة في البيت و قررت الحجر و كان الوضع عندي عادي هنا انا قلت الحمدلله اني متعودة على جلسة البيت و جربت قبل كذا عزلة بقرار مني لشهور ما اطلع الا للضرورة و تقبلت الموضوع بكل رحابة صدر طبعاً دحين الناس كلها متقبلة الوضع اتوقع يعني، الله يبعد عننا المرض و ان شاء الله كل شي يرجع زي قبل و احسن .
الاسابيع الأولى من الحجر:
بداية الحجر كان وضعي عبارة عن توتر و قلق و ما انام ما كنت مستوعبة الوضع ابداً و اول ما اصحى و قبل النوم اجلس اشوف الاخبار و نومي كله كوابيساساساً كلمة جائحة وحدها ترعب الله يلطف بنا و بعدين بالتدريج بديت استوعب الوضع، مؤخراً قررت ما اتابع الاخبار كثير بس اشوف القرارات المهمة و من مصادرها و اسوي سكيب لرسايل الواتساب الي تفاؤل بزيادة كانت توترني زي لمى قالوا اسبوعين اجلسوا في البيت و يروح الفايروس و اشياء غيره، بعدين الحمدلله رجعت لروتيني الطبيعي و لأنه سار عندي وقت كثير فاضي قسمته بأشياء مفيدة و أشياء غير مفيدة عشان ارتاح نفسياً و ما اطفش و الحمدلله كله كان ماشي تمام بس طبعاً لازم تجي أيام أكون خلاص مرة طفشانة و ابغى اخرج اي مكان حتى لو الفلف في السيارة عادي بس اهم اطلع من البيت ع اني بيتوتية بس كنت احس خلاص طفش كل يوم نفس الشي مع تغيير اشياء بسيطة في اليوم و فرق بين العزلة الي سويتها و الحجر عزلتي كنت في بريطانيا و مافي اهلي او اي احد يقرب لي + كان عندي شغل كثير وقتها فيضيع الوقت + كان عندي بلكونة و اجواء حلوة و منظر حلو و حديقة في العمارة امشي فيها اما هنا جالسة بين اربعة جدران و حتى شبابيك ما اقدر افتحهاممكن هذي مبررات احطها لنفسي بس قررت ان شاء الله في بيت المستقبل لازم يكون عندي مكان اوت دور حلو و مرتب 👍🏼.حالياً:
الانسان على ما يتعود بعد اكثر من شهر في الحجر المنزلي احس اني هذي الفترة رجعت زي البداية عندي روتين و مرتبة نفسي حسيت بقيمة الوقت اكثر صح في خوف و قلق طبيعي هذا مرض وباء منتشر،الله يبعده عننا.
أشياء حسيت بقيمتها في زمن الكورونا:
- الحياة الي عايشتها و الأمان.
- نعمة الصحة و العافية.
- الحمدلله اني عايشة مع اهلي.
- قيمة التطور و التكنولوجيا الي عندنا و كيف التواصل سار سهل .
- توفر كل شي بسهولة بدون تعب الحمدلله.
- الروتين انا من الناس الي ما احب الروتين بس الفترة هذي خلتني اعرف اني كنت في نعمة عظيمة عايشة يومي و انا متطمنة و مرتاحة و لكل شي وقته.
- الطلب من المتاجر الالكترونية و كيف سار سهل نشتري الضروريات من البيت.
أشياء تعلمتها في زمن الكورونا:
الكورونا خلاني اعيد النظر في أشياء كثير في حياتي و استوعبت السنوات الي راحت من عمري كيف راحت و ايش سويت فيها لقيت اني غالباً اقول انا احط اهداف و ما اسويها كلها و السنة الماضية قررت اني ما اسوي اهداف و كنت شوية احس بتأنيب ضمير بس اكتشفت اني لو ارجع لنفسي قبل ٦ سنوات و اقارنها بدحين تغيرت مرة من نواحي و الحمدلله للأحسن هذا الشي بحد ذاته يعتبر إنجاز 💪🏼 احس انيرحت لموضوع ثاني😅، كمان من الأشياء الي تعلمتها هذي الفترة- كنت دايماً أقول الدنيا فانية لو كنت زعلانة او سار شي ما عجبني بس هذي الفترة فعلاً حسيت انو الدنيا فانية و ما بيقى لي إلا أعمالي.
- ما اشوف الحياة وردية مرة لانو ممكن في يوم وليلة كل شي يتغير💁🏻♀️.
- لا للتأجيل إذا عندي هدف ابغى اوصله بدل ما أأجله بسبب اشياء تعتبر بسيطة او في لها بديل و يتأخر بالشهور ابدأ فيه في وقتها بالي عندي .
- اكتشف هوايات جديدة جاني الالهام من كثير في السوشيال ميديا انو وقت الحجر جالسين ياخذوا كورسات و يتعلموا اشياء جديدة فقررت اني اكتشف لي اهتمامات جديدة.
- اسوي كنترول على العصبية و النرفزة لأني اكتشفت اني اتنرفز بسرعة وقت الضغوطات.
- اهم شي لازم اركز على موضوع المناعة🛡 و اشوف شي يقويها و اهتم في نوعية الاكل الي آكله.
كيف اقضي وقتي في الحجر:
ماعندي روتين معين بس الصباح غالباً عبادة و شغل و الظهر تنظيف و رياضة وباقي اليوم حسب، اقتراحات لقضاء الوقت...- قراءة سورة البقرة يومياً أو سماعها.
- قراءة جزء من القرآن كل يوم .
- مشاهدة مسلسل كوميدي مع العائلة .
- المشي يومياً لمدة نص ساعة.
- تجربة التأمل.
- رياضة.
- قراءة كتاب
- يوجا.
- تعلم شي جديد ( لغة، طبخة، حرفة، أي شي).
- جرد الملابس الأغراض.
- مشاهدة فيلم.
- مشاهدة اليوتيوب.
- قضاء وقت مع العايلة.
- مشاهدة برنامج تلفزيوني أو على اليوتيوب الفترة هذي نتفرج برامج انا و اختي ممتعة صراحة.
- اخذ دورة اونلاين عن شي حابة اتعلمه.
اخيراً حابة اقولكم استغلوا هذي الفترة باستكشاف ذاتكم و التعرف عليها أكثر و فعل أشياء تسعدكم و اقضي وقتك زي ما تحبي بدون ضغط عيشي يومك بالطريقة الي تريحك بدون ضغط خليه حسب مزاجك و عادي مو لازم كل يوم سوي شي مفيد الحياة توازن.
الله يعدي الأزمة على خير و ترجع ايامنا زي قبل و أحسن 💗.
تابعيني على شبكات التواصل الاجتماعي :
و عشان توصلك التدوينات أول بأول على المربع الأزرق الي مكتوب فيه متابعة 💗
تعليقات
إرسال تعليق