التخطي إلى المحتوى الرئيسي

منتجات خلصتها الفترة الأخيرة ✨


صباح / مساء الجمال يا جميلات ✨
الفترة الماضية خلصت منتجات كثير و حبيت أتكلم عنها كلها في تدوينة وحدة تكون توثيق و مرجع لي 👩🏻‍💻 و أنقل تجربتي لها عشان تفيدكم نبدأ أول شي بمنتجات البشرة 🧖🏽‍♀️ لأنها أكثر شي : 


منتجات الجسم :
غسول و مقشر يومي من سانكتشري سبا تكلمت عنهم هنا المنتجات نفسياً أحسها حلوة للشتاء ☃️ الي تتابعني في الإنستجرام و السناب بتعرف إني مرة أعشق سائل الإستحمام أحب ريحته و ترطيبه و كيف يخلي البشرة ناعمة و منتعشة 🌬 المقشر اليومي حسيته منتج إضافي ما منه فايدة لأني ما أحب أستخدم مقشر يومياً و ما حبيته كمقشر ما أعتقد إني راح أرجع اشتريه .
مقشر ذا بودي شوب للقدم👣 و كريم القدم و الساق من فليكسيتول اثنينهم old time favorite💞 من سنوات استخدمهم و أحبهم المقشر أحسه دلع أكثر من تقشير بس أحب إحساس الإنتعاش المنعنع مرة حلو للصيف و وقت الدوامات و الكريم ترطيبه جداً بطل و مرة ممتاز للأقدام شديدة الجفاف .

منتجات الوجه :
 غسول اورجينز تشيكس أند بالانس ✨ تكلمت عنه هنا و كريم تحت العين من كلينك بيب ستارت تكلمت عنه هنا بكل أمانة الكريم ما راح أرجع اشتريه ما عندي خبرة مرة في كريمات العين بس حسيت هذا مو الشي الواو 🙁 و حسيته تجاري بحت أما بالنسبة للغسول فهو التوب ٢ 👌🏼من قائمة أفضل غسولات البشرة موة أحبه فادني كثير مع طقس بريطانيا المتقلب و أكيد راح أرجع أشتريه .
غسول بشرة و في نفس الوقت مزيل ماكياج بالميسيلار🧖🏽‍♀️ من غارنييه اشتريته السنة الماضية حبيت فكرته حسيته شي سهل أسهل من ماء الميسيلار بس لمى استخدمته مرة ما حبيته جفف بشرتي 🌚 و سارت تتقشر و كمان حسيت فيه ريحة تطفش كأنها شي كيميائي 👩🏻‍🔬 بس جداً جداً خفيفة المهم وقفته و بعدين آخر الصيف الماضي رجعت له و حبيته فهو حلو للبشرة الدهنية لمى كانت بشرتي جافة ماحبيته ما يظف مرة بس ينزل الماسكرا بسرعة و ما يحرق العين بس ما أظن إني ارجع اشتريه أول سبب بشرتي الفترة هذي مايلة للجفاف أكثر السبب الثاني الريحة الي فيه .
عطر مونتال بنك اكستاسي ريحته حلوة و أنثوية كدا ريحة حلوة على فواكه🍑🍇 و حمضيات🍊🍋 أول ما ابخه تضايقني ريحته و أحسه يخليني أعطس كأنه فلفل بس لمى يبرد يسير ريحة حلوة و رايقة .

