تدوينة اليوم لي سنتين ابغى اكتبها .. و ما جاء الوقت المناسب الا اليوم و بما إننا في إجازة يعتبر وقت ممتاز لتعلم شي جديد و تطوير مهاراتنا خصوصاً اللغة الانجليزية لغة عالمية و من أهم اللغات نحتاجها في الدراسة و العمل و السفر زي مو واضح العنوان اليوم راح اقولكم كيف تعلمت انجليزي و طورت لغتي الانجليزية
في البداية شخصياً أحس مو مرة لأنه تقريباً في المدرسة و أغلب المعاهد تعتمد ع التعليم الاكاديمي قواعد اللغة و أساسياتها دخلت ٣ في أعمار مختلفة وأحس ما استفدت منها إلا القواعد و تنعاد كل مرة نفسها و نفس الي درسته في المدرسة عشان كذا اشوف إذا انا ابغى اللغة تمام و اتكلمها بطلاقة لازم اعلم نفسي بنفسي و ما اعتمد ع الدراسة بس، خلوني أقولكم قصتي المتواضعة
من لمى كنت في الابتدائى كنت أحب المسلسلات الي تجي في ام بي سي ٣ و اتابعها يومياً زي سويت لايف أوف زاك اند كودي و هانا مونتانا و ام اي هاي يا سلام كانت أيام جميلة منها بدأ للغة الانجليزية و بعدين ام تي في و فوكس و دبي ون، ugly betty مودرن فاملي ذا بلوك و ماستر شيف و سويت ١٦ برنامج باريس هيلتون و حق تصليح السيارة و كمان أيام الويكند يوم الأربعاء و أفلام الويكند حق ام بي سي ٣ اوكي كأني خرجت عن الموضوع الأساسي .. فمن الأشياء ساعدتني أتعلم انجليزي هي:
- حبيت اللغة.
- سمعتها كثير (بالنسبة لي اهم خطوة في التعلم)
لو تلاحظوا أطفال الجيل هذا لأنو يشوفوا اليوتيوب أغلب أشياء حق انجليزي فـ ما شاء الله تعلموا اللغة بدون دراسة و الاكسنت مرة حلو ما شاء.
ابغى احكيكم عشان احمسكم تتعلموا و إنو مو صعب بس تحت راح احط النقاط للي مو حاب يقرأ زي ماقلت من عمر يعتبر صغير كنت اتفرج أشياء بلغة انجليزية بس مو معناته إنه الكبار فاتهم الوقت و كمان لأني اتفرج بترجمة اشوف ما تعملت اللغة و اصلاً كنت اركز ع الترجمة لأني اتفرج بحماس بس تعودت عليها اذني سمعتها كثير، في الثانوي مرحلة التطور الكبير في اللغة اكتشفت عالم اليوتيوب و كان مافي ترجمة طبعاً في البداية كنت أفهم كم كملة بس إني اركز و احاول افهم وسرت أقرأ القراءة مرة تساعد كنت أقرأ تدوينات بعدين بديت كتب و بديت اسمع بودكاست و مع الوقت الحمدلله تطورت وصلت مرحلة مبسوطة فيها جداً قبل ٤سنوات لمى رحت بريطانيا كنت متخوفة من موضوع اللغة ولأني حجلس سنتين و وقتها آخر مرة سافرت مكان احتاج اتكلم في انجليزي أولى متوسط ممكن بس وقتها كمان أسمع إنو اللهجة البريطانية مرة صعبة أول ما وصلت نزلت لحالي كتجربة و رحت بوتس وكنت مرة مستحية اتكلم بالقوة تطلع الكلمات و وقت الحساب خليتها تعيد الكلام ٣ مرات وبعدين جاوبت و انا مو فاهمة برضو 😂، لأني كل السنين الماضية ما فكرت اتكلم انجليزي بس في المدرسة و المعهد وكانت معينة و هذا غلط ممارسة الكلام مهمة جداً في تعلم اللغة طبعاً كنت أقول الكلام و اقلبه في راسي بالانجليزي و يلا ترجمي كل كلمة و لمى أوصل ابغى اتكلم انسى الكلام 😅 و أروح اقول كلام من راسي جربت كم مرة و عرفت انه هذي الطريقة فاشلة فسرت ارتجل الكلام مو لازم كلو صح مو لغتي و مع الوقت و الحمدلله ما اخذت مني وقت كثير سرت اتكلم بطلاقة و سرت ادردش مع الموظفين في مطعم أو قهوة أو دخلت محل لحالي، ليش؟ لأني متعودة عليها بس مو متعودة اتكلمها لمى انجبرت عرفت عقلي مخزن كلمات كثير عرفت أكون جمل أحياناً نكون نقدر نسوي الي نبغاه بس الخوف أو الخجل ما يخلينا نسويه نحتاج شجاعة و جرأة و راح ننبسط بالنتيجة نجي لنصيحتي لتعلم الانجليزي أو تجربتي...
