التخطي إلى المحتوى الرئيسي

بدايتي في عالم التدوين


 السلام عليكم و رحمة الله 
قبل فترة اقترحت المدونة الصديقة امجاد في نافذة المدونات انو نتكلم عن بدايتنا في التدوين مرا حبيت الفكرة بس في البداية ما تشجعت مرا اني اكتب لأنو اعتبر مبتدئة في التدوين سار لي بس سنة بس بعدين بعد ما شفت البنات كتبوا و الهدف الأساسي من الفكرة انو نشجع او نلهم البنات الي حابين يبدأوا تدوين قررت اني اكتب بدايتي القصيرة و المتواضعة و بعد كم سنة ان شاء الله راح اكتب مرا ثانية . 




مدري كيف أبدأ الموضوع صراحة فقررت اكتب عشوائي 😊 ، انا مرا أحب اجرب و اخبص في نفسي على قولة ماما الله يحفظها بالذات في خلطات الشعر من ٦ سنين و انا أحب كل فترة أغير الشامبو او الكريم الي استخدمه سواء للشعر او الجسم و الزيوت و كل شي تقريباً مستحيل اثبت على روتين لمدة طويلة و قبل ٤ سنين لمى كنت أولى ثانوي رجع لي الربو مرا تانية و تعبت كم شعر و سرت ما اهتم زي اول رجعت مرا تانية نهاية ثاني و اختي كانت دايم تقولي انتي لازم بعدين تشتغلي في مجال العناية و كدا اخر ثالث فتحت حساب في الانستقرام عشان اكتب تجاربي صراحة سويته لتضييع الوقت و حبيت اني أفيد الناس بتجاربي من باب ولا تحقرن من المعروف شيئا و كمان شفت انو كثرة الحسابات الي كذا في الانستجرام فسويت ههههههههه و بعدها ممكن بأسبوع او أسبوعين  قررت انو اسوي مدونة و للامانة سويتها كتجربة لأَنِّي أحب اسوي اي شي يعجبني و لمى شفت المدونات تحمست و شفت انو عندي كل الي احتاجه عشان اسوي مدونة و كمان أحب اكتب  ، و جلست ابحث ع المنصة الي اسوي فيها المدونة و اخترت بلوجر اول شي لانها مجانية و تدعم اللغة العربية و تركيب القوالب و الhtml فيها سهلة و سويت المدونة الحمدلله و من الحماس كنت كل يوم أدور أشياء في اليوتيوب و قوقل عن المدونة و تركيب القوالب حتى اني مرا سويت قالب ببرنامج ( ابحث عن اسم البرنامج art ) و أيقونات السوشل ميديا و الهيدر و أشياء كثير و ما زلت اتعلَّم و كل ما تعلمت شي راح أكتب عنه في سلسلة التدوين ان شاء الله . 

الصعوبات الي واجهتها : 
من الأشياء الي حسيتها صعبة او أخذت وقت و جهد 
محتوى المدونة قلباً و قالباً : 
المحتوى شوية تعبني لأنو كل الأفكار او المواضيع الي كانت في بالي تخص الجمال و كنت ابغى أتميّز و اكتب عن أشياء غير الجمال فخليت محتوى مدونتي هو اسلوب الحياة بس مؤقت اول ما بدأت كتبت المواضيع الي عندي و بعدها كتبت عن أشياء غير الجمال و بعدين استوعبت انو المحتوى العام ما حيكون مميز لكن المواضيع الي اكتب عنها و الأهم هو أسلوبي في الكتابة هما الي حيميزوني عن غيري بالنسبة للقالب عجزت ألقى قالب استقر عليه على طول أمل او احس انه ما يمثلني القالب الي حاطته حالياً عاجبني ان شاء الله يبقى عاجبني 😊 . 

