مساء / صباح الخير
لمى تفكري تبدأي عناية لوجهك و تسوي لك روتين راح تبحثي في قوقل و السوشيال ميديا و تشوفي روتينات مختلفة و غالباً بعدها راح تحتاري ايش تسوي، أنا اليوم قررت اكتب هذي التدوينة عشان في يوم من الأيام كان نفسي يكون عندي اخت كبيرة تعلمني كيف أبدأ اهتم بوجهي و ايش احتاج له 💜 بدل ما كنت اجرب حاجات كثير فيه الي نفعني و الي ما سوا شي و الي عدم وجهي زيادة، ماراح اطول في المقدمة و ابدأ الموضوع على طول .
ايش نوع بشرتي و كيف اعرف ؟
قبل لا نبدأ في كيف نسوي روتين لازم أول حاجة تعرفي نوع بشرتك :
- دهنية
- مختلطة
- جافة
- عادية
ممكن تعرفي اذا رحتي عند دكتور جلدية و في كمان بعض فروع النهدي عندهم دكتور تستشيريه مجاناً
أو تقدري انتي تشوفي بنفسك زي مثلا اختبار الورق الورق حق دهون الوجه أو ممكن المناديل القوية حق التنشيف اغسلي وجهك عشان يكون نظيف وبعد ما ينشف تماماً ممكن ساعة حتى عادي حطيها على اماكن مختلفة و اضغطي بعدين حطيها عند الشمس او لمبة و شوفي اذا فيها زيت فكذا مكان معناها دهنية و اذا في التي زون بس معناها مختلطة، طريقة ابسط وقت ما تصحي من النوم شوفي وجهك اذا لمستيه و حسيتي فيه زي. الزيت في التي زون ، بالنسبة للبشرة العادية و الجافة كيف تفرقي الجافة تكون فيها قشور و ملمسها جاف.
حاجات لازم تعرفيها قبل تبدأي ...
بعد ما عرفتي نوع بشرتك شوفي ايش المنتجات الي تحتاجيها في روتينك، أول و اهم حاجة امشي على قاعدة Less is more كل ما كانت المنتجات اقل كان افضل لبشرتك و افضل لك عشان ما تطفشي بالذات انك لسى صغيرة و بشرتك حلوة و لسى تكبري اهم شي تركزي على غذائك و شرب المويا جداً مهم، طيب نجي لثاني شي مهم متى أبدأ اسوي روتين عناية لوجهي ؟ ما في وقت محدد تبدأي عادي وقت ما انتي تحسي انك تبغى تبدأي عناية ابدأي، شخصياً اشوف افضل شي من عمر صغير عشان تتعود انسب شي ١٢/١٣ سنة بأشياء مرة بسيطة و أساسية، أنا بديت عناية وجهي ممكن من عمر ١٢ أو ١٣ و الي خلاني ابدأ انه طلع لي حب شباب في وجهي و رؤوس سوداء و حسيت لازم أبدأ اسوي شي وقتها كل ما اروح السوبرماركت لازم اشتري شي جديد اجربه قبلها كنت اسوي كذا لشعري كل مرة اشتري و اجرب 😅، لمى سرت ١٥ بديت اعرف لنفسي اكثر و ايش يناسبني و استفدت من هوس التجربة بأني اتعلم اكثر في العناية و اهم المكونات في المنتجات و ايش فوائدها.
ثالث شي مهم بعد ما عرفتي نوع بشرتك أفضل تاخذي فكرة عن المكونات الي تناسب بشرتك عشان تعرفي تختاري المنتجات 👍🏼، رابع حاجة لازم تحطي في بالك كل انسان تجربته غير الثاني يعني حتى بعد ما تعرفي نوع بشرتك و تابعتي بلوجر نفس نوع بشرتك مو كل منتج فادها يفيدك، عشان كذا لازم تكوني عارفة المكونات الأساسية لكل منتج لأنه في ما تناسبك تناسب غيرك مثلاً شفتي وحدة نفس نوع بشرتك تمدح منتج من اهم مكوناته فيتامين سي و انتي جربتي قبل منتج كان فيه فيتامين سي و ماناسبك افضل تبتعدي عنه و اذا العكس لمى جربتيه ناسبك كملي جربي منتجات فيها فيتاين سي.
ايش المنتجات الي اضيفها في روتيني و كم منتج؟
بعد ما عرفتي نوع بشرتك على اساسها تختاري المنتجات الي تضيفيها في روتينك راح احط اقتراحات في النهاية لأنواع بشرة مختلفة، كم منتج؟ نفتكر انه ليس از مور عندي قناعة الى بداية الثلاثين ما احتاج احط منتجات عناية كثير الا لو احتاجها
الروتين الاساسي عبارة عن
- غسول للوجه (كم مرة في اليوم و إذا كل يوم يعتمد على نوع بشرتك).
- مقشر خفيف (مرة-مرتين في الاسبوع) ما افضل المؤشرات الي تكون خشنة للوجه ابداً يهمني تكون الحبيبات مرة ناعمة.