كيف أتعلم انجليزي:
في الكلام الي فوق قلت إنه الدراسة في معهد مافدتني مرة بس القواعد الأساسية مهم نتعلمها يعني ناخذها في المدرسة أهم شي نكون فاهمينها زى الحاضر و الماضي وهذي الأشياء و كمان يعتمد على هدفك للتعلم إذا كان للدراسة أو لغة زيادة و غيره، تعلم لغة جديدة بصفة عامة يشمل ٤ مهارات
- سماع
- كلام
- قراءة
- كتابة
آخر التدوينة راح أحط لكم مواقع و قنوات للتعليم الأكاديمي، دحين راح أقولكم الأشياء الي خلتني اطور لغتي و اتعلم أكثر:
- اتفرج (مسلسلات،يوتيوب، أفلام): يوتيوب أكثر شي استفدت منه لأن لمى أشوف مثلاً فلوقات اسمع الكلام باللغة العامية و المصطلحات الي يستخدموها و كمان خاصية الترجمة بالانجليزي أحياناً تكون حلوة، كمان أشياء الأطفال مرة مرة تعلمك لأنه لغتها مرة سهلة و بسيطة المسلاسات القصيرة و الكوميدية مرة تعلم و غالباً كلامهم يكون سهل زي فريندز و ذا اوفيس إذا لغتك متوسطة شوفيها بترجمة بالانجليزي تعلمك أكثر.
- القراءة: كمان نفس الشي ابدأي بكتب بسيطة حق الأطفال و بعده المراهقين و الكتب الي فيها صور و إذا طالبة جامعية أو حتى مهتمة في مجال معين أقرأي كتب و شوفي مقاطع لنفس المجال عشان تتعلمي مصطلحاته.
- للي يحبوا الروايات في كتب تجي مقسومة الصفحات جهة عربي و جهة انجليزي.
- البودكاست و الأغاني.
- إذا كلمة ما عرفت معناها اشوف المعنى بالانجليزي أحاول قد ما أقدر ما اترجم للعربي.
- عندي دفتر صغير أحط فيه الكلمات الجديدة علي و الكلمات الصعبة يكون مرجع لي و أحفظها للأمانة يمكن أخر مرة استخدمته قبل سنة ونص أو أكثر.
- اهم شي الممارسة و الالتزام.
- نقطة إضافية أكتب في البلانر و قائمة المهام أو المقاضي بالانجليزي بدل العربي.
مواقع و تطبيقات و قنوات تساعدك في تطوير لغتك:
تطبيق Duolingo
تطبيق Word of the day
تطبيق storytel
قناة English with Lucy
موقع English grammar
EngVid هذا كمان مرة حلو للي بيختبر ايلتس او توفل
قناة دروس اونلاين
تدوينة عفوية ومفيدة لكل شخص يبي يتعلم وجاد في التعلم. أسعدك ربي يا لبون.
ردحذف