اسم المدونة و زينتها : 
اسم المدونة حيرني كثير كنت أدور اسم ما في مدونة مسويته سواء كانت عربية او اجنبية و غيرته ثلاث مرات لحد ما استقريت على الاسم الحالي راح احط لكم اخر التدوينة موقع مفيد عشان تعرفي اذا في احد ماخذ اسم مدونتك ولا لا ، زينة المدونة اقصد فيها الهيدر الي في الأقسام حالياً مو مسويته بس في القالب الي قبل هذا كنت مسويته و اخذ وقت طويل مني عشان احط الأقسام و فروعها الفروع هي الي صعبة شوي و تطول لانه يبغالها احد يعرف في البرمجة وانا ما اعرف بس الحمدلله تعلمت و عرفت ، و أيقونات السوشال ميديا و غيرها . 

التفاعل : 
اعترف اني في الأيام الاولى لمى سويت المدونة كنت بس اطالع في عدد المشاهدات كل ما فتحت اللاب اشوف بس كان ما يزيد او يزيد رقم او ٢ بالكثير ٥ ، بس ما يئست الحمدلله ولا استلمت ممكن جاني احباط شوية بس فكرت انا لسى في بدايتي فشي طبيعي ما حتكون عندي مشاهدات كثير لازم اشتغل على نفسي و اكتب اكثر و اطور في نفسي اكثر و اكتب الي حيفيد الناس و يخليهم يشوفوا المدونة ، حابة أقول للي هدفها الأساسي لمى تسوي مدونة الشهرة ما حتقدرِ تكملي لأنو الشهرة ما تجي في يوم و ليلة  و ممكن في شي اسمه حظ ممكن تنشهري بسرعة و تحققي هدفك ، بس شعور انو تكتبي شي من قلبك عشان تفيدي غيرك و تلاقي احد كاتب لك تعليق انه فاده مافي زيه شعور جداً جميل و يحسسني بالانجاز من باب حب لأخيك ما تحبه لنفسك فالحمدلله على نعمة هذا الشعور  ❤️ . 
المواضيع : 
بالنسبة لي دايما تجيني فترة خمول و مافي افكار و اجلس اعصر مخي عشان اطلع مواضيع اكتبها عشان كذا سرت على طول اكتب اي فكرة تجي في بالي و احياناً يكون عندي موضوع معين بس ما تكون عندي المعلومات او التجربة الكافية عنه فابطل منه و كمان بحكم اني اخترت اركز حالياً على مجال الجمال و مدونات الجمال كثير احاول قد ما اقدر اني اكتب عن اشياء مافي احد كتب عنها ، في حاجة احب اسويها لمى ما يكون عندي موضوع اكتب عنه اجلس ابحث عن عن مواضيع في قوقل او اليويتيوب و اشوف ايش الاشياء االجديدة في المجال الي اهتم فيه و افكار مواضيع زي مثلاً سلسلة التدوين الي مسويتها شفت اجانب كثير مسويين مدونات خاصة لدا الشي يعني الفكرة مو جديدة و انا اخذتها و سويتها بطريقتي هذي الحركة حلوة اذا مرا ما عندك مواضيع خذي و طوريها حسب شخصيتك ان شاء الله  فهمتوا قصدي .


في النهاية ما حطول عليكم اكثر من كذا مع اني احس اني لسى ما فرغت كل الي دخلي 💔 بس حقول للي حابة تسوي مدونة تسويها بدون تردد و اذا واجهتها صعوبات ما تستسلم و حطي في بالك انو حتى لو ما عندك متابعين او عدد المشاهدات مو كثير المدونة حتكون زي دفتر المذكرات لكِ تكتبي فيها تجاربك او افكارك او يومياتك حتكون ذكرى حلوة و ممتعة 😍❤️ . 

و نصيحة كمان قولي لأي شخص عزيز عليك انك راح تسوي مدونة عشان لو لا سمح الله جاك احباط يوم يرفع معنوياتك و يساعدك 😍❤️ . 

هذي تدوينة أتكلم فيها عن منصات التدوين للحابة تشوفها هنا

رابط الموقع الي قلت لكم عنه فوق هنا الحلو كمان فيه انو يجيب الاسم في اغلب شبكات التواصل الاجتماعي يعني اذا احد اخذه او لا . 