منتجات الشعر :
شامبو و بسلم ماوي تكلمت عنهم هنا .
شامبو و بلسم و ماسك معالج من اوسي بزيت بذور الماكديميا من زمان استخدمته ممكن قبل ٥أو ٦ شهور و كنت محتارة اتكلم عنه أو لا أحس جربت كثير شامبوهات الفترة الماضية و كثرت ريفيوهات عليها هذا كله عشان أطلع ب أقل شي ٣ أنواع حلوة المهم ما أفتكر نتيجة كل شي لحال 😅 بس أذكر أكثر شي مرة حبيته الديب تريتمنت مرة يجنن بالذات قبل السشوار يعطي الشعر لمعة حلوة ✨ و مدري أيش أقول على ريحة المنتجات 🤤🤤 تجنن تجنن تجنن مرة كأني أغسل شعري بحلاوة 😂 و الشامبو و البلسم بصفة عامة حلوين الشي الي خلاني ابطل منها إنو فيها كحول و أنا أبغى شامبو بدون كحول خصوصاً إني الفترة الماضية ما سرت أسوي زيوت و خلطات طبيعية للشعر أقول إن شاء الله أرجع قريب لأنو الشعر الجاف عن تجربة إذا اهملتيه فترة ينعدم فلازم دايما تكوني مهتمة فيه أقل شي مرة في الشهر زيت .
منتجات الماكياج :
 فاونديشن لانكوم تينت ميركال و ما سكارا ديور شو اكستايس و كحل من ريميل رقمه ٢٦ كلهم حبيتهم 💕 بالنسبة للفاونديشن تغطيته مرة خفيفة و تقدري تحطي كم طبقة يخلي التغطية تعتبر متوسطة و يعطي إشراقة ثباته متوسط و ينفع للبشرة الدهنية و كمان الجافة حلو عليها بس ما أعتقد إني راح أشتريه مرة ثانية درجته مو مرة مناسبتني و فجاة تمام و فجأة قلب مرة أصفر و فاتح و أحس درجات فاونديشن لانكوم مو حلوة على الكل تناسب بشرات معينة أما الماسكرا جميلة حبيتها تبرز الرموش و تعطيها كثافة بس حبيت نتيجتها أكثر شي على الرموش الشفلية و خصصتها لها فأحس ما راح أرجع اشتريها عشانها بس لأنها غالية 🤔 و في كثير ماسكرات نتايجها حلوة و رخيصة نجي لآخر شي كحل ريميل هو يجي برم ما يحتاج له بري و من تحت فيه زي الاسفنجة عشان تدمجيه و يسير ايلاينر مموه أو مدموج سواده حلو كايلاينر مرة مو ثابت بس كحل جوا العين حلو و سعر حلو 👍🏼 .
آخر شي معانا كونسيلر برو من LA girl هذا العشق 😍💞 مرة أحبه هذي ثالث أو ثاني مرة اشتريه للأمانة أعتقد ما عمري استخدمه بالطريقة التقليدية لكونسيلر😅 دايماً استخدمه على الآثار في وجهي أو احطه على الخد و نتفة في الجبهة و و أوزع يسير بدل الفاونديشن تغطيه قوية و ما تحسيه ثقيل ع البشرة 👍🏼 تكلمت عنه كثير في الإنستجرام و قلم حواجب من ريميل جميل حبيته قوامه كأنه شمعي أكثر من إنه كريمي غالباً استخدمه فقط في نهاية الحاجب عشان أطوله شوي نادر أستخدمه ع كل الحاجب بس ما أعتقد إني راح أشتريه هو و بودرة الحواجب حق مكياجي نسيت أصورها 😅 كنت أحبها بس بعدين سرت ما أحبها البودرة سارت كأنها حجر مدري ليش 🤔 ع أني ما أحط لها حتى الفرشة الي استخدمها للجل و كمان أهم سبب أحس أني سرت أعرف لحواجبي أكثر و تعلمت أكثر و أشوف انه ما أحتاج بودرة لها. 

انتهت التدوينة شكراً لقرائتك 💕 و الي حابة تشوف ريفيوهاتي في الانستجرام كلها موجودة في  #لابونيتا_ريڤيوز

تابعيني على شبكات التواصل الاجتماعي : 





و عشان توصلك التدوينات أول  بأول على المربع الأزرق الي مكتوب فيه متابعة 💗
photo sig_zpsnzw9exvy.jpg

تعليقات

المشاركات الشائعة من هذه المدونة

نتيجة تجربتي لتمارين كلوي تينغ

مساء/ صباح الخير  موضوع التدوينة واضح من العنوان  🏃🏻‍♀️  إذا انتي جديدة في عالم الرياضة، كسولة، تملي من الروتين، تبغي تمارين بسيطة و ما تتعب مرة بس نتيجتها حلوة و تفرق كملي قراءة التدوينة للنهاية،

تجربتي لمنتجات ماوي مويستر (مجموعة زبدة الشيا) منتجات شعر طبيعية | Maui moisture

صباح / مساء الجمال ✨ يالله أحس من زمان ما تكلمت عن منتجات عناية بالشعر 🙆🏽‍♀️ اليوم حقولكم عن تجربتي لمنتجات الشعر من ماوي مويستر و هي براند امريكية 🇺🇸 اكثر شي حمسني اجربها هو انها تعتبر طبيعية 🌿 و اهم شي لحظة 🤦🏽‍♀️ خلوني أول شي اقولكم نوعية شعري 👩🏻‍🏫، طبيعة شعري جاف ع قولة ماما يشرب الزيت لأني دايماً اهتم في و أزيته و النتيجة بعد فترة تبين و إذا سحبت اسبوع أو اثنين عناية الشهور الماضية كلها ع الفاضي زيادة ع طبيعته الجافة ما اشرب مويا تمام غذائي مو تمام فتقصف الشعر و تعب حالياً الحمدلله التقصف و التلف خف كثير آخر ٥ شهور بس الجفاف لا مفر منه المهم دايماً أبحث 🕵🏽‍♀️عن شامبوهات كويسة

اصنعي غلاف لهايلايت الإنستجرام الخاص بك بطريقة سهلة جداً ✨

مساء / صباح الخير يا جميلات من فترة سارت موضة جديدة في الإنستجرام عند البلوجرز و الانفلونسرز و انتشرت بسرعة الي هي غلاف أو خلفية لهايلايت الإنستجرام و مرا حبيتها جداً جميلة و كيوت 😻 و أحسها ترتب الحساب ف من وجهت نظري أحس لازم أى بلوجر تسويها في إنستجرامها إذا عندها هايلايتس لأنها تبين الحساب مرتب و بروفيشنال ف راح أحط لكم طريقتين و كل وحدة أسهل من الثانية .