- ماسك (مرة اسبوعيا او كل اسبوعين )
- واقي شمس (في النهار)
- مرطب شفايف
- كريم مرطب / سيروم (جداً مهم للبشرة الجافة عشان نحمي حاجز البشرة و نعوض نقص الدهون فيه )
هذا الروتين اشوفه مرة مناسب من عمر ١٢ سنة و اكثر تقريباً هو روتيني الحالي بس لان بشرتي حالياً عادية ما استخدم الغسول الا لو خرجت مدة طويلة او سويت رياضة أو ميك اب غير كذا مرة مرتين في الاسبوع تكفيني بالنسبة للتونر، كريم العين، مسحات الوجه الخ... بالنسبة لي مو اساسية و مش لازم تستخدم الا لو تحتاجيها تستخدميها فترة و توقفيها وممكن ترجعي لها وقت ما تحتاجي.
كريم العين اشوفه مو مهم الى منتصف العشرين إلا في حالة عندك هالات شديدة أو انتفاخ شي يخليك تحتاجيه بس برضوا ما اشوفه ينفع لأي عمر ممكن من ١٧ وفوق
الماسكات كمان أنواع في علاجية و في دلع عاد الدلع بكيفك استخدميها اي وقت اما العلاجية لا لأنو كثرتها ممكن تضر البشرة و تعكس النتيجة.
أحماض التقشير شخصياً مرة أحبها💗 بس كمان لازم تستخدم بحذر و تكون عندك معرفة بيها ما أحب استخدمها باستمرار ممكن كم شهر و اقطع فترة و ارجع لها وقت ما سارت بشرتي جافة و انعدمت استخدمت حمض الجلايكولك لفترة طويلة ممكن ٤ أو ٥ شهور بعدين وقفته اكثر من سنة المنتجات الي تنباع غالباً نسبة الاحماض فيها مرة شوية بس برضوا افضل ما تستخدم مدة طويلة لانها تعتبر قوية ع البشرة و تحسسها وضروري معاها واقي شمس البنات الي اعمارهم لسى صغيرة ما انصح ابداً يستخدموها بدون استشارة احس حرام اذا انتي اصغر من ١٦ سنة لا تجربي أشياء قوية ممكن لا سمح الله تضرك 💔 أنا جربتها كان عمري ٢٠ و أخذت نوع جدا خفيف .
التونرات ما اعتبرها مرة مهمة فقط عند الحاجة و هي تكون أنواع في الي لتنظيف والانتعاش و في الي تكون علاجية و غيرهم راح اتكلم عنهم في موضوع ثاني ان شاء الله جاء في بالي اخليها سلسلة لأساسيات العناية بإذن الله المهم التونرات أنواع كثير و في منها تقدري تسويه في البيت زي تونر المرة مرة أحبه لحب الشباب و المسام تكلمت عنه هنا، و تونر للانتعاش و النضارة موية الورد🌹🌹 مرة كثير يحبونه أنا بشرتي تتحسس منها فما قد جربته بس أعرف كثير مرة يحبوه و سنين عليه.
منتجات مقترحة للبشرة الدهنية و حب الشباب
SUPERCLEANSE cleanser هذا غسول للبشرة من جلام قلو من افضل الغسولات للبشرة الدهنية يجنن مرة و يصفي البشرة كمان الماسك الأبيض حقهم حلو للتنظيف البشرة و الحبوب Glamglow Supermud Clearing Treatment Mask .
NIP+FAB Teen Skin Fix Breakout Rescue Pads مسحات للحبوب من نيب فاب عندهم لاين خاص للمراهقين نيب فاب من البراندات الي احبها و اثق في منتجاتهم
ماسك الفحم من اوريجنز
الماسك المفضل عندي وقت ما كانت بشرتي دهنية
أنا ما جربته بس اختي حالياً تستخدمه و مرة حابته بشرتها دهنية و فيها حبوب .
غسول سيتافيل البرو
اخر شي راح اشارككم منتجات تناسب اغلب انواع البشرة
غسول اورجنز
وقت تغيير نوع بشرتي كنت استخدمه فجربته لمى كانت بشرتي دهنية و لمى سارت جافة الين ما سارت عادية و مرة كان يجنن في كل الحالات ما يجفف البشرة و ينظف من قلب
كمان مرة احبه سعره حلو و يؤدي الغرض و لأنه جل فمناسب كمان للي بشرتهم دهنية
تدوينات تخص العناية بالبشرة :
تجربتي لمنتجات your good skin كمان تنفع للبشرة الدهنية و العادية
و بكذا انتهت التدوينة انتظروا تكملة السلسة 💗
لأي استفسار أو سؤال تابعوني على حسابات السوشيال ميديا اكثر شي متواجدة فيه الانستجرام
تابعيني على شبكات التواصل الاجتماعي :
و عشان توصلك التدوينات أول بأول على المربع الأزرق الي مكتوب فيه متابعة 💗
تعليقات
إرسال تعليق