هذي تدوينات الجميلات الي مشاركات : 






اعتذر اذا كان في اي خطأ املائي لاني كتبت التدوينة بسرعة بدون تدقيق 

 photo sig_zpsnzw9exvy.jpg

تعليقات

  1. لو ممكن كيف الطريقة لـ إظهار صور الانستجرام؟

    ردحذف
    الردود
    1. ان شاء الله في البوست الجاي راح اذكرها حيكون الاسبوع الجاي او الي بعده باذن الله

      حذف
    2. نزلت البوست اذا حابة تشوفيه

      حذف
  2. ماحطيتي رابط تدوينتي معاهم لوووول ... أمزح :)

    عالم التدوين نعمة من الله ، وزي ماقلتي الحظ يلعب دور كبير ، ماننكر إن التفاعل والمشاهدات عامل مهم للحماس والعطاء وماهو شيء عيب إنك تتمنين الشهرة ، ولكن في المقابل ماتحبطين لو ماجالك نفس اللي اتخيلتيه ..

    بالنهاية شعور الإنجاز وتقديم الفائدة للغير يفرّح .. ❤

    ردحذف
    الردود
    1. شعور الإنجاز جداً جميل و محفز 😍💞

      حذف
  3. مشاءلله تدوينتك رائعه ....لله يوفقكي
    ممكن اعرف ايش افضل برامج تركيب قوالب لاني عندي
    مدونه و حاب اغيرها ممكن تساعدني ...شكرا

    ردحذف
  4. مشاءلله تدوينتك رائعه ....لله يوفقكي
    ممكن اعرف ايش افضل برامج تركيب قوالب لاني عندي
    مدونه و حاب اغيرها ممكن تساعدني ...شكرا

    ردحذف
    الردود
    1. تفضلي اختي https://gooyaabitemplates.com
      http://www.themexpose.com
      http://www.soratemplates.com

      حذف

إرسال تعليق

المشاركات الشائعة من هذه المدونة

نتيجة تجربتي لتمارين كلوي تينغ

مساء/ صباح الخير  موضوع التدوينة واضح من العنوان  🏃🏻‍♀️  إذا انتي جديدة في عالم الرياضة، كسولة، تملي من الروتين، تبغي تمارين بسيطة و ما تتعب مرة بس نتيجتها حلوة و تفرق كملي قراءة التدوينة للنهاية،

تجربتي لمنتجات ماوي مويستر (مجموعة زبدة الشيا) منتجات شعر طبيعية | Maui moisture

صباح / مساء الجمال ✨ يالله أحس من زمان ما تكلمت عن منتجات عناية بالشعر 🙆🏽‍♀️ اليوم حقولكم عن تجربتي لمنتجات الشعر من ماوي مويستر و هي براند امريكية 🇺🇸 اكثر شي حمسني اجربها هو انها تعتبر طبيعية 🌿 و اهم شي لحظة 🤦🏽‍♀️ خلوني أول شي اقولكم نوعية شعري 👩🏻‍🏫، طبيعة شعري جاف ع قولة ماما يشرب الزيت لأني دايماً اهتم في و أزيته و النتيجة بعد فترة تبين و إذا سحبت اسبوع أو اثنين عناية الشهور الماضية كلها ع الفاضي زيادة ع طبيعته الجافة ما اشرب مويا تمام غذائي مو تمام فتقصف الشعر و تعب حالياً الحمدلله التقصف و التلف خف كثير آخر ٥ شهور بس الجفاف لا مفر منه المهم دايماً أبحث 🕵🏽‍♀️عن شامبوهات كويسة

اصنعي غلاف لهايلايت الإنستجرام الخاص بك بطريقة سهلة جداً ✨

مساء / صباح الخير يا جميلات من فترة سارت موضة جديدة في الإنستجرام عند البلوجرز و الانفلونسرز و انتشرت بسرعة الي هي غلاف أو خلفية لهايلايت الإنستجرام و مرا حبيتها جداً جميلة و كيوت 😻 و أحسها ترتب الحساب ف من وجهت نظري أحس لازم أى بلوجر تسويها في إنستجرامها إذا عندها هايلايتس لأنها تبين الحساب مرتب و بروفيشنال ف راح أحط لكم طريقتين و كل وحدة أسهل من الثانية .